Z sakavika ŭzmacnili kantrol na litoŭskaj miažy? Voś što kažuć
Aŭtobusny servis «Atłas» papiaredžvaje pasažyraŭ pra ŭzmacnieńnie kantrolu na litoŭskaj miažy. A što kažuć u pamiežnych čatach i na litoŭskaj mytni? Ci sapraŭdy niešta źmianiłasia?
U telehram-kanale aŭtobusnaha servisu «Atłas» źjaviłasia papiaredžańnie: «Pastupajuć paviedamleńni ab tym, što Litva ŭzmacniła kantrol dla tych, chto ŭjazdžaje ź Biełarusi. U centry ŭvahi — zabaronienyja da ŭvozu tavary. Nahadajem, u śpisie takich bolš za 2800 pazicyj. U tym liku i pradukty charčavańnia: miasnaja i małočnaja pradukcyja, jajki, arechi i navat znakamityja biełaruskija prysmaki, jakija raniej byli papularnym suvieniram».
«Praviarajuć surjozna, možna navat skazać, žorstka trasuć bahaž pasažyraŭ», — cytuje telehram-kanał kiroŭcaŭ mižnarodnych aŭtobusaŭ kampanij-partnioraŭ «Atłasa».
Pry hetym śćviardžajecca, što ŭzmacnieńnie pravierak asabliva nie adbiłasia na časie prachodžańnia miažy (bo bolšaść pasažyraŭ viedaje, što nielha z saboj brać). Pa danych «Atłasa», biełaruska-litoŭskuju miažu aŭtobus u siarednim prachodzić za 2-3 hadziny.
U pamiežnych čatach asablivaj paniki nie nazirajecca. Ale čas ad času sustrakajucca paviedamleńni, što z pačatku sakavika litoŭskaj mytniki pačali ŭ asobnych vypadkach składać pratakoł ab administracyjnym parušeńni.
«Kali raniej kavałak kaŭbasy mahli prosta paprasić vykinuć, to zaraz, kali nie pašancuje sa źmienaj, možna atrymać pratakoł, štraf i na razvarot», — piša ŭ čacie adzin z vandroŭnikaŭ.
Inšy raspaviadaje, što ŭ hetym miesiacy ŭ niepryjemnuju situacyju trapili jaho znajomyja: «Siabry jechali ź Biełarusi ŭ Litvu, vieźli butelku harełki ŭ padarunak. Na litoŭskim baku skłali pratakoł, zaviali administracyjnuju spravu, skazali, što sud vyrašyć, jaki štraf».
Z vodhukaŭ tych, chto niadaŭna jeździŭ praź Litvu, vynikaje, što strohaść pravierki zaležyć ad źmieny, na jakuju trapiš. Nie zaŭsiody pilna nadhladajuć i patrabujuć vykidać pradukty.
Litoŭskija mytniki tłumačać, što novaha zakona nakont prachodžańnia miažy nie prymałasia. Dziejničaje ŭsia taja ž zabarona na ŭvoz praduktaŭ i napojaŭ ź Biełarusi, jakuju Litva ŭviała jašče ŭ červieni 2024 hoda.
Zabarona nie raspaŭsiudžvajecca na tavary, jakija pasažyr vykarystoŭvaje padčas pajezdki (pradukty vahoj nie bolš za 2 kiłahramy) u adkrytych upakoŭkach. Umoŭna kažučy, kali ŭ vas u sumcy adkryty pačak piečyva, jaki vy jaście pa darozie ź Minska ŭ Vilniu, pretenzij z boku litoŭskaj mytni da vas nie budzie.
Pa zakonie ŭ vypadku, kali mytniki złoviać vas na sprobie ŭtojvańnia tavaraŭ, zabaronienych da ŭvozu, jany mohuć skłaści administracyjny pratakoł.
«Pakinuli tolki adnu cyharetu». Što ciapier adbyvajecca pry pierachodzie biełaruska-litoŭskaj miažy
«Paraili chacia b raz na hod pryjazdžać». Biełarus nie byŭ u krainie 2,5 hoda i trapiŭ na dopyt na miažy
Brytanski błohier, jaki zmahaŭsia za biełaruski DNŽ i chadziŭ da Kubrakova, usio ž vyjechaŭ ź Biełarusi. Vypuścili nie ź pieršaj sproby
«Telefanujcie dzieciam, prasicie viarnucca ŭ Biełaruś». Biełarusy na miažy sutyknulisia z novaj pravierkaj
Kamientary