Kiroŭcy ŭsio bolš niezadavolenyja samymi novymi technałohijami ŭ svaich aŭto
Naprykład, dźviarnymi ručkami raniej prosta adkryvali dźviery, a ciapier…
Paśla 2020 hoda vytvorcy aŭtamabilaŭ pačali dadavać u svaje madeli infračyrvonyja prybory dla načnoha bačańnia, siezonnaje vonkavaje aśviatleńnie, unutranyja «siamiejnyja kamiery», na jakich bačna zadnija miescy, i šmat čaho inšaha, piša The Wall Street Journal.
Ale mnohija kiroŭcy kažuć, što heta ŭžo zašmat. Pa infarmacyi daśledčaj kampanii Strategic Vision, intuityŭnaść, ź jakoj možna kiravać aŭto, źniziłasia z 79% u 2015 hodzie da 56% u 2024 hodzie.
Takuju ž tendencyju zaŭvažyli ŭ dačynieńni da ŭsprymańnia kiroŭcami dyspłejaŭ, ekrannych interfiejsaŭ i ahułam kampanoŭki prybornaj paneli.
U cełym kiroŭcy zadavolenyja novymi technałohijami ŭ mašynach, ale jany pavinny «być prostymi jak iPhone». Bolšaść takimi nie źjaŭlajucca, kaža Alaksandr Edvards, prezident Strategic Vision.
WSJ raspaviadaje historyju Vincenta Dziufa-Biedara: u studzieni kiroŭca sprabavaŭ dystancyjna zapuścić zaradku dla svajho elektryčnaha Volkswagen ID.4 2024 hoda vypusku z dapamohaj prykładańnia dla telefona.
U jaho nie atrymałasia — pryjšłosia nočču vychodzić z domu. Ale i dźviarnyja ručki mašyny, abstalavanyja roznymi datčykami, nie spracavali ad marozu nočču, tamu 36-hadovamu inžynieru daviałosia załazić u svaju mašynu praz bahažnik.
«Prosta dajcie mnie narmalnuju dźviarnuju ručku», — skazaŭ jon.
Pa źviestkach J. D. Power, amierykanskaj kampanii pa analitycy danych, u 2024 hodzie ŭładalniki elektramabilaŭ z akumulatarnymi batarejami amal u 3 razy čaściej paviedamlali ab tym, što ich dźviarnyja ručki pracujuć z prablemami, čym u 2020 hodzie.
Taksama kiroŭcaŭ razdražniajuć sensarnyja paneli ŭ mašynach, raskazaŭ vydańniu Džejk Prat, 35-hadovy prajektny mieniedžar. Pa jaho słovach, dla źmieny naład na takich dyspłejach, na ich pastajanna treba hladzieć.
«Vy pavinny siadzieć i hladzieć na toje, što robicie, a heta značyć, što vy nie hledzicie na darohu», — kaža Prat.
Pavodle apytańnia, praviedzienaha kansałtynhavaj firmaj Escalent u 2022 hodzie, tolki kala 28% pakupnikoŭ novych aŭtamabilaŭ vybirajuć dla siabie sensarnyja ekrany.
Funkcyi, jakija kiroŭcam čaściej padabajucca — biespravadnyja zaradki dla telefonaŭ, padahreŭ i vientylacyja siadzieńnia, škłoačyščalniki z datčykami daždžu i ŭbudavanyja pyłasosy.
Niekatoryja kiroŭcy kažuć, što nie chočuć płacić za mnostva technałohij, ad jakich jany admovilisia b, kali b mahli. Ale, pa słovach Eda Kima, hałoŭnaha analityka markietynhavaj kampanii AutoPacific, technałohii nie zaŭsiody mocna ŭpłyvajuć na ceny aŭtamabilaŭ.
Pamior palitviazień Valancin Štermier. «Ledź chadziŭ paśla insultu — a jaho kinuli ŭ ŠIZA»7
Kamientary