Ślapy davier babrujčanki pryvioŭ da finansavych strat i rasčaravańnia
Žycharka Babrujska zastałasia biez usich svaich źbieražeńniaŭ, jakija zachoŭvała ŭ siabie doma. Situacyja, u jakoj dapamahli razabracca, u tym liku, sudovyja ekśpierty, dla samoj paciarpiełaj mieła prysmak rasčaravańnia, paviedamlaje Dziaržkamitet sudovych ekśpiertyz.
Pavodle słoŭ 46-hadovaj žančyny, jakaja źviarnułasia ŭ milicyju, jana źbirała jak biełaruskija hrošy, tak i valutu (jeŭra, dalary, rasijskija rubli).
Hrošy trymała zachoŭvała ŭ kašalku ŭ šafie, adnak u niejki momant ubačyła, što tam zastałasia tolki drobiaź. Ahułam prapała bolš za 7 tysiač rubloŭ u ekvivalencie.
U chodzie ahladu kvatery na dźviercy šafy, adkul byli vykradzieny hrošy, ekśpiert-kryminalist vyniaŭ ślady ruk — pry praviercy pa daktaŭliku Dziaržaŭnaha kamiteta sudovych ekśpiertyz ustanoŭlena ich supadzieńnie z adbitkami sužyciela paciarpiełaj.
Mužčynu zatrymali, jon pryznaŭsia ŭ kradziažy i patłumačyŭ, što častku sumy paśpieŭ patracić na pajezdku ŭ Minsk.
Čarhovy prysud u dačynieńni da 37-hadovaha babrujčanina niadaŭna ahučyŭ sud. Jamu dali dva hady kałonii va ŭmovach strohaha režymu, a taksama prymienieny prymusovyja miery biaśpieki i lačeńnia ad chraničnaha ałkahalizmu. U adpaviednaści z Zakonam ab amnistyi mužčyna častkova vyzvaleny ad pakarańnia na 1 hod.
Kamientary