U Minsku raskazali, jakoj budzie byłaja Vaładarka paśla rekanstrukcyi FOTY
U Minsku raspačali maštabnuju rekanstrukcyju Piščałaŭskaha zamka na vulicy Vaładarskaha — byłoha SIZA № 1 (u narodzie «Vaładarka»). Prajekt prymierkavany da 200‑hodździa budynka, jakoje adznačyli ŭ 2025 hodzie. Hałoŭnaja meta — uklučyć terytoryju zamka ŭ ahulnuju haradskuju prastoru i zrabić jaje častkaj turystyčnaha maršrutu pa centry stalicy, raskazaŭ ahienctvu «Minsk-Naviny» navukovy kiraŭnik prajekta Alaksandr Vaškievič.
Histaryčny kompleks uklučaje sam zamak, uvachodnuju hrupu, adnapaviarchovyja i dvuchpaviarchovyja budynki, a taksama haspadarčyja pabudovy. Raniej uvieś učastak byŭ abniesieny murami, ale jany nie zachavalisia, jak i adna ź viežaŭ, što abvaliłasia ŭ 2008 hodzie.
Paśla rekanstrukcyi tut maje źjavicca šmatfunkcyjanalny kompleks. Zachavajuć čatyry histaryčna kaštoŭnyja budynki: sam zamak, uvachodnuju hrupu, adnapaviarchovy dom i byłuju stajniu. Paźniejšyja pabudovy i stary płot, jakija nie majuć histaryčnaj vartaści, źnieśli. Heta dazvolić zrabić prastoru bolš adkrytaj. Na terytoryi płanujuć stvaryć placoŭku dla masavych mierapryjemstvaŭ z mabilnaj scenaj, zonu dla prahułak i parkoŭku.
Prajekt praduhledžvaje adnaŭleńnie abrynutaj ściany i adnoj ź viežaŭ. Buduć adnoŭlenyja histaryčnyja pamiery i vyhlad akonnych i dźviarnych prajomaŭ, bo častku ź ich źmianili ŭ roznyja pieryjady. Unutry zachavajuć staradaŭnija sklapieńni i adrestaŭrujuć centralnuju mietaličnuju leśvicu, a taksama vintavuju leśvicu ŭ viežy. Płanujecca častkova źmianić unutranuju płaniroŭku, prybraŭšy savieckija pieraharodki, kab viarnuć budynku jaho pieršapačatkovuju prastoru.
Na cokalnym i pieršym pavierchach raźmieściacca ŭstanovy hramadskaha charčavańnia. U byłoj stajni taksama adkryjecca jašče adzin abjekt charčavańnia, a ŭ dvuchpaviarchovym budynku pablizu płanujuć raźmiaścić administracyjnyja pamiaškańni i, mahčyma, kłub histaryčnaj rekanstrukcyi.
Padradčyki ŭžo praviali supraćavaryjnyja raboty, umacavali kanstrukcyi i zaviaršyli demantaž paźniejšych pabudoŭ. Ciapier idzie razbor starych inžyniernych sietak. Prajektavańnie dvuch z čatyroch budynkaŭ amal zavieršana, a poŭny pakiet dakumientacyi płanujuć padrychtavać u pieršaj pałovie 2026 hoda. Paśla hetaha pačnucca asnoŭnyja budaŭničyja raboty.
Źjavilisia anturažnyja FOTY, jak vyhladaje byłaja Vaładarka nie tolki zvonku, ale i znutry
Tak ciapier vyhladaje byłaja Vaładarka, pastaŭlenaja na rekanstrukcyju FOTAFAKT
U Minsku znosiać budynki kala Vaładarki
Da asnoŭnaha etapu rekanstrukcyi byłoj Vaładarki prystupiać u nastupnym hodzie, pačaŭsia demantaž niekatorych elemientaŭ
Ciapier čytajuć
Kolki biełarusaŭ atrymali polskaje hramadzianstva za apošni čas. Ličby ŭražvajuć13
Kamientary