Praca Jaŭhiena Kuźniacova amal paŭstahodździa ŭpryhožvaje Minsk.
Pra nadańnie tvoru mastactva achoŭnaha statusu paviedamiła tematyčnaja supołka Belarusian Soviet Monumental ART.
Pa infarmacyi aktyvistaŭ, niekalki dzion tamu adbyłosia pasiadžeńnie Biełaruskaj respublikanskaj navukova-mietadyčnaj rady pa pytańniach historyka-kulturnaj spadčyny pry Ministerstvie kultury. Siabry rady adnahałosna padtrymali prapanovu ab nadańni statusu historyka-kulturnaj kaštoŭnaści tvoru mastaka Jaŭhiena Kuźniacova.
Havorka idzie pra maštabnuju razmaloŭku pa kieramičnaj plitcy, viadomuju jak «Sadoŭnica», jakaja asimietryčna raźmieščana na hałoŭnym fasadzie restarannaha błoka haścinicy. Daśledčyki manumientalnaha mastactva nazyvajuć hetuju pracu «niejmaviernaj» i adznačajuć, što aŭtar padaryŭ Minsku «dychańnie Sandra Bacičeli». Ciapier hety tvor budzie znachodzicca pad achovaj dziaržavy.
Aktyvisty vykazali padziaku ŭsim, chto spryčyniŭsia da hetaj padziei, u tym liku siastry mastaka Nadziei Kuźniacovaj.
Šedeŭry savieckaha madernizmu
Haścinica «Płanieta», raźmieščanaja ŭ Minsku na praśpiekcie Pieramožcaŭ, 31, była pabudavana ŭ 1980 hodzie da Alimpijady-80 pa prajekcie architektaraŭ Hieorhija Bieniadziktava, Uładzimira Načarava i Tamary Ramanoŭskaj. Kompleks składajecca z 12‑paviarchovaha žyłoha korpusa i vysunutaha napierad pramavuholnaha abjomu restarana, azdoblenaha tufam. Mienavita na im i znachodzicca pano Kuźniacova.
Varta adznačyć, što restaran haścinicy «Płanieta» źjaŭlajecca sapraŭdnaj skarbnicaj biełaruskaha manumientalnaha mastactva taho času.
Interjery restarana, u tym liku viestybiul, zała i leśvicy, byli aformlenyja vysakarodnymi materyjałami: rakušačnym tufam, čornym łabradarytam i marmuram.
Akramia raboty Kuźniacova, u afarmleńni brali ŭdzieł i inšyja vybitnyja tvorcy: kiesonnaja stol zały azdoblena siužetnaj arnamientalnaj freskavaj razmaloŭkaj aŭtarstva Śviatłany Katkovaj, ścieny aformleny dekaratyŭnymi kieramičnymi pano mastakoŭ Mikałaja Bajračnaha i Valancina Pryješkina. Asablivym akcentam interjera źjaŭlajecca vializnaja lustra ź niomanskaha škła.
Na hety momant nieviadoma, ci atrymali achoŭny status inšyja tvory mastactva, jakija znachodziacca ŭnutry budynka.
Tryvožny sihnał z Aksakaŭščyny
Razam z radasnaj navinoj supołka Belarusian Soviet Monumental ART źviarnuła ŭvahu na prablemu ź inšym tvoram Jaŭhiena Kuźniacova. Jaho praca «Maładość», jakaja znachodzicca ŭ Aksakaŭščynie Minskaha rajona i stylistyčna praciahvaje minskuju «Sadoŭnicu», zaraz znachodzicca pad pahrozaj źniščeńnia. Pryčynaj hetamu staŭ zapłanavany ramont budynka, dzie jana raźmieščana. Abaroncy spadčyny zaklikajuć źviarnuć uvahu na hety abjekt, kab nie stracić unikalnuju spadčynu mastaka.
«Naša Niva» — bastyjon biełaruščyny
PADTRYMAĆCiapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie1
Kamientary
tak i jość