Tramp zajaviŭ, što jahonyja pradstaŭniki jeduć u Rasiju «prosta ciapier»

«My ŭsie pracujem, kab heta skončyłasia. Heta varjactva z-za ničoha. Dumaju, jość šaniec dasiahnuć hetaha. Pałova — heta spynieńnie ahniu, kali my damožamsia, kab Rasija pierastała, uśled pojdzie poŭnaje spynieńnie ahniu. I ja dumaju, da vajny heta nikoli nie vierniecca», — zajaviŭ Donald Tramp.

«U Rasii niama vychadu, akramia spynieńnia ahniu. Kali spatrebicca, my nakładziem sankcyi, ale ja spadziajusia, što nam heta nie spatrebicca.

U finansavym sensie my možam zrabić vielmi niepryjemnyja, vielmi kiepskija rečy, razburalnyja dla Rasii, ale ja nie chaču hetaha», — skazaŭ prezident ZŠA.

Taksama ŭ Biełym domie paviedamili, što daradca Trampa pa nacyjanalnaj biaśpiecy Majk Uołc 12 sakavika pravioŭ telefonnuju razmovu z «rasijskim kaleham». Z kim mienavita jon mieŭ znosiny, u amierykanskaj administracyi nie ŭdakładnili. A śpiecyjalny pasłańnik Trampa Styvien Uitkaf padčas vizitu ŭ Maskvu maje namier «pierakanać» Rasiju padpisać pahadnieńnie ab spynieńni ahniu va Ukrainie.

Pradstaŭnica Ministerstva zamiežnych spraŭ Rasii Maryja Zacharava prakamientavała zajavy Trampa ab adpraŭcy delehacyi ŭ Rasiju słovami, što «my nie vyklučajem kantakty z pradstaŭnikami ZŠA ciaham najbližejšych niekalkich dzion».

Raniej pradstaŭnik Kramla Dźmitryj Piaskoŭ paćvierdziŭ, što rasijski i amierykanski baki płanujuć kantakty na hetym tydni. Pavodle jaho słoŭ, Maskva ŭvažliva vyvučaje zajavy pa vynikach sustrečy ŭ Džydzie, ale pakul nie atrymlivała ad ZŠA nieabchodnuju infarmacyju pra sutnaść pieramoŭ.

Pavodle danych ad krynic ahienctva Bloomberg, prezident Rasii Uładzimir Pucin, vierahodna, pahodzicca na mahčymyja ŭmovy pieramirja z Ukrainaj, adnak jon choča zahadzia pierakanacca, što i jahonyja ŭłasnyja ŭmovy buduć uklučany ŭ pahadnieńnie. Pakul što rasijskija aficyjnyja asoby nie abmiarkoŭvali sa svaimi amierykanskimi kalehami kankretnaje pahadnieńnie, na jakoje ŭkrainskaja delehacyja pahadziłasia padčas pieramoŭ u Saudaŭskaj Aravii.

Surazmoŭcy ahienctva taksama śćviardžajuć, što Pucin, chutčej za ŭsio, pasprabuje zaciahnuć terminy dasiahnieńnia pahadnieńnia, kab zabiaśpiečyć Maskvie maksimalna vyhadnyja ŭmovy. Adna z krynic raskazała, što Kreml moža zapatrabavać spynieńnia pastavak zbroi Ukrainie ŭ jakaści ŭmovy spynieńnia ahniu.

11 sakavika ŭ Džydzie ŭ Saudaŭskaj Aravii adbylisia pieramovy pradstaŭnikoŭ Kijeva i Vašynhtona. Ukrainski bok pryniaŭ prapanovu ŭvieści 30-dzionny režym spynieńnia ahniu, kali na heta pahodzicca Rasija. Paśla sustrečy ZŠA zajavili ab adnaŭleńni pastavak zbroi i adnaŭleńni abmienu raźviedvalnaj infarmacyjaj.

Ofis prezidenta Ukrainy zajaviŭ, što abmierkavańnie detalaŭ časovaha spynieńnia ahniu pačniecca paśla 17 sakavika.

• 1
• 0
• 0
• 1
• 0
• 0
• 0
• 0