Vučonyja: 75% vypadkaŭ raku straŭnika možna praduchilić z dapamohaj prostaha lekavańnia

Choć rak straŭnika histaryčna ličyŭsia chvarobaj ludziej starejšych, apošnija hady jon usio čaściej sustrakajecca siarod asob, maładziejšych za 50 hadoŭ.

Jak piša New Atlas, madel, jakuju raspracavali navukoŭcy Mižnarodnaha ahienctva pa daśledavańni raku (IARC), pakazała, što ŭ ludziej, narodžanych u pieryjad z 2008 pa 2017 hod, u budučyni pry zachavańni isnujučych stratehij prafiłaktyki i lekavańnia moža być zafiksavana 15,6 miljona vypadkaŭ hetaha zachvorvańnia. U płanie rehijanalnaha ciažaru, najbolšaja kolkaść vypadkaŭ prahnazujecca ŭ Azii — 10,6 miljona vypadkaŭ, zatym u Amierycy (2 miljony) i Afrycy (1,7 miljona vypadkaŭ).

Nacyjanalnyja pakazčyki zachvaralnaści pa ŭzrostavych hrupach byli ŭziaty z bazy danych GLOBOCAN 2022, a prahnozy śmiarotnaści — ad AAN. Madel aceńvała, kolki ludziej zachvarejuć na rak na praciahu žyćcia, uličvajučy častatu zachvorvańnia ŭ roznych uzrostach, imaviernaść śmierci da raźvićcia raku i demahrafičnyja tendencyi, takija, jak rost nasielnictva i stareńnie.

Adpaviedna prahnozu, 76% usich budučych vypadkaŭ zachvorvańnia buduć źviazanyja z raspaŭsiudžanaj bakteryjalnaj infiekcyjaj Helicobacter pylori. Adnak, što važna, hetu ryzyku možna praduchilić: infiekcyja paddajecca lekavańniu z dapamohaj kambinacyi antybijotykaŭ i inhibitaraŭ pratonnaj pompy, jakija źnižajuć kisłotnaść straŭnika.

Pavodle aŭtaraŭ daśledavańnia, skryninh i lačeńnie chielikabaktera z 100% efiektyŭnaściu moža skaracić kolkaść vypadkaŭ na 75%. Navat prahramy z efiektyŭnaściu ŭ 80—90% praduchilili b ad 60% da 68% vypadkaŭ raku straŭnika.

Vučonyja adznačajuć, što takija stratehii źjaŭlajucca ekanamična efiektyŭnymi navat u krainach ź nizkim dachodam, i paraŭnalnyja z vakcynacyjaj suprać virusa papiłomy čałavieka abo hiepatytu B.

Adnak daśledavańnie maje svaje abmiežavańni. U mnohich krainach ź nizkim dachodam, asabliva ŭ Afrycy, niama dakładnych rehistraŭ raku, što moža pryvieści da niedaacenki prablemy. Akramia taho, madel hruntavałasia na dapuščeńni, što pakazčyki zachvorvańnia i ŭzroŭni infiekcyi H. pylori zastanucca niaźmiennymi.

Niahledziačy na hetyja abmiežavańni, daśledavańnie pasyłaje vyrazny sihnał: rak straŭnika zastajecca značnaj hłabalnaj pahrozaj dla zdaroŭja, asabliva dla sučasnaj moładzi. Adnak ukaranieńnie masavych prahram skryninhu i lačeńnia H. pylori moža vyratavać miljony žyćciaŭ.

Poŭny tekst daśledavańnia apublikavany ŭ časopisie Nature Medicine.

• 8
• 0
• 0
• 0
• 0
• 0
• 0
• 0