«Dzieci schadzili ŭ sadok dva dni. I ja ŭžo chaču zabrać dakumienty»: rasijanka z Kryma ŭ šalenstvie ad biełaruskaha sadka
Krymčanka, jakaja ličyć siabie rasijankaj i žyvie ŭ Hrodnie, vyrašyła paskardzicca na dziciačy sadok. Jana atrymała sotni niehatyŭnych kamientaryjaŭ — i pačała kpić z uzroŭniu zarobkaŭ u Biełarusi.
U svaim instahramie Taćciana Hajduk raspaviadaje, što jany z mužam z Kryma (nie biez honaru žančyna pakazvaje, što ŭ 2018 hodzie pracavała tam žurnalistkaj na telekanale «Krym 24»). Siabie Taćciana nazyvaje ruskaj.
U 2023 hodzie siamja, u jakoj užo było dźvie maleńkija dački, pierajechała ŭ Biełaruś. Taćciana z mužam Dzianisam vybrali Hrodna. Tut zajmalisia turyzmam — arhanizoŭvali aŭtarskija tury pa Biełarusi i Rasii. Dzianis prymaŭ zamovy jašče i jak fatohraf, Taćciana vyrablała śviečki.
Letaś Dzianis iznoŭ emihravaŭ — pajechaŭ pracavać u ZŠA, a Taćciana ź dziaŭčatkami zastałasia ŭ Biełarusi. U siamji źjaviŭsia novy varyjant zarobkaŭ. U instahramie Taćciana rekłamuje, što jaje muž moža nabyć u Amierycy i dasłać u Biełaruś, Rasiju ci Krym amal što zaŭhodna — cacki, kaśmietyku, adzieńnie: «Toje, čaho ŭ našych krainach niama. Aryhinały brendaŭ». Dzianis nie zabyvaje zapisvać roliki, u jakich raskazvaje, što ŭ ZŠA ŭsio ŭ niekalki razoŭ tańniejšaje, čym u Biełarusi.
Taćciana ž zapisvaje žartaŭlivyja roliki kštałtu «Kali rasijancy skazali iści pracavać u Biełarusi» i tłumačyć, što zarobak 600 rubloŭ na miesiac jaje nie cikavić.
Niadaŭna žančyna addała svaich dačok u dziciačy sadok. Pa jaje słovach, dziaŭčatki paśpieli schadzić tolki dva razy — i praviali tam prykładna pa paŭtary hadziny. Ale mama ŭžo ŭ šalenstvie i zapisvaje videa, poŭnaje abureńnia. Dyk što zdaryłasia?
— Spačatku mnie dali dźvie ankiety na kožnaje dzicia, dzie pytajucca pra ŭsio: poŭnaja ci niapoŭnaja siamja, svaja ci nie svaja kvatera. «Moža być, vy žyviacie z mamaj?», «Dzie vaš muž?», «Jakaja płošča kvatery?». Vyśviatlajuć usio! Dzie pracujuć navat babuli i dziaduli maich dziaciej. Nu raptam my niejkija deputaty, a jany nie viedajuć, jak z nami abyścisia pravilna, naležnym čynam. Ale deputataŭ u nas niama, tamu z nami razmaŭlajuć nie vielmi.
Aburyła Taćcianu i toje, što na treci dzień zranku joj patelefanavała vychavacielka z pytańniem, dzie ž dziaŭčatki.
— I z pretenzijaj takoj: «A vy dzie?!». Ja joj kažu: «My zachvareli, my siońnia nie pryjdziem». Jana kaža: «Mnie treba vas naviedać, abaviazkova. Kali?».
Krymčanka nie chacieła bačyć u svajoj kvatery vychavacielku — pra što ščyra i skazała. Pa słovach Taćciany, supracoŭnica sadka adkazała, što ŭ ich takija praviły, i pryhraziła vyklikać milicyju.
— «Vy pavinny ŭładkavacca na pracu, vy nidzie nie pracujecie! My vyklikajem milicyju, kab pravieryć, jak žyvuć dzieci. Bu-bu-bu», — nie chavaje emocyj błohierka, pierakazvajučy niepryjemnuju razmovu.
Vychavacielka stała nastojvać na tym, što pryjdzie ŭviečary a šostaj. Taćciana zajaviła, što kožny dzień jaje dočki chodziać na hurtok a siomaj — plus patrebny čas, kab dajechać da miesca zaniatkaŭ.
— Jana razmaŭlała tonam čałavieka, u jakoha ja na ŭtrymańni! Ci ja pracaŭładkavałasia da jaje abmyvać joj nohi. Voś taki ton u čałavieka!
Dalej błohierka tłumačyć, što kamunikacyja z vychavacielkaj była niaŭdałaj ź pieršaha dnia. Pa słovach Taćciany, jana sprabavała abmierkavać toje, što jaje dačka płača — na što vychavacielka byccam adkazała: «U nas usie dzieci płačuć, heta narmalna».
Krymčanka taksama raspaviała, što taja ž dačka paskardziłasia, što vychavacielka kryčyć na dziaciej. Muž Taćciany, pačuŭšy hetuju historyju, skazaŭ zabirać dakumienty z sadka.
Jość i jašče adzin momant, jaki pakinuŭ u žančyny niepryjemnyja ŭražańni. Heta toje, što ŭ sadku skazali kupić šmat roznych rečaŭ — ad formy dla fizkultury da kancylarskich tavaraŭ i navat tualetnaj papiery.
— Kali mnie ciažka vytrymlivać takuju ciotku navat piać chvilin, jak być trochhadovamu dziciaci ŭvieś dzień? Darečy, u ankiecie 99% pytańniaŭ pra prybytak siamji, ale spytać pra charaktar dziciaci, jaho zachapleńni — nie, navošta? Na heta adzin radok. Mnie było niekamfortna ad hetych pytańniaŭ. I hałoŭnaje pytańnie, jakoje mnie zadali ŭ ankiecie — «Čym vy možacie dapamahčy sadku?».
Sama farmuloŭka vielmi nie spadabałasia Taćcianie. Jana b chacieła bačyć bolš taktoŭnaje «ci možacie vy niečym dapamahčy?».
Błohierka kaža, što jaje dočki praciahnuć chadzić u sadok (bo sami hetaha vielmi chacieli), ale tolki da nastupnaha kanfliktu.
— Adrazu skažu: my nie źbiralisia chadzić doŭha. Ja chacieła ich krychu pavadzić, prosta paznajomić z sadkom, kali jany chacieli. Ja razumieju, što praź niekalki tydniaŭ hety zapał projdzie. Ale ž chočacca jaho zadavolić.
Videa razyšłosia ŭ instahramie i za sutki nabrała 77 tysiač prahladaŭ, ale ž pry hetym usiaho 295 łajkaŭ. Zatoje dyskusija pačałasia šalonaja — na sotni kamientaryjaŭ. I bolšaść ludziej rezka krytykujuć Taćcianu — taja ž davoli pa-chamsku im adkazvaje.
Samy papularny kamientar nabraŭ 285 łajkaŭ: «Pasprabujcie pavažać krainu, kudy pryjechali. Tak, u nas vychavacielka dziciačaha sadka abśleduje žyllovyja ŭmovy dziaciej. Taki zakon. Nie padabajecca — jedźcie. Vam zmahli dać sadok. Vy nie stajali ŭ čarzie z naradžeńnia. Vam dali prosta tak i adrazu biaspłatny dziciačy sad, a vy jašče nyjecie, što vašamu ž dziciaci pryjšłosia kupić češki i majki?»
Błohierka paryruje i śćviardžaje, što ŭ biełaruskich sadkach niedachop dziaciej i, kab nie začynicca, jany vymušany zmahacca za kožnaje dzicia.
Biełaruska z ZŠA napisała, što choča adpravić dačku u Minsk, tamu što ŭ «Amierycy niama takich utulnych dziciačych sadočkaŭ» — i paniesłasia
Maci nie zachacieła skidvacca na pyłasos u dziciačy sadok — jaje papraknuli ŭ skvapnaści
Čynoŭniki zabaranili pravodzić sałodkija stały na vypusknych u dziciačych sadach. A fatohrafa paklikać možna?
Jak vyhladajuć novyja dziciačyja sadki ŭ Minsku FOTA
Ciapier čytajuć
«Ja jašče moh sumniavacca ŭ sabie. Ale kali Maša takoje zrabiła!» Nieviadomyja fakty pra Viktara Babaryku raskazała jaho advakatka Natalla Mackievič44
Kamientary
Baćka nieviedama dzie.
Žytłovyja ŭmovy pakazvać nie choča.
Tut da SNS adzin krok.
Naprykład pažarnaha sihnalizatara niama - i pryvitańnie.