U Jeŭrasajuzie prapanujuć źnizić vierchniuju miažu cany na naftu z $60 da $45 za barel, što źjaŭlajecca častkaj novaha 18-ha pakieta sankcyj suprać Rasii. Pra heta zajaviła kiraŭnica Jeŭrapiejskaj kamisii Ursuła fon der Lajen.
Pavodle słoŭ jeŭračynoŭnicy, heta rašeńnie źjaŭlajecca krokam u baraćbie z rasijskim ekanamičnym upłyvam, pakolki ekspart nafty da hetaha času składaje kala traciny dziaržaŭnych dachodaŭ Rasii.
Z momantu ŭviadzieńnia vierchniaj miažy cany na naftu ŭ 2023 hodzie ceny na čornaje zołata źnizilisia i ciapier nafta pradajecca vielmi blizka da ŭzroŭniu hetaha abmiežavańnia.
«Źnižajučy vierchniuju miažu, my adaptujemsia da novych rynkavych umoŭ i adnaŭlajem efiektyŭnaść hetaj miery», — adznačyła Ursuła fon der Lajen.
Jana zajaviła, što hety krok źjaŭlajecca častkaj kaalicyjnych dziejańniaŭ «Vialikaj siamiorki» dla skaračeńnia finansavych mahčymaściaŭ Rasii. Na samicie G7, jaki adbudziecca ŭ Kanadzie ŭ kancy červienia 2025 hoda, buduć abmiarkoŭvacca dalejšyja miery pa ŭzmacnieńni strohaści sankcyj.
Jeŭrakamisija taksama pradstaviła 18-y pakiet sankcyj, jaki ŭklučaje zabarony i kantrol na ekspart u Rasiju, a taksama ŭzmacnieńnie mier suprać abychodu sankcyj. Adnym z asnoŭnych elemientaŭ źjaŭlajecca zabarona na tranzakcyi, źviazanyja z trubapravodami «Paŭnočny patok 1» i «Paŭnočny patok 2».
«Heta aznačaje, što nivodzin apieratar ES nie zmoža niepasredna ci ŭskosna ŭdzielničać u jakoj-niebudź tranzakcyi pa trubapravodach «Paŭnočny patok». Viartańnia da minułaha niama», — skazała kiraŭnica Jeŭrakamisii.
Ursuła fon der Lajen dadała, što dla lepšaha zabieśpiačeńnia vykanańnia abmiežavańniaŭ, akramia 342 sudoŭ, jakija ŭžo byli pad sankcyjami, ES dadaje jašče 77 sudoŭ, jakija źjaŭlajucca častkaj rasijskaha cieniavoha fłotu.
«Narešcie, my ŭvodzim zabaronu na impart praduktaŭ pierapracoŭki nafty na asnovie rasijskaj syroj nafty. Takim čynam, my chočam praduchilić traplańnie častki rasijskaj syroj nafty na rynak ES praz čorny chod», — kaža staršynia Jeŭrakamisii.
U śniežni 2022 hoda krainy «Vialikaj siamiorki» ŭzhadnili abmiežavańnie koštu nafty, zabaraniŭšy handal rasijskaj naftaj, jakaja transpartujecca tankierami, kali cana za jaje pieravyšaje 60 dalaraŭ za barel. Taksama tam zabaranili sudnachodnym, strachavym i pierastrachovačnym kampanijam apracoŭvać hruzy z rasijskaj naftaj pa ŭsim śviecie, kali tolki jana nie pradajecca pa canie nižej za hraničnuju canu.
Rasija abychodziła vierchniuju miažu cany G7 z dapamohaj «cieniavoha fłotu» tankieraŭ, jakija nie atrymlivali strachoŭki ad zachodnich kampanij, i rasijskaja nafta marki Urals značnuju častku času pradavałasia vyšej za vierchniuju miažu cany. Ale ŭ pačatku krasavika cana ŭpała nižej za 60 dalaraŭ, pakolki hłabalnaja zakłapočanaść ekanamičnym rostam u suviazi z zajavami ZŠA ab hłabalnych taryfach taksama paŭpłyvała na ceny na naftu.
Ciapier čytajuć
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła20
Kamientary