Prezident Francyi Emanuel Makron zajaviŭ pra pačatak etapu «prasunutaha jadziernaha strymlivańnia» i pra namier uzmacnić jadzierny arsienał krainy na fonie rostu hłabalnych ryzyk i pahroz mahčymaj eskałacyi kanfliktaŭ, piša The Moscow Times.
Vystupajučy na bazie padvodnych łodak u Bretani, francuzski lidar adznačyŭ, što ŭ sučasnych umovach hieapalityčnych uzrušeńniaŭ Francyja pavinna zastavacca mocnaj. Pavodle jaho słoŭ, kab krainu pavažali i ličyli biaśpiečnaj, jana pavinna mieć mahutny abarončy patencyjał. Makron paviedamiŭ, što addaŭ zahad pavialičyć kolkaść jadziernych bojehałovak.
Taksama Francyja bolš nie budzie publična raskryvać danyja pra pamier svajho jadziernaha arsienału. Paryž pakidaje za saboj prava vykarystoŭvać jadziernyja siły dla abarony žyćciovych intaresaŭ dziaržavy i płanuje zapuścić prahramu raspracoŭki novych hipierhukavych rakiet.
Pavodle mižnarodnych acenak, ciapier u Francyi kala 290 jadziernych bojehałovak. Kraina zastajecca adzinaj u Jeŭrapiejskim sajuzie z całkam niezaležnym jadziernym arsienałam. Brytanskaja jadziernaja prahrama zaležyć ad padtrymki ZŠA.
Novaja jadziernaja daktryna Francyi praduhledžvaje pašyreńnie supracoŭnictva ź jeŭrapiejskimi partniorami. Užo sioleta Hiermanija dałučycca da sumiesnych vučeńniaŭ i pačnie naviedvańnie francuzskich jadziernych abjektaŭ. Da inicyjatyvy taksama płanujuć dałučycca šerah krain Jeŭropy.
Vosiem jeŭrapiejskich krain «pahadzilisia» pryniać udzieł u «pašyranym strymlivańni», prapanavanym Francyjaj: Vialikabrytanija, Hiermanija, Polšča, Niderłandy, Bielhija, Hrecyja, Šviecyja i Danija, adznačyŭ Emanuel Makron.
Makron abviaściŭ, što Francyja zmoža padać jeŭrapiejskim sajuźnikam stratehičnyja resursy, źviazanyja ź jadziernym strymlivańniem, dla «razhortvańnia pa abstavinach».
«Supracoŭnictva pačniecca z sumiesnych vučeńniaŭ», — patłumačyŭ Makron.
Kiraŭnictva Hiermanii ciapier viadzie pieramovy z Paryžam pra mahčymaść pašyreńnia francuzskaha «jadziernaha parasona» na krainy ES. Pytańni jadziernaj abarony abmiarkoŭvajucca i ŭ inšych dziaržavach Jeŭropy.
Ciapier čytajuć
«U mianie na stale piać hadoŭ lažała papiera ź pieradačaj prava apieki nad synam». Volha Sieviaryniec — pra hady strachu, antydepresanty i nadzieju1212
Kamientary