«Niervovaje, tryvožnaje, niepalityčnaje. Hałoŭny hieroj — člen Savieta Respubliki». Volha Łojka prapanuje «Biełaruśfilmu» ideju kino
U novym vypusku analityčnaha TOKu ekanamičnaja ahladalnica Volha Łojka prapanavała «Biełaruśfilmu» ideju novaha filma, jaki, na jaje dumku, pavinien siabie akupić.
Padčas niadaŭniaha naviedvańnia Nacyjanalnaj kinastudyi «Biełaruśfilm» Łukašenka aburaŭsia, što za apošni čas nie było hučnych ajčynnych kinapremjer, a kiraŭnik jaho administracyi Dźmitryj Kruty nazvaŭ ličbu akupnaści ŭ 3%. Na ekrany vypuskajucca filmy ideałahičnaha źmiestu, na jakija nichto nie choča chadzić, a film «Kupała» tak i nie vyjšaŭ u prakat.
Volha Łojka prapanoŭvaje: «Kali nie atrymlivajecca z bujnymi farmatami, (…) davajcie pasprabujem u inšych žanrach». Siarod ich jana nazyvaje kamiedyju i ramantyčnuju mieładramu.
Ekanamičnaja ahladalnica prapanuje siužet novaha filma, jaki, na jaje dumku, zmoža być pradadzieny na Zachad, kab siabie akupić:
«2020 hod, ramantyčnaja mieładrama budzie ŭ nas. Hałoŭny hieroj budzie samavity, stanoŭčy, bieź vialikaha entuzijazmu, žanaty, člen Savieta Respubliki. U jaho budzie siabroŭka, znajomaja, susiedka, maładaja, nie ajcišnik (bo ajcišnik nie patrabuje vidavočnaha baćkoŭskaha kłopatu).
Chaj budzie doktar — cudoŭnaja humannaja prafiesija. Tryvožny 2020 hod, usio fonam. Niedzie niechta chodzić, chvalujecca, viartajecca ci nie viartajecca ź niejkich pachodaŭ pa horadzie, vyklučaje telefon, nie vychodzić na suviaź.
Adnosiny ŭsio mienš nahadvajuć susiedskija, baćkoŭskija. Tryvožnyja takija ramantyčnyja adnosiny. A potym pačynajucca represii, cisk, i pa niejkich pryčynach naš prystojny siemjanin sprabuje vyratavać svaju simpatyju i asabista sadžaje jaje na aŭtobus, naprykład, Maskva — Uładzikaŭkaz z nastupnym vyjezdam u Hruziju. (…)
Jana zastaniecca na Zachadzie, vyjdzie zamuž za ajcišnika bieź vialikaha entuzijazmu. Aboje buduć uspaminać ź lohkaj nudoj… Ale pakolki jon jašče nie stary, a jana naohuł maładaja, napeŭna, jany jašče ŭbačacca».
Pa słovach Łojki, heta budzie kino «pra kachańnie, pra adnosiny, pra tryvohu, pra niešta ćmianaje, što adbyvajecca», jakoje niepasredna nie źviazana z pratestami.
«Pahladziać «biehłyja», pahladziać unutry krainy. Členy Savieta Respubliki pahladziać asabliva pilna: «Chto heta z našych naprakudziŭ», — dadaje ekanamičnaja ahladalnica.
Ale joj chaciełasia b, kab heta była «ahulnaja tryvoha na fonie niejkich hramadska-palityčnych padziej», jakim nie budzie davacca acenka.
Łojka ŭpeŭniena, što takoje kino «napeŭna b, Łukašenku nie spadabałasia», adnak «historyja jość», bo «jość kuča maładych daktaroŭ, ajcišnikaŭ, biblijatekaraŭ, nastaŭnikaŭ, jakija źjechali z krainy. Jość kuča starejšych ludziej, jakija zastalisia ŭnutry krainy, jakija chvalujucca za svaich dziaciej, plamieńnikaŭ, susiedziaŭ, dziaciej, siabroŭ, svaich dziaŭčat budučych, ciapierašnich maładych ludziej i hetak dalej».
«Niachaj heta budzie takoje niervovaje, tryvožnaje, niepalityčnaje», — davodzić Łojka. Heta dazvolić, pa jaje słovach, skončyć vytvorčaść i vypuścić film u prakat.
«Dla Zachadu [film] budzie sprobaj asensavańnia. 2020 hod — heta papularna, modna i hetak dalej», — upeŭniena ekanamičnaja ahladalnica.
Adnak dla taho, kab źniać taki film, zaŭvažaje Łojka, patrebny nie tyja režysiory, jakija buduć zdymać film «Kłasnaja», što vyjdzie ŭ vieraśni ŭ prakat.
Kamientary
Niešta "ahulnačałaviečaje".
Pachvalna.
Ale padumajcie, ci mahčyma było b takoje savieckaje kino ŭ časy 1960-70-ch? Nie, chacia tady było značna lepš z punktu hledžańnia represij i ŭznaŭlałasia razumieńnie tych "ahulnačałaviečych" kaštoŭnaściej.
I tady, i zaraz siužety z zamiežnikami nie mohuć być niepalityčnymi. Dla ludziej sistemy z trajbalizmam u hałovach (miaža pamiž "svaimi" i "čužymi") usie źjechaŭšyja ("biehłyja") - zdradniki, vorahi.