Jak paźbiehnuć hipiertenzii i što rabić, kali leki nie dapamahajuć?

Jak paźbiehnuć prablem ź ciskam, čamu tut tak važnyja fizičnyja nahruzki i jakija ź ich nie padychodziać, a taksama jak być, kali pryznačanyja leki nie dapamahajuć, «Źviaździe» raźbirałasia z zahadčykam rajonnaha kardyjałahičnaha centra 6‑j Centralnaj rajonnaj kliničnaj palikliniki Minska Taćcianaj KUŹMIČ.

— Asnoŭnyja faktary ryzyki raźvićcia hipiertenzii — niapravilnaje charčavańnie, niedastatkovaja fizičnaja aktyŭnaść, lišniaja vaha, stres, užyvańnie ałkaholu i nikacinu, a taksama hienietyčnaja schilnaść.

Tamu važna sačyć za svaim ładam žyćcia, pravilna charčavacca, zajmacca sportam, paźbiahać škodnych zvyčak i rehularna kantralavać arteryjalny cisk.

Dla prafiłaktyki hipiertenzii rekamiendujecca ŭmieranaje ŭžyvańnie soli. U adnym hramie charčovaj pavaranaj soli źmiaščajecca 387 mh natryju (amal 40%). Pry praźmiernym spažyvańni natryj pryvodzić da zatrymki vady ŭ arhaniźmie i, jak śledstva, da pavyšeńnia arteryjalnaha cisku. Z kožnaj solevaj malekułaj zatrymlivajecca minimum 10 malekuł vady. U vyniku abjom kryvi (i ŭ cełym vadkaści) u sasudach i tkankach pačynaje pavialičvacca, a nahruzka na serca — uzrastać.

Važna abmiežavać tłuščy. Pry spažyvańni tłuščaŭ śpiecyjalnaha pryznačeńnia, takich jak marharyn, palmajadravy i sojevy alej, inšych zamianialnikaŭ małočnaha tłušču, pavyšajecca ŭzrovień chalesterynu, što ŭskładniaje chvarobu. U sasudach utvarajucca ateraskleratyčnyja blaški, jakija abciažarvajuć ruch kryvi. Čym mienš praśviet sasuda, tym vyšejšaja vierahodnaść insultu abo hipiertaničnaha kryzu. Taksama nieabchodna źnizić spažyvańnie praduktaŭ, jakija pavyšajuć uzrovień chalesterynu: naprykład, zamianić tłustaje miasa marskoj rybaj. U racyjonie hipiertonika abaviazkova pavinny być aharodnina i sadavina, treba imknucca štodnia źjadać 4‑5 porcyj harodniny i sadaviny (1 porcyja = 100 hramaŭ).

Važna sačyć za fizičnymi nahruzkami i vykonvać praktykavańni dla prafiłaktyki hipiertanii.

— Darečy, ci možna zajmacca sportam ludziam, jakija pakutujuć ad vysokaha cisku?

— Kožny ŭrač skaža, što aktyŭny ład žyćcia zaŭsiody karysny. Arteryjalnaja hipiertenzija i spartyŭnyja zaniatki adnaznačna sumiaščalnyja, ale pry hetym treba ŭdakładniać, jakim mienavita vidam sportu možna zajmacca. Zaniatki pavinny prachodzić pad nazirańniem, kab nahruzka nie spravakavała maksimalna dapuščalnaha pavyšeńnia arteryjalnaha cisku. U pieryjad abvastreńnia (kryzavaha ciačeńnia) zaniatki možna admianić. Hipiertonikam procipakazany siłavyja zaniatki: nielha padymać hiry, zajmacca padvodnym płavańniem, padymacca na hory, zajmacca ŭsimi vidami baraćby, ciažkaj atletykaj.

Lubaja dziejnaść, jakaja pavialičvaje častatu sardečnych skaračeńniaŭ i dychańnia, ličycca aerobnaj aktyŭnaściu. Heta jazda na viełasipiedzie, padymańnie pa leśvicy, tancy, rabota ŭ sadzie, bieh truškom, płavańnie, prahułki pieššu. Usio pieraličanaje dapamahaje kantralavać pavyšany arteryjalny cisk, źjaŭlajecca važnym faktaram dla źnižeńnia vahi i chalesterynu, umacoŭvaje serca i pamianšaje ŭzrovień stresu. Tamu varta staracca mieć jak minimum 150 chvilin umieranaj aerobnaj aktyŭnaści abo 75 chvilin aktyŭnaj u tydzień.

— Jak zrazumieć, što nahruzka nie praźmiernaja?

— Nahruzka ŭmieranaj intensiŭnaści pavialičvaje častatu sardečnych skaračeńniaŭ, supravadžajecca adčuvańniem ciapła i lohkaj zadyški, ale dazvalaje pry hetym kamfortna hutaryć ź inšym čałaviekam. Važna pačynać treniroŭki pastupova i ź nievialikich nahruzak. Pry pačatkovych prykmietach arteryjalnaj hipiertenzii ludziam maładoha ŭzrostu možna dazvolić bieh abo chutkuju chadu.

Pry vykanańni fizičnaj nahruzki ŭzrovień arteryjalnaha cisku moža pavialičvacca, tamu važna kantralavać jaho da pačatku zaniatkaŭ i paśla zakančeńnia. U normie pakazčyki cisku viartajucca da zychodnaha značeńnia ŭ miežach 10 chvilin. Kali hetaha nie adbyvajecca, nieabchodna źmienšyć intensiŭnaść fizičnych praktykavańniaŭ.

— Što rabić, kali pryznačanyja leki nie dapamahajuć?

— Jak praviła, u takoj prablemy jość vytłumačalnyja pryčyny, jakija paddajucca karekcyi. Nievykanańnie rekamiendacyj urača — heta hałoŭny faktar adsutnaści efiektu ad preparataŭ. Kali pravilna pryznačanyja preparaty prymajucca nie ŭ toj čas, nie ŭ tym abjomie i nie tak, jak treba, jany nie pracujuć. Akramia taho, siarod pryčyn — salonaja ježa: vy možacie nie salić ježu zusim, ale ŭžyvać utojenuju sol u padliŭkach, kaŭbasnych vyrabach, paŭfabrykatach i fastfudzie, syry, vypiečcy i chlebie, hatovych stravach na vynas.

Pavialičvacca i trymacca vysoki sistaličny i dyjastaličny cisk moža z-za złoŭžyvańnia kafieinźmiaščalnymi napojami. Taksama, jak z-za ŭžyvańnia ałkaholu — epizadyčnaha abo rehularnaha. Siarod pryčyn, jakija nivielirujuć lačebnaje dziejańnie lekaŭ, — atłuścieńnie abo nabor vahi. Upłyvaje i naš nastroj. Kali pacyjent žyvie ŭ pastajannym stresie, to navat samyja lepšyja tabletki nie pryviaduć da źnižeńnia cisku. Upłyvaje i sindrom abstruktyŭnaha apnoe snu — raspaŭsiudžanaja patałohija, źviazanaja z rezkim pamianšeńniem abo poŭnym prypynkam dychańnia padčas načnoha adpačynku.

Časta da adsutnaści vyniku ŭ lačeńni pryvodzić zamiena preparataŭ u aptecy. U bolšaści vypadkaŭ paśla «rekamiendacyj u aptecy» pacyjenty viartajucca znoŭ da ŭrača.

Akramia taho, sprava moža być u tym, što leki jašče nie pracujuć u «poŭnuju siłu». Treba razumieć, što maksimum dziejańnia niekatorych preparataŭ raźvivajecca nie adrazu, a tolki praz 14— 21‑y dzień pryjomu. Treba prosta pačakać. Zdarajecca, što niapravilna padabrany dozy i kampanienty lačeńnia. Hetaje pytańnie vyrašajecca tolki ŭ kabiniecie ŭrača zamienaj schiemy terapii.

Jość i rezistentnaja arteryjalnaja hipiertenzija, jakaja, niahledziačy na ŭsie sproby daktaroŭ i roznyja padychody, ustojlivaja da lačeńnia. Ale takoje byvaje vielmi redka — mienš, čym u 10% vypadkaŭ.

• 3
• 0
• 0
• 0
• 1
• 0
• 0
• 0