Kachańnie, zdrada i miadovy miesiac. Žančynu ŭ Indyi aryštavali za zabojstva muža adrazu paśla viasiella

Palicyja Indyi zajaviła, što žančyna, jakaja źnikła paśla taho, jak jaje muža žorstka zabili padčas ichniaha miadovaha miesiaca, znachodzicca pad vartaj — jana dobraachvotna zdałasia palicyi, piša Bi-bi-si.

Spačatku siemji pary śćviardžali, što niaviestu taksama abo zabili, abo vykrali, i pačali maštabnuju kampaniju pa jaje pošuku.

Ciapier ža palicyja zajaŭlaje, što 25-hadovaja Soniem Rahchuvanšy najmała zabojcaŭ, kab pazbavić žyćcia svajho 30-hadovaha muža Radžu padčas ichniaj pajezdki ŭ maleńki paŭnočna-ŭschodni štat Miehchałaja. Čatyroch mužčyn taksama aryštavali.

Baćka Soniem, Devi Sinhch, abaraniaje dačku. Pavodle jaho słoŭ, «jana nie vinavataja i nie mahła hetaha zrabić».

Maładyja z horada Indor u centralnym štacie Madchja-Pradeš abrali Miehchałaju dla svajho miadovaha miesiaca, bo jany čuli, što tam «vielmi pryhožyja daliny», raspavioŭ brat Radžy Bi-bi-si na vychodnych pierad aryštam Soniem.

Para ažaniłasia 11 maja ŭ Indory, šlub dabrasłavili abiedźvie siamji.

«Ich šlub byŭ arhanizavany čatyry miesiacy tamu, i jany abodva byli ščaślivyja, pamiž imi nie było svarak ni da, ni paśla viasiella», — skazaŭ brat Radžy.

Para vypraviłasia ŭ Miehchałaju 20 maja. Ale praz čatyry dni paśla pačatku pajezdki jany źnikli.

Palicyja i kamandy pa likvidacyi nastupstvaŭ stychijnych biedstvaŭ u supravadžeńni miascovych žycharoŭ šukali paru.

Na videa ź miesca padziej možna było ŭbačyć ratavalnikaŭ, jakija spuskalisia pa schiłach i skałach u dalinach, pakrytych tumanam.

Ułady paviedamili, što doždž i drennaja bačnaść pieraškadžali pošukavym apieracyjam.

Praz tydzień cieła Radžy, jakoje pačało raskładacca, znajšli ŭ ciaśninie ź pierarezanym horłam, pry hetym jaho kašalok, załaty piarścionak i łancužok źnikli. Soniem źnikła bieź viestak.

Ich siemji razharnuli maštabnuju kampaniju, abvinavačvajučy palicyju Miehchałai ŭ niedastatkovaj pracy pa raskryćci zabojstva Radžy i pošuku Soniem — abvinavačańni, jakija admaŭlaŭ hałoŭny ministr štata.

Siemji pary patrabavali pieradać spravu fiederalnaj palicyi dla naležnaha rasśledavańnia i sustrakalisia z upłyvovymi lidarami kast i fiederalnymi ministrami ŭ svaim rodnym štacie, kab heta prasunuć.

Minułaj piatnicy jany taksama napisali list premjer-ministru Narendry Modzi z prośbaj pra spraviadlivaść dla Radžy i pošuk Soniem.

Ale ŭ paniadziełak ranicaj hienieralny dyrektar palicyi Miehchałai Idašyša Nonhranh zajaviŭ, što Soniem zdałasia ŭ adzin z adździełaŭ palicyi rajona Hazipur u štacie Utar-Pradeš.

Troch inšych padazravanych, taksama z rodnaha štata pary Madchja-Pradeš, aryštavali padčas načnych rejdaŭ, paviedamiŭ Nonhranh.

«Adnaho čałavieka zatrymali va Utar-Pradešy, a jašče dvuch abvinavačanych — u Indory. Soniem zdałasia ŭ adździele palicyi Nandhanž i była paźniej aryštavanaja», — paviedamiŭ jon.

Paźniej, vystupajučy na pres-kanfierencyi, načalnik palicyi Viviek Sijem paviedamiŭ, što čaćviortaha mužčynu aryštavali ŭ Miehchałai ŭ paniadziełak ranicaj u suviazi sa spravaj.

Jon nie nazvaŭ matyŭ zabojstva Radžy, ale acharaktaryzavaŭ Soniem jak «hałoŭnuju padazravanuju».

U adkaz na pytańnie žurnalista pra toje, «ci była Soniem u pazašlubnych adnosinach z adnym z zatrymanych mužčyn», spadar Sijem skazaŭ: «kali złučyć fakty, to heta tak i vyhladaje». Ale dadaŭ, što hetyja detali možna budzie pravieryć tolki paśla dopytu abodvuch.

Baćka Soniem, Devi Sinhch, raspavioŭ ahienctvu ANI, što jaho dačka minułaj nočču dajšła da «prydarožnaha kafe ŭ Hazipury, dzie pazyčyła mabilny telefon i patelefanavała bratu, jaki potym vyklikaŭ palicyju».

Sinhch dadaŭ, što nie zmoh pahavaryć z dačkoj, ale vieryć, što joj «niejak udałosia ŭciačy ad svaich vykradalnikaŭ» i nastojvaje na jaje nievinavataści.

Jon taksama abvinavaciŭ palicyju Miehchałai ŭ «vydumkach» i źviarnuŭsia da ministra ŭnutranych spraŭ Amita Šach z prośbaj raspačać fiederalnaje rasśledavańnie dla ŭstalavańnia praŭdy.

Brat Radžy, Vipin Rahchuvanšy, spačatku skazaŭ žurnalistam, što «nie pavieryć va ŭdzieł Soniem u zabojstvie, pakul jana sama nie pryznajecca».

Ale paźniej jon dadaŭ, što adzin z zatrymanych mužčyn, nazvany palicyjaj, pracavaŭ u ofisie Soniem.

«Tolki Soniem moža prajaśnić heta, — skazaŭ jon. — Kali jana vinavataja, jaje treba pakarać».

Rahchuvanšy, jaki nieadnarazova krytykavaŭ palicyju i ŭrad Miehchałai za niedastatkovuju pracu pa raskryćci spravy, taksama skazaŭ: «Ciapier ja vieru, što ŭrad Miehchałai nie chłusiŭ. Jany kazali praŭdu».

U paniadziełak ranicaj, paśla taho jak navina źjaviłasia ŭ ŚMI, hałoŭny ministr Miehchałai Konrad Sanhma pachvaliŭ palicyju štata, adznačyŭšy, što jany dasiahnuli «važnaha praryvu» za siem dzion.

Inšy ministr, Aleksander Łału Hiek, zajaviŭ, što palicyja, urad i navat zvyčajnyja ludzi štata padviarhalisia niespraviadlivym abvinavačvańniam padčas pošukaŭ.

«Praŭda raskryłasia», — skazaŭ jon.

• 0
• 1
• 2
• 2
• 0
• 0
• 0
• 0