Biełaruska stvaryła instahram-realici. Paśpiachova idzie ŭžo piaty siezon
Zdymajuć šou na telefony, nijakaha mantažu niama, a pabačyć novyja sieryi možna ŭ storys instahrama. Taki niezvyčajny farmat realici zapuściła biełaruskaja błohierka Maša Sas, jakaja maje 434 tysiačy padpisčykaŭ. Što ž tam pakazvajuć?
Maša Sas śpiecyjalizujecca na tym, što dapamahaje ludziam pachudzieć. Ale ŭ 2023 hodzie błohierka ŭpieršyniu vyrašyła zapuścić realici-šou ŭ niezvyčajnym farmacie, adaptavanym pad instahram.
Z taho momantu paśpiachova prajšło ŭžo čatyry siezonu prajekta «Weekend na 1000». I ciapier insta-realici idzie ŭ piaty raz.
U čym ža sutnaść? Dvanaccać udzielnic zajazdžajuć u adzin z damoŭ u siadzibie «Dynaraŭka», jakaja znachodzicca pad Minskam. Žančyn dzielać na dźvie kamandy. Kala tydnia jany vykonvajuć roznyja zadańni. Kamanda, jakaja prajhrała, vymušana praz hałasavańnie vyrašyć, chto ź jaje ŭdzielnic pakinie prajekt. Kali hałasy dzielacca paroŭnu, to hledačy vyrašajuć, kaho pakinuć — im prapanoŭvajuć hałasavać u storys, kab vyratavać lubimuju ŭdzielnicu.
Pry hetym asablivaja ŭvaha nadajecca zdarovamu charčavańniu (hatujuć žančynam stravy z racyjonu Mašy Sas) i fizičnaj aktyŭnaści. Naprykancy prajekta ŭdzielnicy stanoviacca na vahi i padličvajuć, kolki skinuli.
Emocyi na «Weekend na 1000» zaškalvajuć. Padčas hałasavańnia, kali treba apuścić u skryniu zdymak dziaŭčyny, suprać jakoj ty addaješ hołas, šmat chto płača.
— Čaho ty płačaš? — pytajecca hołas za kadram u dziaŭčyny ŭ fijaletavaj majcy.
— Adčuvaju siabie žudasna, ja starajusia dumać napierad, dumać pra budučyja ispyty. Tamu ja hałasuju za Iru. Ira, prabač mnie, kali łaska.
U vyniku suprać Iry hałasujuć try čałavieki, i jana vymušana terminova šukać maršrutku da rodnaj Lidy. U hety čas niekalki žančyn rydajuć, abniaŭšy jaje.
Stvaralnica insta-realici raskazvała, što ankiety dla ŭdziełu ŭ jaje prajekcie dasyłali dziaŭčaty z Polščy i Rasi: «Cikavyja dziaŭčaty, ale my nie ŭziali ich pa adnoj prostaj pryčynie. Mnie budzie vielmi drenna na dušy, kali ich vyhaniać pieršymi, a im potym dadomu doŭha dabiracca budzie».
Vyprabavańni dla žančyn padrychtavany samyja roznyja — naprykład, hulnia ŭ styli «Fort Bajard» ci zabieh u hihanckich botach, u jakich treba biehčy ŭčatyroch.
A viečarami dla ŭdzielnic pravodziać majstar-kłasy — ad rośpisu kašpo da placieńnia kos z kaniekałona (štučnych pasmaŭ). Maša kaža, što heta dapamahaje kankursantkam rassłabicca paśla emacyjanalna ciažkaha dnia.
Telefony ŭdzielnicam vydajuć tolki na karotki pramiežak času.
Błohierka taksama ładzić žyvyja efiry ŭ instahramie i tyktoku, kab hledačy mahli zadać pytańni ŭdzielnicam insta-realici. A fanatki potym pišuć žančynam i pryvatnyja paviedamleńni, jak zaŭziejuć za ich i jak płačuć, kali ŭ lubimaj kamandy niešta nie atrymlivajecca.
Dla finału Maša vydumlaje niešta niezvyčajnaje. Naprykład, u minułym siezonie finalistkam treba było ŭhavaryć vypadkovaha mužčynu na spatkańnie. Chacia faktyčna — uprošvać nieznajomca sieści razam na vulicy za raskładny stolik i vypić sok z pryhožych fužeraŭ. «Palavańnie» pravodzili pobač z handlovym centram «Dana Moł».
Pieramožcu insta-realici taksama vybirajuć hledačy šlacham hałasavańnia ŭ storys. Hałoŭny pryz — 1000 rubloŭ.
Kali vy zachočacie spytać, ci sapraŭdy niechta hladzić šou ŭ storys instahrama, dyk viedajcie: u 4 siezonie prajekta ŭ finalnym hałasavańni pryniało ŭdzieł kala 50 tysiač čałaviek. Zdajecca, supracoŭniki BT mohuć kusać łokci ad zajzdraści.
Ciapier čytajuć
Kolki biełarusaŭ atrymali polskaje hramadzianstva za apošni čas. Ličby ŭražvajuć31
Kamientary
U zdarovym hramadstvie / kalektyvie takoha nie byvaje. Navat u pieršabytnaści. Zdarovyja supołki nie nakiravanyja na samaźniščeńnie.
Voś što za śmiećcie ŭ hałovach arhanizataraŭ? Prydumlać antyutopyi, hulni, ŭ jakich zaachvočvajucca skłoki i ŭzajemnaja padazronaść. Što za śmiećcie ŭ hałovach hledačoŭ takich šoŭ?
Ci mała prykmiet antyŭtopij u realnym žyćci, tym bolš, biełaruskim? Chaj zhulajuć u kałoniju, dzie vyjhraje ŭ načalstva toj, chto pieršy daniasie na susieda/susiedku. Dzie prajhraŭšuju staviać u kletku na vulicy.
I ŭvohule ŭsia dziaržaŭnaja sistema admoŭnaha adboru horšych z vykanaŭcaŭ i jość takaja ž chvoraja hulnia. U chvorym socyŭmie vyjhrajuć ludzi z asacyjalnymi ŭmieńniami.