Ci varta paźbiahać koka-koły i pepsi: što kažuć chimik i daktary
Koka-koła i pepsi stali nieadjemnaj častkaj masavaj kultury, ale kolki ž praŭdy ŭ strašyłkach pra ich škodu? Ekśpierty razabrali skład i ŭpłyŭ napojaŭ na arhanizm i psichiku, piša «Biełyja chałaty».
Chimik Siarhiej Biesarab praanalizavaŭ skład Coca-Cola i Pepsi-Cola.
Jon prychodzić da vysnovy, što pieryjadyčnaje spažyvańnie haziroŭki istotnaj škody nie nanosić, ale rehularnaje lepš abmiežavać.
Psichijatr Uładzimir Pikirenia adznačyŭ, što zaležnaść ad koły mahčymaja. U asnovie zaležnaści — chutki cukrovy ŭsplosk u kryvi, stymulacyja sistemy ŭznaharody mozhu i prysutnaść kafieinu.
«Ludzi časta stanoviacca prychilnikami napoju nie z-za jaho składu, a z-za stanu, ź jakim jon asacyjujecca», — tłumačyć śpiecyjalist.
Hastraenterołah Lidzija Tarasienka śćviardžaje, što koła nie vyklikaje hastryt abo jazvu, bo kisłotnaść napoju mienšaja, čym naturalnaja kisłotnaść straŭnikavaha soku.
Aŭtary vyłučyli jašče niekalki važnych momantaŭ, jakija čaściej za ŭsio turbujuć ludziej, jakija zabaraniajuć užyvać jaje svaim blizkim.
«Koła» — zanadta sałodkaja? Kali kazać ab kłasičnaj Coca-Cola abo Pepsi-Cola — utrymańnie cukru ŭ 100 hramach pradukcyi vahajecca ŭ rajonie 10 hram. Heta sapraŭdy vielmi šmat: u paŭlitrovaj butelcy źmiaščajecca dzionnaja norma cukru dla darosłaha čałavieka. Ale ŭsio spaznajecca ŭ paraŭnańni. U «vielmi karysnych» sokach, što možna lohka znajści na pryłaŭkach biełaruskich kram cukru bolš: «Dobry» — 10,5 hram cukru na 100 hram, «Fruktovy sad» — 12 h, «J7» — 11 h.
Što da koły biez cukru, to padsałodvalniki mohuć upłyvać na mikrabiom kišečnika i apietyt, ale dokaznaja baza pakul niedastatkovaja dla kateharyčnych vysnoŭ.
Isnuje mif ab tym, što koła dapamahaje pry kišačnych infiekcyjach.
Heta niapraŭda, ličać ekśpierty, zanadta šmat cukru chutčej stanie pažyŭnym asiarodździem dla bakteryj.
A jašče ŭ niekatorych ludziej hazavanyja napoi pravakujuć piakotku i ŭzdućcie, tut aryjentavacca treba na svajo samaadčuvańnie.
Razvažańni ab škodzie koły zvodziacca da prablemy, nakolki moža naškodzić arhanizmu padsałodžanaja hazavanaja vada. Kali koratka, adkaz budzie takim: nijakaj karyści ad sałodkich hazavanych napojaŭ vy nie atrymajecie; kali možacie, to lepš całkam admovicca ad ich užyvańnia — heta, jak minimum, dazvolić skaracić kolkaść spažyvanych kałoryj. Ale i demanizavać hetyja napoi niama padstaŭ.
Ciapier čytajuć
Łukašenka pakazaŭsia ŭ Amanie tolki na čaćviorty dzień vizitu — doma ŭ sułtana. Ź im Viktar i Kola10
Kamientary