U Vjetnamie karalevu pryhažości aryštavali za padman z cukierkami
Vjetnamskija papularnuju madel i papularnaha błohiera sudziać za machlarstva.
Jašče niadaŭna 27-hadovaja Nhujen Tchuk Tchuj Ćjen (Nguyen Thuc Thuy Tien), pieramožca konkursu pryhažości «Miss Grand International 2021» u Banhkoku i zorka sacsietak, była vielmi zapatrabavanaja siarod vjetnamskich brendaŭ.
Dziaŭčyna ŭdzielničała ŭ niekalkich realici-šou i atrymała hanarovyja hramaty ad premjer-ministra i kirujučaj Kamunistyčnaj partyi Vjetnama. Ciapier jana apynułasia ŭ centry hučnaha skandału.
Nhujen Tchuk razam ź inšymi błohierami — Fam Kuanh Liniem (Pham Quang Linh) i Chanh Zu Muk (Hang Du Muc) praz svaje sacyjalnyja sietki prasoŭvała žavalnyja cukierki pad nazvaj Kera Supergreens Gummies, stvoranyja ŭ miežach supolnaha prajekta. Rekłama abviaščała, što kožnaja cukierka źmiaščaje kolkaść klatčatki, roŭnuju porcyi harodniny.
Jak paviedamlaje BBC, skandał razhareŭsia paśla taho, jak adzin z kupcoŭ dasłaŭ pradukt na łabaratornaje daśledavańnie. Analiz pakazaŭ, što ŭ kožnaj cukiercy źmiaščajecca ŭsiaho 16 milihram klatčatki, a nie 200 milihram, jak zajaŭlali vytvorcy.
Zatym ułady pačali ŭłasnaje rasśledavańnie, padčas jakoha było ŭstanoŭlena, što pry vytvorčaści žavalnych cukierak vykarystoŭvalisia niajakasnyja inhredyjenty ź nizkim utrymańniem klatčatki.
Upakoŭka praduktu nie źmiaščała infarmacyi pra jaho skład, što dało mahčymaść vytvorcam schavać nie tolki nizkaje ŭtrymańnie klatčatki, ale i vysoki ŭzrovień sarbitu — rečyva, jakoje vykarystoŭvajecca ŭ słabicielnych srodkach.
U sakaviku Nhujen, Fam i Chanh byli aštrafavanyja i prynieśli publičnyja prabačeńni. Ale ŭłady nie pakinuli na hetym spravu — u krasaviku byli aryštavany Fam Kuanh Liń i Chanh Zu Muk a taksama šerah adkaznych supracoŭnikaŭ, źviazanych z vytvorčaściu i prodažam falsifikavanaj pradukcyi.
Im byli vystaŭlenyja abvinavačańni ŭ vytvorčaści padroblenaj pradukcyi i padmanie spažyŭcoŭ. U paniadziełak stała viadoma ab zatrymańni Nhujen Tchuk Tchuj Ćjen pa anałahičnych abvinavačańniach u machlarstvie. U jaje doma byŭ praviali pieratrus.
Vjetnamskija ŚMI paviedamlajuć, što da spynieńnia prodažu z-za skandału pradali bolš za 135 tysiač upakovak cukierak.
Ciapier čytajuć
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»1
Kamientary