U lutym na volu vyjšli jak minimum 16 biełaruskich palitźniavolenych: 13 całkam adbyli terminy, jašče troje byli pamiłavanyja Łukašenkam i vyviezienyja ź Biełarusi. «Viasna» ŭ štomiesiačnym dajdžeście raskazała pra vyzvalenych palitviaźniaŭ Hienadzia Drazdova, Alaksandra Paškieviča i Andreja Kandrasiuka.
Adzin z tych, chto ŭ lutym vyjšaŭ na volu — mastak Hienadź Drazdoŭ, jaki pravioŭ bolš za 2 hady i 6 miesiacaŭ u źniavoleńni.
Mastaka i byłoha kiraŭnika tvorčaj supołki «Pahonia» zatrymali ŭ siaredzinie žniŭnia 2022 hoda. Sud pryznačyŭ jamu 15 sutak aryštu, ale na volu jon tak i nie vyjšaŭ. Adrazu paviedamlałasia, što suprać Hienadzia zaviali kryminalnuju spravu za «aktyŭny ŭdzieł u akcyjach pratestu» ŭ 2020 hodzie (art. 342 KK), adnak paźniej stała viadoma, što jaho vinavaciać u «sadziejničańni ekstremisckaj dziejnaści» (č. 1 art. 361-4 KK). Viasnoj 2023 hoda jamu pryznačyli try hady pazbaŭleńnia voli.
Termin mužčyna adbyvaŭ u škłoŭskaj kałonii № 17, adkul, pa padlikach pravaabaroncaŭ, vyjšaŭ na volu pa zakančeńni terminu naprykancy lutaha 2025 hoda. Viadoma, što zimoj 2023 hoda Hienadzia źmiaščali ŭ ŠIZA. U niavoli mastak pieranios dva insulty.
Inšy vyzvaleny palitźniavoleny, Alaksandr Paškievič, pravioŭ u niavoli bolš za 2 hady i 7 miesiacaŭ.
Palitviazień byŭ zatrymany 20 studzienia 2022 hoda ŭ miežach kryminalnaj spravy «ab hrupavych dziejańniach, što hruba parušajuć hramadski paradak» (č. 1 art. 342 KK).
15 krasavika 2022 hoda byŭ vyniesieny prysud: Alaksandra pryznali vinavatym i pryznačyli jamu try hady abmiežavańnia voli z nakiravańniem u papraŭčuju ŭstanovu adkrytaha typu. Mužčynu vyzvalili ŭ zale suda da nakiravańnia ŭ PUAT. 9 lipienia 2022 hoda Alaksandr pačaŭ adbyvać pakarańnie ŭ mazyrskim PUAT № 21. Pa padlikach pravaabaroncaŭ, jon vyjšaŭ na volu naprykancy lutaha.
Andrej Kandrasiuk vyzvaliŭsia paśla bolš za 3 hady i 9 miesiacaŭ u źniavoleńni.
Žychara Bresta abvinavacili va «ŭdziele ŭ masavych biesparadkach» (č. 2 art. 293 Kryminalnaha kodeksu) za akcyi pratestu ŭ Breście 9-10 žniŭnia 2020 hoda.
10 žniŭnia padčas akcyi pratestu Andrej byŭ mocna źbity AMAPam. Jon chacieŭ advieści ŭ bok ad AMAPu žančynu, paśla čaho jaho schapili siem siłavikoŭ i mocna źbili. U RAUS milicyja vyklikała chutkuju, bo Andrej uvieś byŭ u kryvi. Jon trapiŭ u balnicu: u jaho byli traŭma hałavy, hiematomy pa ŭsim ciele, jamu nakładali švy. Pa fakcie źbivańnia Kandrasiuka była padadziena zajava ŭ Śledčy kamitet na ŭzbudžeńnie kryminalnaj spravy. Hetaja sprava tak i nie była zaviedzienaja, ale na samoha Andreja naprykancy 2020 hoda zaviali spravu za «ŭdzieł u masavych biesparadkach».
U krasaviku 2021 hoda jaho zatrymali i źmiaścili pad vartu. Užo praz čatyry miesiacy jamu pryznačyli 4 hady pazbaŭleńnia voli. Pa padlikach pravaabaroncaŭ, palitviazień vyjšaŭ z PK № 15 na volu 2 lutaha.
«Skazali: Ejsmant na ciabie vielmi zły». Ksienija Łuckina — pra padziei na BT u 2020-m, kałoniju i ciažkuju chvarobu
Paćvierdžanaja infarmacyja pra vyzvaleńnie piaci palitźniavolenych z Homielščyny
«Dzieci skazali, što ja zdradziła im». Vyviezienaja palitźniavolenaja Alena Maŭšuk raskazała pra siamiejnuju dramu
Stała viadoma, što za amierykaniec niadaŭna byŭ vyzvaleny ź biełaruskaj turmy
Ciapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary