Zialenski: Pucin adkinuŭ prapanovu spynieńnia ahniu i atakavaŭ cyvilnuju infrastrukturu
U noč na 19 sakavika Rasija ździejśniła masiravanuju ataku dronami-kamikadze, paraziŭšy cyvilnuju infrastrukturu ŭ niekalkich rehijonach Ukrainy. U pryvatnaści, zafiksavana pramoje traplańnie ŭ balnicu ŭ Sumach, udary pa haradach Danieckaj vobłaści, piša «Ukrainskaja praŭda».
Pavodle prezidenta Ukrainy, u načnym niebie Ukrainy było zafiksavana kala 40 udarnych dronaŭ Rasii, niekatoryja ź ich dasiahnuli svaich celaŭ.
«Na žal, jość traplańni mienavita ŭ hramadzianskuju infrastrukturu. Pramoje traplańnie «Šachieda» ŭ balnicu ŭ Sumach, udary pa haradach Danieckaj vobłaści, udarnyja drony prosta ciapier u niebie Kijeŭščyny, Žytomirščyny, Sumščyny, Čarnihaŭščyny, Pałtaŭščyny, Charkaŭščyny, Kiraŭhradščyny, Dnieprapiatroŭščyny i Čarkaščyny.
Mienavita takija načnyja ataki Rasii rujnujuć našu enierhietyku, našu infrastrukturu, narmalnaje žyćcio ŭkraincaŭ. I toj fakt, što hetaja noč nie stała vyklučeńniem, śviedčyć, što treba i dalej cisnuć na Rasiju dziela miru», — skazaŭ nočču Zialenski.
Zialenski padkreśliŭ, što takija dziejańni Kramla źjaŭlajucca adkazam na mižnarodnyja mirnyja inicyjatyvy i demanstrujuć niežadańnie Rasii spyniać vajnu.
«Pucin faktyčna adkinuŭ prapanovu poŭnaha spynieńnia ahniu», — adznačyŭ Zialenski.
Prezident Ukrainy zaklikaŭ mižnarodnuju supolnaść reahavać na rasijskija abstreły novymi sankcyjami, pavieličeńniem vajskovaj dapamohi i ŭzmacnieńniem harantyj dla Ukrainy.
U aŭtorak u Kramli zajavili, što Pucin padtrymaŭ prapanovu prezidenta ZŠA Donalda Trampa ab uzajemnaj admovie Ukrainy i Rasii ad udaraŭ pa enierhietyčnaj infrastruktury na 30 dzion i «addaŭ adpaviedny zahad vajskoŭcam».
Kamientary
Tramp śpić, jak pšanicu (zakreślena) Ukrainu pradaŭšy.