Kryścinie Arbakajcie zabaranili ŭjezd u Łatviju praz pahrozu nacyjanalnaj biaśpiecy
Łatvijskija ŭłady ŭnieśli rasijska-litoŭskuju śpiavačku Kryścinu Arbakajcie ŭ śpis niepažadanych asob. Takoje rašeńnie pryniataje pa rekamiendacyi słužby dziaržaŭnaj biaśpieki. Rašeńnie źviazana z vystupami artystki ŭ akupavanym Krymie i ŭdziełam u rasijskich prapahandysckich mierapryjemstvach, paviedamlaje LTV.
Ministr unutranych spraŭ Łatvii Rychard Kazłaŭskis paćvierdziŭ, što Kryścina Arbakajcie trapiła ŭ «čorny śpis» asobie, jakim zabaronieny ŭjezd u Łatviju. Takoje rašeńnie pryniataje na padstavie acenki Słužby dziaržaŭnaj biaśpieki Łatvii.
Tam patłumačyli, što śpiavačka paśla akupacyi paŭvostrava Krym vystupała tam z kancertami, a taksama ŭdzielničała ŭ prahramach, jakija rasijskija ŭłady vykarystoŭvali ŭ prapahandysckich metach. Akramia taho, pavodle SDB, artystka nibyta padtrymlivaje ahresiju Rasii suprać Ukrainy.
«My jak dziaržava padtrymlivajem Ukrainu i nie možam pryniać, kab asoby, jakija adkryta demanstrujuć padtrymku ahresaru i parušalniku mižnarodnaha prava, volna vystupali ŭ Łatvii», — padkreśliŭ Kazłaŭskis.
U suviazi z hetym u krainie, chutčej za ŭsio, budzie skasavany letni kancert Arbakajcie, na jaki ŭžo vioŭsia prodaž kvitkoŭ.
Letaś łatvijski śpis niepažadanych asob byŭ papoŭnieny na 480 proźviščaŭ. Ułady zajaŭlajuć, što padobnyja rašeńni buduć prymacca i nadalej dziela abarony nacyjanalnaj biaśpieki.
U Litvie, hramadziankaj jakoj źjaŭlajecca Kryścina Arbakajcie, taksama vyklikaŭ chvalu abureńnia ŭ sacyjalnych sietkach kancert Kryściny Arbakajcie, zapłanavany na 31 maja ŭ Vilni. Karystalniki vykazvajuć niezadavolenaść tym, što ŭ Litvu zaprašajuć artystku, jakaja atrymała zvańnie «zasłužanaj artystki Rasijskaj Fiederacyi» i nie asudziła ahresiju Rasii suprać Ukrainy.
U toj ža čas u samoj Rasii taksama admianiajuć kancerty Arbakajcie. Pryčynami tam nazyvajuć, što śpiavačka nie vykazała svajoj pazicyi ab vajnie va Ukrainie, nibyta «finansavała USU» i atrymała zamiežnaje hramadzianstva, a ŭ Rasiju pryjechała tolki dla zarobku hrošaj. Da taho tam jaje ckujuć jak dačku «zamiežnaha ahienta» (Ała Puhačova nie pryznanaja zamiežnym ahientam, im pryznany jaje muž — Maksim Hałkin).
Ciapier čytajuć
«Bulba» z Oršy pajšoŭ vajavać za Rasiju — ciapier siastra šukaje jaho ci chacia b jaho pareštki9
Kamientary