«Uratavali zatory». Studentka spaźniłasia na fatalny rejs Air India usiaho na 10 chvilin, i jaje nie puścili na bort
Bchumi Čauchan pamiataje, jakaja była złaja i rasčaravanaja. Z-za zatoraŭ na darohach jaje pajezdka da aeraporta Achmiedabada zaciahnułasia nastolki, što jana spaźniłasia na svoj rejs Air India da łondanskaha Hetvika ŭsiaho na 10 chvilin, piša Bi-bi-si.
Čauchan, studentka pa biznes-administravańni, jakaja žyvie ŭ Brystali sa svaim mužam, pryjechała ŭ adpačynak na zachad Indyi.
28-hadovaja dziaŭčyna pavinna była lacieć dadomu rejsam AI171 u čaćvier, jaki paciarpieŭ krušeńnie nieŭzabavie paśla ŭźlotu, zabraŭšy žyćci 241 čałavieka na borcie i jašče niekalkich na ziamli.
Ale kali jana prybyła ŭ aeraport mienš čym za hadzinu da vyletu, supracoŭniki avijakampanii nie puścili jaje na rejs.
«My vielmi razzłavalisia na kiroŭcu i ŭ rospačy pakinuli aeraport, — uspaminaje jana. — Ja była vielmi rasčaravanaja».
«My vyjšli z aeraporta i spynilisia papić harbaty, a potym, pierad adjezdam… razmaŭlali z turahientam pra toje, jak atrymać kampiensacyju za kvitok. Tam ja i atrymała zvanok, što samalot raźbiŭsia», — dadaje Čauchan.
«Heta sapraŭdny cud dla mianie», — kaža jana.
Čauchan raskazvaje, što prybyła ŭ aeraport a 12:20 pa miascovym časie — na 10 chvilin paźniej, čym pavinna była adbycca pasadka.
Jaje elektronny pasadačny tałon, jaki bačyła BBC News, śviedčyć, što ŭ jaje było miesca 36G u ekanom-kłasie.
Adnak, niahledziačy na anłajn-rehistracyju, pa jaje słovach, supracoŭniki avijakampanii nie dazvolili joj zaviaršyć praces u aeraporcie.
Jana jechała z horada Anklešvar — za 201 km na poŭdzień ad Achmiedabada — i zatrymałasia z-za zatoraŭ u centry Achmiedabada.
«Kali ja prapuściła rejs, była pryhniečanaja. Adna dumka kruciłasia ŭ hałavie: «Kab ja vyjechała krychu raniej, to paśpieła b na samalot», — raspaviadaje Čauchan.
«Ja prasiła supracoŭnikaŭ avijakampanii ŭpuścić mianie, bo ja spaźniłasia ŭsiaho na 10 chvilin. Kazała, što ja apošniaja pasažyrka i vielmi prašu dazvolić mnie sieści na samalot, ale jany nie dazvolili», — dadaje jana.
Rejs da Hetvika vylecieŭ u čaćvier udzień pavodle raskładu, ale, jak vyhladaje, mieŭ prablemy z naboram vyšyni i raźbiŭsia prykładna praz 30 siekund paśla ŭźlotu.
Samalot upaŭ na žyły rajon, zahinuli 241 čałaviek na borcie. Pavodle papiarednich danych, taksama zahinuli prynamsi vaśmiora čałaviek na ziamli.
Adzin z pasažyraŭ, hramadzianin Vialikabrytanii Višvaškumar Ramieš, vyžyŭ u katastrofie i byŭ špitalizavany z traŭmami.
Na borcie byli hramadzianie Indyi, Vialikabrytanii, Partuhalii i Kanady.
Kamientary