«Za łajki suprać Rasii». Šmatdzietnaja ŭkrainka chacieła pierajechać u Biełaruś, ale jaje nie ŭpuścili paśla ahladu telefona
Ukraincy, jakaja źbirałasia z šaściu dziećmi pierajechać u Biełaruś z Hiermanii, zabaranili ŭjezd u RB. Pa słovach Jaŭhienii Čałavaj, nahodaj dla hetaha stali «niekalki łajkaŭ suprać Rasii», znojdzienyja ŭ jaje telefonie. Žančyna zasmučanaja, tamu što, pa jaje słovach, ciapier jana ŭžo «suprać Ukrainy».
«Znajšli paru łajkaŭ, jakija ja zrabiła ŭ 2022 hodzie, na fotazdymki, dzie napisana, što Rasija — teraryst. Ja, kaniečnie, nie pamiataju, što rabiła heta. Moža, i vypadkova nacisnuła, mižvoli atrymałasia. Ale što jość, to jość, tut nie dakažaš. Dziakuju Bohu, što mianie jašče nie aryštavali za heta (my sustreli čałavieka, u jakoha žonku za heta aryštavali»)», — raskazała žančyna ŭ svaim tyktoku.
Znajomyja siamji raspaviali «Našaj Nivie», što Jaŭhienija naradziłasia ŭ Małdovie, a jaje muž u Rasii. Siońnia jany majuć ukrainskaje hramadzianstva: da pačatku poŭnamaštabnaj vajny siamja žyła ŭ Mielitopali, zarablała na žyćcio klininham. U traŭni 2022-ha hoda jany vyjechali z akupavanaj terytoryi ŭ Jeŭropu: pabyli ŭ Polščy i Hiermanii, ale ciapier vyrašyli ruchacca ŭ Biełaruś.
«Jany kazali, što im nie padabałasia, jak u Jeŭropie staviacca da ŭkraincaŭ. Što dziaciej nibyta bulili ŭ škole. Plus byli moŭnyja prablemy: jany vyrašali, što ŭ Biełarusi jak ruskamoŭnym im budzie praściej. Plus u krainie bolš zvykłaja ježa», — kažuć znajomyja ź situacyjaj.
Na biełaruskaj miažy žančynu adrazu adpravili na «filtracyju». Kala paŭhadziny vyvučali źmieściva telefona i paśla znajšli tyja samyja łajki pad pastami z asudžeńniem dziejańniaŭ Rasii, jakija i stali pryčynaj pastavić u pašpart štamp «Ujezd zabaronieny».
Admietna, što, kali siamja tolki ahučyła svoj namier pierabiracca ŭ Biełaruś, navat nabyła sabie pryčep-dom na kołach dla składanaha maršrutu, u kamientarach ich padtrymlivali: «Biełarusy zaŭsiody radyja dobrym ludziam», «Pryjazdžajcie! U nas vielmi dobra i ŭsie žyvuć u miry i zhodzie». Paśla ž apoviedu pra zabaronu na ŭjezd u kamientarach nazirajecca supraćlehłaja atmaśfiera: «Małajčyna Baćka, filtruje vorahaŭ», «Nam u našaj krainie niepatrebnyja nienadziejnyja ludzi».
Pakul Jaŭhienija ź siamjoj spyniłasia ŭ Polščy i, niahledziačy na admovu na ŭjezd u Biełaruś, płanuje sprabavać prarvacca inšym razam (mahčyma, praz Rasiju). Śviežyja jaje videa — «pakajalnyja» pa charaktary.
«Ludzi hatovyja chutka asudzić mianie, nie viedajučy ni majho žyćcia, ni mianie. Ja dva hady tamu źmianiła svajo mierkavańnie, ja ŭžo suprać Ukrainy. Dzie vaša litaść?» — zadajecca pytańniem ukrainka.
«Śmiajalisia z paviedamleńniaŭ, abmiarkoŭvali fatahrafii». Biełarus raskazaŭ, jak na miažy dapytvajuć tych, chto doŭha nie byŭ na radzimie
«Ja nie vučyła dziaciej śpiavać himn i chadzić šychtom». Razmova z nastaŭnicaj Taćcianaj Krapinievič, jakaja źjechała z krainy praz danosy Bondaravaj
Biełaruska pierajechała ŭ Niderłandy, kab kančatkova źmianić poł. Jak heta ŭładkavana i kolki kaštuje?
Ciapier čytajuć
U Varšavu pryjechała sotnia biełaruskich palitviaźniaŭ10
Kamientary
Milliardy russkoho mira, popavšije na ličnyje sčieta sieḿji łukašienko, - namnoho važnieje mnohodietnoj ukrainki.
Tolki zabyli napisać, što składajecca jon z ruskamirnaha skata.