Hałoŭčanka: U Biełarusi niama abmiežavańniaŭ na pryjom dalaraŭ staroha ŭzoru

«Mahu z usioj adkaznaściu zajavić, što ŭ palitycy valutna-abmiennych apieracyj ź fizičnymi asobami nijakich abmiežavańniaŭ ci źmienaŭ nie ŭvodziłasia, nie ŭvodzicca i ŭvodzicca nie budzie. U nas niama nijakich instrukcyj abo abmiežavańniaŭ pa pryjomie tych ci inšych dalaravych kupiur u zaležnaści ad hoda vypusku.

U abarocie znachodziacca i tyja, i inšyja. Banki abaviazany prymać i prymajuć kupiury luboha ŭzoru, kali jany źjaŭlajucca płaciežazdolnymi, to bok vałodajuć prykmietami płaciežazdolnaści», — skazaŭ Raman Hałoŭčanka.

Usie banki pracujuć pavodle praviłaŭ, praduhledžanych padpisanym imi pad ehidaj Asacyjacyi biełaruskich bankaŭ pahadnieńniem ab vykarystańni adzinaha pieraliku prykmiet płaciežazdolnaści banknot u zamiežnaj valucie, u miežach jakoha patrabavańni da pryjomu dołaraŭ ZŠA źjaŭlajucca adnolkavymi.

«Heta pahadnieńnie było nakiravana nie tolki na ŭnifikacyju patrabavańniaŭ, ale i na toje, kab zrabić ich bolš «łajtovymi». Kab jany nie byli praźmiernymi. Viadoma, jość taki siehmient, jak paškodžanyja kupiury, jakija nie majuć prykmiet płaciežazdolnaści. Raniej hetaj prablemy ŭvohule nie isnavała z-za taho, što banki mahli abmieńvać takuju valutu za miažoj na novyja kupiury. Ciapier heta ź viadomych pryčyn uskładniena. Tym nie mienš mahu paviedamić, što Biełarusbank niadaŭna adnaviŭ apieracyi pa pryjomie paškodžanych kupiur na inkasa, to bok na abmien na niepaškodžanyja. Ale, naturalna, heta pasłuha płatnaja, i praduhledžana peŭnaja kamisija», — adznačyŭ staršynia praŭleńnia Nacbanka.

Kali niama defiektaŭ i paškodžańniaŭ, dla bankaŭ niama roźnicy pamiž dalaravymi kupiurami staroha i novaha ŭzoru, padkreśliŭ jon.

«Kali ŭźnikajuć niejkija pytańni, jany najčaściej źviazanyja z tak zvanym čałaviečym faktaram. Ale Nacyjanalny bank vielmi ŭvažliva adsočvaje hetuju situacyju litaralna štodzionna, daje adpaviednyja ŭstanoŭki bankam. Pracuje koł-centr, kudy možna skiroŭvać pytańni i mahčymyja skarhi. Ale ŭ cełym prablema nie nosić sistemnaha charaktaru», — zajaviŭ Raman Hałoŭčanka.

Staršynia praŭleńnia Nacbanka nahadaŭ, što jašče na pasadzie premjer-ministra jon rekamiendavaŭ zachoŭvać źbieražeńni ŭ nacyjanalnaj valucie.

«Zaraz mahu pryvieści kankretnyja ličby, jakija paćviardžajuć pravilnaść maich słoŭ. Kali hod tamu čałaviek pakłaŭ na depazit 1000 rubloŭ, ciapier jon zarabiŭ 120 rubloŭ. A toj, chto nabyŭ u toj samy čas dołary ZŠA i pakłaŭ ich pad padušku, straciŭ 20 rubloŭ. Matematyka zrazumiełaja. Ličby krasamoŭnyja, havorać sami za siabie», — padsumavaŭ jon.

• 0
• 0
• 2
• 2
• 0
• 0
• 1
• 0