Izrail unios u čorny śpis sotni kryptakašalkoŭ, mierkavana, źviazanych ź iranskimi śpiecsłužbami. Zabłakavanyja $1,5 miljona
Izrailskaje Ministerstva abarony aficyjna pryznała 187 kryptakašalkoŭ majomaściu abo instrumientami finansavańnia Korpusa vartavych iranskaj revalucyi (KVIR). 39 ź ich užo zabłakavanyja razam z $1,5 miljona, jakija na ich zachoŭvalisia.
Ministerstva abarony Izraila na pačatku vieraśnia vypuściła zahad, zhodna ź jakim 187 USDT-kašalkoŭ, pieravažna ŭ sietcy Tron, pryznali źviazanymi z KVIR. Heta praktyčna aryjenciroŭka dla biržaŭ i fintech-pasiarednikaŭ, kab nie pravodzić tranzakcyi z hetymi adrasami i padrychtavać kanfiskacyju srodkaŭ ź ich.
Elliptic paviedamlaje, što praz hetyja 187 adrasoŭ sumarna prajšli kala 1,5 miljona USDT. Razam z tym nie ŭsie tranzakcyi možna adnaznačna prypisać KVIR, bo častka adrasoŭ moža naležać kryptaservisam i być častkaj ich infrastruktury.
U vyniku 39 z hetych kašalkoŭ byli ŭniesieny ŭ čorny śpis i na ich faktyčna zamarozili kala 1,5 miljona USDT, jakija zastavalisia na hetych adrasach. Mahčyma, i niekatoryja inšyja kašalki buduć zamarožanyja nieŭzabavie.
Śpis, kažuć ekśpierty, patrebny najpierš dla manitorynhu i spynieńnia ruchu srodkaŭ, jakija prachodzili praz hetyja kašalki. I heta sihnał finansavym arhanizacyjam pra toje, što Izrail płanuje i nadalej błakavać kryptavalutnyja srodki Irana.
Heta nie pieršaja akcyja Izraila suprać kryptavalutnych aktyvaŭ Irana. U červieni chakierskaja hrupa Predatory Sparrow, mierkavana źviazanaja ź Izrailem, uziała na siabie adkaznaść za ataku na najbujniejšuju iranskuju biržu Nobitex. Jany vyvieli i źniščyli kala $90 miljonaŭ u roznych kryptaaktyvach. Analityki i mižnarodnyja ŚMI adznačali, što Nobitex raniej užyvałasia jak kanał dla apieracyj, źviazanych z KVIR.
A ŭ hetym miesiacy Ministerstva justycyi ZŠA paviedamiła pra kanfiskacyju $585 tysiač u USDT z kryptakašalka iranskaha hramadzianina Machamada Abiedzina. Jaho źviazvajuć z vytvorčaściu navihacyjnych sistem dla prahramy bieśpiłotnikaŭ KVIR, uklučna z «Šachiedami».
Krok Izraila źjaŭlajecca častkaj bolš šyrokaj kaardynavanaj palityki: spałučeńnie administracyjnych čornych śpisaŭ, techničnaj błakiroŭki i hramadzianskich kanfiskacyj u jurysdykcyi ZŠA.
«Naša Niva» — bastyjon biełaruščyny
PADTRYMAĆ
Kamientary