Jak vypadkovaje znajomstva ŭ hiej-kłubie skončyłasia hučnym zabojstvam. Novyja detali pa spravie biełarusa, jaki 25 hadoŭ tamu zarezaŭ pradziusara ŭ Maskvie
Prakuratura raskazała novyja padrabiaznaści hučnaj spravy pra zabojstva pradziusara STS u 1999 hodzie i asobu biełarusa, jaki jaho zarezaŭ i jakoha znajšli tolki praz čverć stahodździa.
27 vieraśnia 1999 hoda hienieralny pradziusar STS i hramadzianin Vialikabrytanii Krystafier Rys nie vyjšaŭ da svajho kiroŭcy z kvatery na Ćviarskoj u Maskvie, kab jechać na pracu. Supracoŭniki telekanała zajšli ŭ kvateru i ŭbačyli na łožku źniaviečanaje cieła 37-hadovaha mužčyny.
Chto zabojca
Tolki praz 24 hady śledčyja zmahli ŭstanavić asobu zabojcy. Im akazaŭsia ŭradženiec Mahilova Dźmitryj Cieranciuk 1980 hoda naradžeńnia.
Jak raskazali prakurory ŭ niadaŭnim siužecie «NTB-Biełaruś», Dźmitryj ros u siamji, jakaja prytrymlivałasia baptysckaj viery. Praz 9 hadoŭ jahonyja baćki ŭsynavili jašče adnaho chłopčyka. Adnosiny pamiž bratami z samaha pačatku nie zadalisia, ahulnych intaresaŭ u ich pa žyćci nie było.
U škole Dźmitryj vučyŭsia siarednie, časta prapuskaŭ zaniatki. Pry hetym byŭ fizična raźvity, šeść hadoŭ zajmaŭsia boksam.
U 18 hadoŭ Cieranciuk pačaŭ handlavać na rynku, rehularna jeździć u Rasiju, u pryvatnaści ŭ Maskvu, i vielmi hanaryŭsia tym, što jon adzin z samych maładych čaŭnakoŭ Biełarusi.
U 1999 hodzie chłopiec paznajomiŭsia na rynku ŭ Maskvie ź dziaŭčynaj, ź jakoj u chutkim časie staŭ razam žyć.
Jak adbyłosia zabojstva
U vieraśni taho ž hoda Dźmitryj pajšoŭ u kłub «Chamieleon», dzie źbiralisia ludzi nietradycyjnaj seksualnaj aryjentacyi. Adpaviedna viersii, jakuju złačynca ahučyŭ śledčym, u kłubie jon sprabavaŭ znajści svajho brata Žana i paprasić u jaho hrošaj.
Na toj momant Dźmitryj mocna padsieŭ na aŭtamaty i ŭsie hrošy, jakija zarablaŭ, zajmajučysia handlem, prajhravaŭ. Ale brata ŭ kłubie jon nie znajšoŭ.
Pa słovach Cieranciuka, kali jon byŭ kala barnaj stojki, da jaho padyšoŭ nieznajomy mužčyna, jakoha jon nikoli nie bačyŭ, i prapanavaŭ vypić. Chłopiec pahadziŭsia, bo, pa jahonych ža słovach, jon «da chalavy łasy». Nieznajomcam byŭ Krystafier Rys.
Mužčyna prapanavaŭ jamu praciahnuć viečar u łaźni, zaprasić tudy dziaŭčat. Ale pakolki ŭziaŭ z saboj mała hatoŭki, skazaŭ, što nieabchodna zajechać da jaho dadomu, pieraapranucca i ŭziać hrošy.
Kali ž jany apynulisia ŭ kvatery, to, sa słoŭ Cieranciuka, Rys prapanavaŭ jamu pačakać u pakoi, vypić, a sam vyjšaŭ.
Jak śćviardžaje złačynca, praź niekatory čas Rys viarnuŭsia ŭžo całkam raspranuty i skazaŭ jamu raspranucca. Atrymaŭšy admovu, mužčyna nibyta šturchnuŭ chłopca na łožak i sprabavaŭ siłaj raspranuć. U adkaz Cieranciuk uziaŭ butelku sa śpirtnym i stuknuŭ mužčynu pa hałavie. Udar byŭ takoj siły, što butelka raźbiłasia.
Paśla hetaha chłopiec schapiŭ nažy z padnosa i staŭ nanosić udary. Kali anhličanin pierastaŭ padavać prykmiety žyćcia, mužčyna spakojna pryniaŭ duš, pieraapranuŭsia ŭ adzieńnie zabitaha, a svajo zapeckanaje kryvioj paźniej vykinuŭ pa darozie dadomu.
Jon taksama zabraŭ telefon achviary, a z partmane vyciahnuŭ hrošy — u ekvivalencie 250 dalaraŭ, jakija paźniej spuściŭ u aŭtamatach. Usiaho ŭ kvatery pradziusara jon prabyŭ kala piaci hadzin.
Spačatku Cieranciuk śćviardžaŭ, što pradziusar byŭ značna bujniejšy za jaho — vyšejšy na hałavu, u paŭtara razy dziabiolejšy i fizična macniejšy. Adnak materyjały kryminalnaj spravy śviedčać pra inšaje: paciarpieły byŭ čałaviekam siaredniaha rostu i zvyčajnaha ciełaskładu.
Jak znajšli zabojcu
Na ciele Rysa znajšli 81 ranu — rezanyja, kołata-rezanyja i kołatyja, jany achoplivajuć praktyčna ŭsio: ad hałavy da kaniečnaściaŭ.
Akramia taho, byŭ vialiki apiok ad haračaha prasa. I sudmiedekśpierty paćvierdzili, što ślady źjavilisia adnačasova z astatnimi ranieńniami.
Pa spravie było praviedziena šmat ekśpiertyz, siarod jakich hienietyčnaja, jakaja vyjaviła na padušcy hienom nieviadomaha mužčyny. Taksama byli znojdzienyja adbitki palcaŭ. Ale znajści złačyncu doŭha nie ŭdavałasia.
Amal praz čverć stahodździa, kali stała kančatkova zrazumieła, što da zabojstva datyčny hramadzianin Biełarusi, materyjały kryminalnaj spravy byli pieradadzienyja biełaruskim orhanam.
Adno z dadatkovych daśledavańniaŭ, jakoje jany praviali, — alfaktarnaja ekśpiertyza. Heta analiz pachu, jaki zachavaŭsia ŭ zapiečanaj kryvi. Jaho paraŭnali z kantrolnym uzoram z dapamohaj troch śpiecyjalna navučanych sabak. Kali ŭsie jany dajuć supadzieńnie — vynik pryznajecca dakładnym.
Ekśpiertyza paćvierdziła: u momant zabojstva pobač z achviaraj znachodziŭsia tolki adzin čałaviek — Dźmitryj Cieranciuk. Jon znajšoŭsia ŭ kałonii, dzie adbyvaŭ termin za inšaje zabojstva, učynienaje ŭ Minsku ŭ 2009 hodzie.
Novaje zabojstva
Paśla zabojstva ŭ Maskvie Dźmitryj Cieranciuk jašče kala miesiaca zastavaŭsia ŭ horadzie, a paźniej nieadnarazova viartaŭsia ŭ Biełaruś. U 2001-m jon byŭ asudžany ŭ Maskvie za rabavańnie i paśla adbyćcia terminu kančatkova pierajechaŭ u Minsk, dzie taksama byŭ nieadnarazova sudzimy za rabavańni i hvałt.
Paśla vyzvaleńnia ŭ 2008 hodzie mužčyna pačaŭ žyć z žančynaj, u jakoj byli prablemy z ałkaholem. U lutym 2009 hoda, paśla svarki z-za hrošaj, Cieranciuk žorstka źbiŭ sužycielku, naniosšy bolš za 100 udaraŭ, u tym liku kala 40 pa hałavie. Razam z baćkam jany sprabavali zamaskiravać zabojstva pad niaščasny vypadak, ale byli zatrymanyja praź niekalki dzion.
Za kratami za zabojstva 33-hadovaj žančyny Dźmitryj pravioŭ bolš za 15 hadoŭ, kali stała viadoma pra jahonyja maskoŭskija pryhody. Klučavym momantam na novym pracesie stali pakazańni sukamiernika Cieranciuka, ź jakim jon padzialiŭsia padrabiaznaściami raspravy nad pradziusaram u Maskvie ŭ 1999 hodzie.
Pa słovach prakuroraŭ, baćki Dźmitryja Cieranciuka zaŭsiody abaraniali jaho, i navat paśla vyniasieńnia abvinavaŭčaha prysudu maci admoviłasia pryznać jaho vinu. Padčas śledstva mužčyna zaŭsiody admaŭlaŭ najaŭnaść namieru, pierakładajučy adkaznaść na achviar — nibyta jany jaho pravakavali. Pry hetym adznačaŭ, što ŭ paryvie lutaści nie moža spynicca.
Śviedki apisvali jaho jak čałavieka schilnaha da žorstkaści, asabliva ŭ stanie apjanieńnia: najmienšaje razdražnieńnie — i jon adrazu ŭžyvaŭ siłu. Psichołaha-psichijatryčnaja ekśpiertyza pryznała, što Cieranciuk uśviedamlaŭ svaje dziejańni i moh ich kantralavać, choć u jaho vyjaŭlenyja emacyjnaja niaŭstojlivaść i isteryčnyja rysy.
Padčas śledstva jon pavodziŭ siabie strymana, staraŭsia padać siabie achviaraj, śćviardžaŭ, što dziejničaŭ u ramkach samaabarony. U vieraśni hetaha hoda Cieranciuk moh by vyjści na volu, ale ciapier jamu daviadziecca pravieści za kratami jašče jak minimum čatyry hady — kali, viadoma, nie raskryjucca inšyja złačynstvy.
Kamientary
Ja nie sud́ja, každyj možiet iźmieniťsia, navierno, no u nieho užie był šans i nie odin.
Vyjdiet - opiať ubjot.
A hdie jeŝio takoho biełarusa najdieš kromie tiuŕmy!