Hubarevič zaniaŭ adnu z pasad Mielnikavaj u KR, ale śpikieram nie staŭ. Piatruchin aburany biezalternatyŭnym hałasavańniem
Palityk Juraś Hubarevič byŭ abrany kaardynataram ad Kaardynacyjnaj rady (KR) u hrupu pa acency patrebaŭ Biełarusi ŭ źniešniaj dapamozie. Raniej hetuju pasadu zajmała Anžalika Mielnikava. Vybary na pasadu akazalisia biezalternatyŭnymi, što vyklikała abureńnie ŭ niekatorych delehataŭ KR.
Bolš kandydataŭ nie było
Juraś Hubarevič tłumačyć, što ŭźnikła nieabchodnaść zamianić na hetaj pasadzie źnikłuju Anžaliku Mielnikavu. I tady kiraŭnictva frakcyi Paŭła Łatuški, jakaja ŭ kaalicyi ź inšymi maje bolšaść u Kaardynacyjnaj radzie, pryniało rašeńnie vyłučyć na jaje Hubareviča.
U vyniku jon akazaŭsia adzinym kandydatam — inšyja frakcyi nie vyłučyli svaich. Biezalternatyŭnaść vybaraŭ aburyła inšaha člena Kaardynacyjnaj rady, błohiera Siarhieja Piatruchina, jaki napisaŭ pra heta ŭ fejsbuku:
«My jašče nie zrabili razboru palotaŭ pa fakcie źniknieńnia hrošaj i ŭciečki infarmacyi, a ŭžo pryznačajem na adkaznuju pasadu novaha čałavieka z toj samaj kamandy».
Sam Hubarevič ličyć, što pytańnie, čamu tak adbyłosia, što ŭ jaho nie było kankurentaŭ, možna taksama zadać niekalkim dziasiatkam inšych delehataŭ KR abo kiraŭnikam frakcyj.
«Pytańnie, što jość patreba nakiravać inšaha pradstaŭnika zamiest Mielnikavaj, było vyniesiena na naradu frakcyi za niekalki dzion da hałasavańnia, to-bok za davoli praciahły termin.
Paśla ŭsim delehatam było daviedziena praz aficyjny kanał, što adbyvajecca zbor kandydatur. Tamu toj ža Piatruchin, jak i luby inšy delehat, mieŭ mahčymaść vyłučyć svaju kandydaturu. Pryčym kandydaturu moža vystaŭlać nie tolki frakcyja.
Kožny moža zrabić heta samastojna, kali zmoža sabrać hałasy jašče piaci delehataŭ z roznych frakcyj», — tłumačyć Hubarevič.
U vyniku palityk atrymaŭ 52 hałasy ŭ svaju padtrymku. Tolki dva delehaty prahałasavali suprać jaho.
Zamiest Mielnikavaj, ale nie śpikier
Pieramoha nie aznačaje, što Hubarevič stanie śpikieram KR. Paŭnamoctvy Anžaliki Mielnikavaj časova pierajšli da vice-śpikierki Stasi Hlińnik.
Hubarevič ža budzie tolki pradstaŭnikom KR u hrupie, jakaja zajmajecca acenkaj patreb biełaruskaj hramadzianskaj supolnaści. U kiraŭničy kamitet uvachodziać pa adnym pradstaŭniku ad troch struktur: Ofisa Śviatłany Cichanoŭskaj, Abjadnanaha pierachodnaha kabinieta i Kaardynacyjnaj rady.
Kiraŭničy kamitet raspačaŭ svaju pracu ŭ druhoj pałovie 2024 hoda.
«Byli stvoranyja niekalki pracoŭnych hrup, jakija pradstaŭlajuć intaresy roznych siektaraŭ: ŚMI, hramadzianskaj supolnaści, pravaabarončaha siektara, biznesu, kultury.
Hetyja hrupy farmavalisia adkryta, svaich pradstaŭnikoŭ tudy mahli nakiravać pradstaŭniki luboj arhanizacyi z adpaviednaha siektara. I ŭžo hetyja hrupy vyznačajuć patreby siektara», — tłumačyć Hubarevič.
Pa słovach palityka, kiraŭničy kamitet zvodzić u adno dakumienty i paśla prezientuje ich jeŭrapiejskim instytucyjam ad imia ŭsich hetych pracoŭnych hrup. Kamitet imkniecca być pasiarednikam pamiž roznymi siektarami (kultury, ŚMI, biznesu i hetak dalej) i pradstaŭnikami Jeŭrasajuza jak asnoŭnych donaraŭ.
Pry hetym Hubarevič padkreślivaje, što jany sami nie zajmajucca vyłučeńniem i raźmierkavańniem dapamohi. Jany tolki ahučvajuć prablemy i patreby supolnaści.
«Raniej funkcyju pracoŭnych hrup vykonvała sama biełaruskaja dziaržava. Da 2020 hoda jana supracoŭničała ź ES pa pytańniach siektaralnaj padtrymki ŭ Biełarusi. Paśla 2020 hoda situacyja źmianiłasia, i ŭ adnosinach da našaj krainy było zroblena vyklučeńnie, kali sam hramadski siektar moža artykulavać svaje intaresy», — kaža Hubarevič.
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie10
Kamientary
Jedinstviennyj čiestnyj oppozicionnyj politik - Viačiesłav Sivčik.
Jeŝie jesť čiestnyj oppozicionier Filipp Šavrov.