Pucin: Rasija nastupaje pa ŭsich napramkach, a praciŭnik adychodzić
Prezident Rasii siońnia ŭ Maskvie pravodzić pramuju liniju. Niekalki pytańniaŭ tyčyłasia i vajny z Ukrainaj.
Uładzimir Pucin adkazaŭ na pytańnie «vajna ci mir» i pra toje, jak buduć dasiahnuty «mety SVA», zadadzienaje viadučaj «pramoj linii», paviedamlaje Bi-bi-si.
«Pakul my sapraŭdy nie bačym takoj hatoŭnaści», — adkazaŭ Pucin, majučy na ŭvazie niehatoŭnaść Ukrainy pryniać spynieńnie vajny na jahonych umovach.
Dalej rasijski prezident viarnuŭsia da padziej 2014 hoda. Pucin śćviardžaje, što Kijeŭ admaŭlajecca ad zaviaršeńnia vajny mirnymi srodkami.
«Ale my viedajem pra sihnały, što jany hatovyja vieści niejki dyjałoh», — dadaŭ jon.
«Tolki što vysłuchaŭ čarhovy dakład načalnika Hienieralnaha štaba», — praciahnuŭ Pucin. Jon śćviardžaje, što Rasija nastupaje pa ŭsich napramkach, a «praciŭnik adychodzić».
Pavodle jaho słoŭ, paśla ŭziaćcia Sievierska ŭ Danieckaj vobłaści adkryvajucca mahčymaści dla dalejšaha prasoŭvańnia. Uzbrojenyja siły Ukrainy ŭziaćcie Sievierska nie paćviardžali.
Liman budzie ŭziaty ŭ bližejšy čas, vykazaŭ zdahadku Pucin. Jon nahadaŭ, što bai iduć u Kanstancinaŭcy, śćviardžajučy, što bolš za 50% nasielenaha punkta ŭžo znachodzicca pad rasijskim kantrolem.
Jon taksama zajaŭlaje, što sproby Uzbrojenych sił Ukrainy advajavać Pakroŭsk biespaśpiachovyja. Hrupoŭka «Uschod» chutka ruchajecca pa Zaparožskaj vobłaści, iduć bai ŭ horadzie Hulajpole, dadaŭ rasijski prezident.
Pucin znoŭ paŭtaryŭ śćviardžeńnie pra ŭziaćcie Kupianska ŭ Charkaŭskaj vobłaści.
«Upeŭnieny, što da kanca hoda my z vami jašče staniem śviedkami pośpiechaŭ našych bajcoŭ na linii bajavoha sudakranańnia», — zajaviŭ Pucin.
Taksama jon prakamientavaŭ naviedvańnie Uładzimiram Zialenskim Kupianska.
«Jon ža artyst, i artyst talenavity, ja kažu heta bieź ironii», — skazaŭ Pucin. Jon skazaŭ, što steła ciapier vyhladaje «zusim pa-inšamu», dy i znachodzicca za kiłamietr ad horada.
«Navošta stajać na parozie — zachodź u dom, kali Kupiansk pad ich kantrolem», — skazaŭ prezident Rasii.
Jon dadaŭ, što nieba nad Kupianskam poŭnaje ŭkrainskich i rasijskich dronaŭ.
Pucin skazaŭ, što «praciŭnik luboj canoj sprabuje viarnuć stračanaje». Ale prablema, na jaho dumku, zaklučajecca ŭ tym, što Ukraina pazbaviłasia stratehičnych reziervaŭ.
«Heta pavinna padšturchnuć kijeŭski režym vyrašyć usie sprečnyja pytańni i skončyć hety kanflikt mirnymi sposabami», — padsumavaŭ Pucin.
Kamientary
[Zredahavana]