Paćvierdžanaja infarmacyja pra vyzvaleńnie piaci palitźniavolenych z Homielščyny
Čaćviora ź ich vyjšli na volu pa skančeńni pryznačanaha karnikami terminu, adzin — praz pamiłavańnie, piša «Homielskaja viasna».
8 žniŭnia 2024 hoda vyzvaliŭsia Pavieł Piskun z Mazyra. 18 lipienia 2022 hoda, kali jamu było ŭsiaho 18 hadoŭ, sudździa Homielskaha abłasnoha suda Alaksandr Piskunoŭ asudziŭ da troch hadoŭ źniavoleńnia za toje, što Pavieł źniaŭ dy vysłaŭ videa miedyjam, dzie zafiksavaŭ pierasoŭvańnie zamiežnych vajskovych padraździaleńniaŭ z Rasii vakolicami Mazyra.
Zrabiŭ heta jon padčas pieršych dzion paŭnamaštabnaha ŭzbrojenaha ŭvarvańnia rasijskich vojskaŭ va Ukrainu z terytoryi Biełarusi. Piskunoŭ interpretavaŭ heta, jak sadziejničańnie ekstremisckaj dziejnaści pavodle častak 1 i 2 artykuła 361-4 Kryminalnaha kodeksa. 23 vieraśnia 2022 hoda pravaabarončaja supolnaść vyznała Paŭła Piskuna palityčnym źniavolenym.
Alaksandr Skvarcoŭ z Homielskaha rajona vyzvaliŭsia pa skančeńni pryznačanaha terminu 22 kastryčnika minułaha hoda.
Jaho ŭtrymlivali ŭ karnaj PU adkrytaha typu № 55 u Minsku. Abmiežavańnie voli jamu 8 vieraśnia 2021 hoda prysudziła sudździa Homielskaha rajona Tamara Zastaŭnieckaja. Zastaŭnieckaja kvalifikavała realizacyju prava na svabodu vykazvańnia mierkavańniaŭ, jak złačynstva praz artykuł 369 KK (abraza pradstaŭnika ŭłady). 6 lutaha 2024 hoda pravaabarončaj supolnaściu Biełarusi Alaksandr Skvarcoŭ byŭ pryznany palityčnym źniavolenym.
13 studzienia z PU adkrytaha typu vyzvaliŭsia žychar Homiela Vital Maskaloŭ. Jaho ŭ kastryčniku 2021 hoda da troch hadoŭ abmiežavańnia voli prysudziŭ sudździa suda Čyhunačnaha rajona Homiela Alaksiej Chłyščankoŭ za vykazanaje ŭ internecie mierkavańnie pra vajenkoma Homielskaj vobłaści Andreja Kryvanosava. 22 sakavika 2022 hoda biełaruskija pravaabaroncy pryznali Maskalova palityčnym źniavolenym.
15 lutaha vyjšaŭ na volu Michaił Listapadaŭ — 50-hadovy žychar Salihorska. Jon byŭ zatrymany pry sprobie pierachodu miažy z Ukrainaj u Homielskaj vobłaści. Paźniej jaho zasudzili ŭ Homielskim abłasnym sudzie na zakrytym pasiadžeńni pavodle častki 1 artykuła 342 Kryminalnaha kodeksa «Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich», častki 1 art. 13 «Padrychtoŭka da złačynstva» i častki 1 art. 361-3 «Udzieł na terytoryi zamiežnaj dziaržavy va ŭzbrojenym farmiravańni albo ŭzbrojenym kanflikcie, vajennych dziejańniach, viarboŭka albo padrychtoŭka asobaŭ da takoha ŭdziełu».
Alaksiej Chłyščankoŭ prysudziŭ jamu try hady pazbaŭleńnia voli ŭ kałonii ahulnaha režymu. 16 žniŭnia 2022 hoda pravaabarončaja supolnaść krainy vyznała Michaiła Listapadava palityčnym źniavolenym.
Taksama pravaabaroncy daviedalisia, što 20 listapada minułaha hoda praz pamiłavańnie vyzvaliŭsia palitviazień Uładzimir Maškoŭski z Mazyra.
U krasaviku 2023 hoda sudździa Valancina Novikava pryjšła da vysnovy, što Maškoŭski vinavaty ŭ arhanizacyi i padrychtoŭcy dziejańniaŭ, jakija parušajuć hramadski paradak, abo ŭdziele ŭ ich (č. 1 art. 342 KK), paklopie na Łukašenku (č. 2 art. 367 KK), abrazie Łukašenki (č. 1 art. 368 KK) i abrazie pradstaŭnika ułady (art. 369 KK). Novikava prysudziła Maškoŭskamu 2,5 hoda.
5 kastryčnika 2023 hoda biełaruskija pravaabaroncy pryznali Uładzimira Maškoŭskaha palityčnym źniavolenym.
Ciapier čytajuć
Chłopca, jaki ŭ Lebiedzievaj chajaŭ Jeŭropu, asudzili za ŭdzieł u pratestach i ŭchileńnie ad vojska3
Kamientary