Uładzimir Arłoŭ adpraŭlajecca ŭ vialiki litaraturny tur: naviedaje 10 haradoŭ u piaci krainach
Piśmieńnik i papularyzatar historyi Uładzimir Arłoŭ vypraŭlajecca ŭ litaraturnaje turne. Razam z sa stvaralnikam Fonda i internet-biblijateki «Kamunikat» Jarasłavam Ivaniukom piśmieńnik naviedaje 5 krain i 10 haradoŭ, piša «Budźma».
Sustrečy ŭ Polščy, Čechii, Aŭstryi, Niamieččynie i Šviejcaryi buduć prymierkavanyja da ŭhodkaŭ abviaščeńnia niezaležnaści Biełaruskaj Narodnaj Respubliki.
- Pieršaja sustreča projdzie 20 sakavika va Urocłavie pry padtrymcy z Kolegium Europy Wschodniej i Supołki Biełarusaŭ Urocłava. Uładzimir Arłoŭ raspaviadzie pra klučavyja momanty biełaruskaj historyi — ad časoŭ Połackaha kniastva da abviaščeńnia Biełaruskaj Narodnaj Respubliki, a Jarasłaŭ Ivaniuk pra 25 hadoŭ Kamunikat.org, najbujniejšaj u śviecie biełaruskaj internet-biblijateki.
Miesca: Przejście Dialogu, ul. Świdnicka 19 (padziemny pierachod)
Čas: 18:00
- 21 sakavika ŭ Prazie, dzie suarhanizataram stała supołka «Skaryna», sustreča projdzie pad nazvaj «Niaskoranaja hramadzianka BNR». U miežach jaje adbudziecca prezientacyja knihi ŭspaminaŭ Łarysy Hienijuš «Ptuški biaz hniozdaŭ». Varta zhadać, što samy vialiki raździeł uspaminaŭ pryśviečany mienavita pražskamu pieryjadu žyćcia paetki. U knizie sotni kamientaroŭ i dziasiatki fotazdymkaŭ, častka jakich drukujecca ŭpieršyniu.
Miesca: Kluboŭnia supołki Pahonia, 5. května 851/70, 140 00 Praha 4-Nusle
Čas: 18:00
- U inšym češskim horadzie Brno (22.03), jak lažyć na šlachu turu, Uładzimir Arłoŭ vystupić ź lekcyjaj «Biełaruś — Čechija. Dziesiać viakoŭ histaryčnych i kulturnych suviaziaŭ». Taksama i tut nie abminuć temy Biełaruskaj Narodnaj Respubliki, urad jakoj u mižvajenny pieryjad znajšoŭ prytułak mienavita ŭ Čechasłavaččynie. Na češskaj ziamli znachodziacca mahiły prezidentaŭ BNR Piotry Krečaŭskaha i Vasila Zacharki. Abodva jany zachoŭvali ŭ emihracyi mandat pieršaha niezaležnaha biełaruskaha ŭradu.
Miesca: Institut Paměti Národa, Radnická 10 Brno
Čas: 18:00
Dalej piśmieńnika čakajuć Viena 23.03 (Aŭstryja), Miunchien 25.03 (Niamieččyna), Ciurych 28.03 (Šviejcaryja), Visbaden 29.03 i Kioln 30.03 (Niamieččyna). A paśla Poznań (02.04) i Varšava (03.04). Padrabiaźniej pra miescy sustrečaŭ možna daznacca na staroncy Kamunikat.org.
Kožnaja sustreča budzie nahodaj, kab raspavieści pra Biełaruskuju internet-biblijateku Kamunikat.org, jakaja sioleta adznačaje 25-ci hodździe.
«Naš jubilej budziem adznačać aktyŭnaj dziejnaściu i pracaj, — kaža stvaralnik biblijateki i dyrektar Fondu Jarasłaŭ Ivaniuk. — My pačali hod vydańniem dziesiaci knih. Jość što zaprapanavać biełarusam va ŭsioj Jeŭropie. A kali heta zrabić najlepš, jak nie pry nahodzie našaha vialikaha śviata, śviata svabodnych biełarusaŭ, jakim jość Dzień Voli?»
Naviedniki sustrečaŭ siarod inšaha zmohuć nabyć knižnyja navinki ad «Kamunikata»: uspaminy Łarysy Hienijuš «Ptuški biaz hniozdaŭ», niepadcenzurnyja apovieści Vasila Bykava «Miortvym nie balić. Likvidacyja», novy raman Andreja Fiedarenki «Scenaryst», a jašče knihi Uładzimira Arłova «Ajčyna», «Imiony Svabody», «Kachanak jaje vialikaści», «Orden Biełaj Myšy».
Ciapier čytajuć
Zahnuŭsia biznes člena chakiejnaj kamandy Łukašenki, jaki abiacaŭ pabudavać łyžny maniež za Viarchoŭnym sudom uzamien na łasyja ŭčastki3
Kamientary