Premjerka Litvy: My nie pojdziem na źmiakčeńnie sankcyj suprać Biełarusi, navat kali na nas buduć cisnuć
Premjer-ministarka Litvy Inha Ruhinienie zajaviła, što Vilnia nie pojdzie na źmiakčeńnie sankcyj suprać Biełarusi, navat kali z boku ZŠA abo inšych partnioraŭ budzie sproba cisku. Asabliva heta tyčycca adnaŭleńnia tranzitu biełaruskich kalijnych uhnajeńniaŭ praz Kłajpiedski port, jaki byŭ spynieny jašče ŭ lutym 2022 hoda.
«Kali my nie pojdziem dalej i nie budziem cisnuć sankcyjami i ćviordym padychodam da ahresara, budzie kiepska. Mahčyma, ZŠA buduć na nas cisnuć, ale, dumaju, my tut budziem niepachisnyja», — adznačyła Ruhinienie ŭ intervju ahienctvu BNS.
Jaje słovy prahučali paśla taho, jak u Minsku vyzvalili 52 palitviaźniaŭ, a ZŠA amal adrazu abviaścili pra źniaćcie sankcyj z avijakampanii «Biełavija». Heta vyklikała dyskusii, ci moža Vašynhton patrabavać ad Litvy bolš hnutkaj pazicyi, u tym liku pa tranzicie pradukcyi «Biełaruśkalija».
Ruhinienie padkreśliła, što jana vystupaje za jašče bolš žorstkija sankcyi ŭ dačynieńni i da Biełarusi, i da Rasii. Jana vykazała nadzieju, što dypłamatyčny korpus Litvy zmoža pierakanać partnioraŭ u nieabchodnaści nie tolki zachavańnia, ale i ŭzmacnieńnia abmiežavańniaŭ.
U toj ža čas, adkazvajučy na pytańnie žurnalistaŭ, jana dapuściła, što tema sankcyj tearetyčna moža ŭźniknuć u dyskusijach adnosna dalejšaha znachodžańnia amierykanskich vojskaŭ u Litvie abo navat adnosna pavieličeńnia ich kantynhientu.
Ministr zamiežnych spraŭ Litvy Kiastucis Budrys raniej zajaviŭ, što nijakich pieramoŭ pra pierahlad sankcyj u dačynieńni da Biełarusi nie viadziecca, i padkreśliŭ: navat niahledziačy na vyzvaleńnie šerahu palitviaźniaŭ, abmiežavańni ES i nacyjanalnyja sankcyi Litvy ŭ dačynieńni da režymu Łukašenki zastajucca ŭ sile.
Naŭsieda paviedamiŭ, ci varta čakać admieny sankcyj ES śledam za amierykanskimi
Litva sankcyj ź Biełarusi nie zdymie, pakul nie buduć likvidavanyja pryčyny
U Litvie zakryvać punkty propusku na miažy ź Biełaruśsiu nie płanujuć
Litva ŭzmocnić achovu miažy ź Biełaruśsiu i Rasijaj na čas vučeńniaŭ
Poŭny śpis 52 vyzvalenych palitviaźniaŭ
Ciapier čytajuć
Zakinutuju siadzibu Bahdanovičaŭ pierarobiać u bucikovy hatel FOTY7
Kamientary