U Jeŭropie skłali płan pa abaronie nieba Ukrainy ad rakietnych napadaŭ

Prapanavanaja jeŭrapiejcami zona pavietranaj abarony Ukrainy budzie dziejničać asobna ad NATA. Jana achopić Lvoŭ, Adesu i try atamnyja elektrastancyi (Rovienskuju, Chmialnickuju i Paŭdniova-Ukrainskuju), ale nie zakranie liniju frontu.

Zhodna z zadumkaj, takoje rašeńnie moža «akazać bolšy vajskovy, palityčny i sacyjalna-ekanamičny efiekt, čym 10 tysiač jeŭrapiejskich suchaputnych vojskaŭ», i nie spravakuje bolš maštabny kanflikt z Rasijaj.

«Niabiesny ščyt» moža stać častkaj «pieramirja ŭ niebie», napiaredadni prapanavanaha ŭkrainskim prezidentam Uładzimiram Zialenskim.

Jak miarkujecca, płan byŭ raspracavany byłymi płaniroŭščykami Karaleŭskich VPS Vialikabrytanii sumiesna z Uzbrojenymi siłami Ukrainy, piša The Guardian. Prajekt užo padtrymali były hałoŭnakamandujučy siłami NATA ŭ Jeŭropie Filip Brydłaŭ, były namieśnik hałoŭnakamandujučaha siłami NATA ŭ Jeŭropie Ryčard Šyref, były prezident Polščy Alaksandr Kvaśnieŭski i były kiraŭnik MZS Litvy Habryelus Łandśbierhis.

«Realizacyja prajekta «Niabiesny ščyt» stała b važnym kampanientam uzmacnieńnia Jeŭropy, jaki harantuje biaśpieku Ukrainy efiektyŭna i jakasna», — zajaviŭ Łandśbierhis.

Jak adznačaje The Guardian, raniej kiraŭniki jeŭrapiejskich krain nie žadali sankcyjanavać patrulavańnie ŭkrainskaha nieba padčas bajavych dziejańniaŭ.

Prajekt pavietranaj abarony Ukrainy nabyŭ novy impuls u Jeŭropie paśla svarki Uładzimira Zialenskaha z prezidentam ZŠA Donaldam Trampam i prypynieńnia amierykanskaj vajskovaj dapamohi USU. Heta pryviało da «chutkaha ŭśviedamleńnia» ŭ Jeŭropie, što ciapier kantynient pavinien uziać na siabie viadučuju rolu ŭ padtrymcy Kijeva i dać jamu harantyi biaśpieki ŭ ramkach patencyjnaha mirnaha pahadnieńnia z Maskvoj.

Zrešty, u zachodnich palityčnych kołach aścierahajucca, što «Niabiesny ščyt» moža pryvieści da surjoznaj eskałacyi bajavych dziejańniaŭ u vypadku paražeńnia źniščalnika krainy — člena NATA abo Rasii. Prychilniki prajekta ŭ adkaz na heta śćviardžajuć, što «ryzyka dla piłotaŭ «Niabiesnaha ščyta» nievialikaja», bo z pačatku 2022 hoda Maskva nie vyvodziła svaje bajavyja samaloty za miežy najaŭnaj linii frontu.

Faktyčnaja adlehłaść ad zony dziejańnia rasijskaj avijacyi składzie bolš za 200 km, ličać aŭtary płana. Na ich dumku, patrul ź jeŭrapiejskich źniščalnikaŭ zmoža abaranić Kijeŭ ad udaraŭ rakietami i bieśpiłotnikami.

«Ich źniščeńnie — heta nahruzka na najaŭnuju supraćpavietranuju abaronu Kijeva, častka jakoj — u pryvatnaści, pierachopniki Patriot — vyrablajecca ŭ ZŠA, a papaŭnieńnie zapasaŭ padpadaje pad zabaronu Biełaha doma», — padkreślivaje The Guardian.

• 14
• 1
• 2
• 0
• 0
• 0
• 0
• 0