Biełarusy raspaviadajuć pra daktyłaskapiju na ŭjeździe ŭ Hruziju. Śpiecyjalna dla hramadzian Biełarusi?

Adzin z čytačoŭ, jaki ŭ sakaviku prylacieŭ u Batumi (nie ź Biełarusi), sutyknuŭsia z novaj praceduraj u aeraporcie. Pavodle jaho słoŭ, jašče pierad pašpartnym kantrolem niejkija ludzi ŭ formie prasili prybyłych pakazać vokładku pašparta. Ubačyŭšy pašpart Biełarusi, supracoŭnik papiaredziŭ chłopca, što jamu nieabchodna zdać adbitki palcaŭ.

«Prahrama była na ruskaj movie»

— Ja dumaju, što sprava mienavita ŭ biełaruskim pašparcie, bo supracoŭnik navat nie hladzieŭ na majo imia — prosta paviarcieŭ pašpart u rukach i skazaŭ, što mnie treba zdać adbitki palcaŭ. Ja addaŭ dakumient u akienca pahraničnaha kantrolu, pašpart zastaŭsia tam, paśla čaho mianie paprasili pačakać na łaŭcy.

Nieŭzabavie mianie adviali ŭ pakoj, dzie staić abstalavańnie dla daktyłaskapii. Žančyna-pamiežnica zaviała na mianie kartku i pačała zdymać adbitki palcaŭ. Usio prachodziła davoli vietliva: maŭlaŭ, nie chvalujciesia, heta standartnaja pracedura.

Ale mnie zdajecca, što heta była nie zusim standartnaja pracedura. Pa-pieršaje, ja nie pieršy raz prylataju ŭ Hruziju i dahetul nikoli z takim nie sutykaŭsia. Navat ludziej, jakija praviarajuć pašparty da pašpartnaha kantrolu, ja raniej nie bačyŭ.

Pa-druhoje, kali na mianie pačali zavodzić kartku, ja zaŭvažyŭ, što prahrama była na ruskaj movie (što dziŭna dla słužby nacyjanalnaj biaśpieki, jakaja karystajecca prahramaj na zamiežnaj movie). Ja navat zapomniŭ nazvu — «Dakto-2000» — i zahuhliŭ. Akazałasia, što heta biełaruskaja raspracoŭka. Darečy, prahrama zapytała majo imia pa baćku, bieź jaho jana nie dazvalała zavieści kartku.

«Dakto-2000» (nielha śćviardžać, što heta PA sapraŭdy vykarystoŭvałasia /-jecca ŭ Hruzii) Aŭtamatyzavanaja daktyłaskapičnaja identyfikacyjnaja sistema (ADIS) Dakt-2000» — raspracoŭka rezidenta PVT kampanii «TODES» (u partfieli 20+ bujnych infarmacyjnych sistem dla dziaržavy). Pryznačana dla daktyłaskapičnych ulikaŭ i pravierak śladoŭ ruk, uziatych ź miescaŭ nieraskrytych złačynstvaŭ, pa masivach daktyłakart asob, jakija stajać na daktyłaskapičnym uliku ŭ ekśpiertna-kryminalistyčnych padraździaleńniach, a taksama apieratyŭna-daviedačnych daktyłaskapičnych ulikaŭ infarmacyjnych padraździaleńniaŭ sistemy pravaachoŭnych orhanaŭ. Taksama moža być vykarystana dla daktyłaskapičnaj rehistracyi hramadzian i ŭ identyfikacyjnych sistemach roznaha pryznačeńnia.

Pa-treciaje, žančyna nie vielmi ŭpeŭniena karystałasia hetaj prahramaj — jana pastajanna klikała na dapamohu inšych supracoŭnikaŭ, z čaho ja rablu vysnovu, što pracedura novaja.

Raniej ja prylataŭ u Hruziju ź Minska ŭ lutym — ničoha takoha nie było. Maje znajomyja taksama prylatali ź Minska vosieńniu — i taksama biez prablem.

Nie viedaju, ci byli ŭ našaj čarzie jašče hramadzianie RB. Akramia mianie, na daktyłaskapiju nikoha nie adpraŭlali.

Devby.io zapytaŭ u čytačoŭ, jakija niadaŭna pryjazdžali ŭ Hruziju, ci zaŭvažyli jany niešta novaje padčas pašpartnaha kantrolu. Niekalki čałaviek (u asnoŭnym tyja, chto pierasiakaŭ miažu miesiac tamu i raniej) adkazali, što ničoha niezvyčajnaha nie było.

Dva tydni tamu adna dziaŭčyna biez prablem prylacieła z Polščy ŭ Batumi. Jašče adna dziaŭčyna raspaviała, što pry pierasiačeńni naziemnaj miažy z Turcyjaj u pačatku sakavika jaje siabra-biełarusa, jaki maje hruzinski dazvoł na žycharstva, pratrymali kala akienca daŭžej, čym zvyčajna, ale nie bolš za toje.

Adnak znajšoŭsia jašče adzin čytač, u jakoha ŭ sakaviku źniali adbitki palcaŭ u aeraporcie Tbilisi.

«Potym nas z ukraincam dapytvaŭ čałaviek u cyvilnym»

— Ja lacieŭ z Centralnaj Azii ŭ ES tranzitam praz Hruziju. U aeraporcie Tbilisi pa vokładcy pašparta (jaho navat nie adkryvali) mianie i adnaho ŭkrainca adviali ŭbok. Zdajecca, byŭ jašče niechta ź ciomna-sinim pašpartam, kaho taksama adviali, ale ja nie ŭpeŭnieny, što heta byŭ biełarus.

Potym nas z ukraincam dapytvaŭ čałaviek u cyvilnym: dzie i kim pracujem, dzie budziem žyć u Hruzii. Čałaviek u cyvilnym uvieś čas niešta pisaŭ u telefonie.

Paśla hetaha ŭkrainca adpuścili, a mianie adviali ŭ asobny pakoj, dzie biez tłumačeńniaŭ źniali adbitki palcaŭ i dałoniaŭ (PA było na anhlijskaj movie, interfiejs, padobna, byŭ na Windows, imia pa baćku nie zapytvali).

Paśla hetaha mianie jašče trochi patrymali i puścili ŭ krainu.

U čarzie byŭ jašče adzin azierbajdžaniec, jakomu admovili va ŭjeździe, bo ŭ jaho nie było strachoŭki, zvarotnaha bileta i zabraniravanaha hatela. Hetyja pryčyny jamu začytali prosta pry mnie.

U mianie ž była i strachoŭka, i broń, ale ničoha z hetaha navat nie spytali.

Da hetaha ja ŭžo dvojčy byŭ u Hruzii, abodva razy jak turyst, ale z takoj praceduraj sutyknuŭsia ŭpieršyniu.

A voś vylet u ES prajšoŭ biez prablem: u aeraporcie Kutaisi moj pašpart pravieryli za dźvie chviliny i prapuścili.

• 1
• 0
• 0
• 1
• 1
• 0
• 5
• 0