Biełaruskija ŭłady zasakrecili źviestki pra ŭładalnikaŭ sietki restaranaŭ chutkaha charčavańnia «Mak.Baj» (ex-Mcdonald’s) u Adzinym dziaržaŭnym rehistry jurydyčnych asob i indyvidualnych pradprymalnikaŭ (ADR), piša «Biuro».
U červieni 2024 hoda ŭ jaje źmianiŭsia ŭładalnik. Sietka restaranaŭ stała naležać praz kampaniju «Kvolici Fud» dvaim biełarusam — Alaksieju Saŭčuku i Viktoryi Dańko. Saŭčuk vałodaje małakapierapracoŭčymi zavodami ŭ Biełarusi i Rasii i ŭvachodzić u top-30 paśpiachovych biełaruskich biznesoŭcaŭ.
Niemahčyma dakładna skazać, kali dadzienyja pra ŭładalnikaŭ byli schavanyja, ale dzieści pamiž 10 červienia 2024 hoda i 13 lutaha 2025 hoda jany źnikli z rejestra jak u kampanii «Mak.Baj», tak i ŭ «Kvolici Fud».
Raniej biełaruskaja dziaržava ŭ asobie Dziaržkammajomaści praz sud zmahła zabrać sabie sietku restaranaŭ chutkaha absłuhoŭvańnia ŭ papiarednich uładalnikaŭ — sinhapurskaj firmy KSB Victory Restaurants PTE.LTD. Joju ŭ svaju čarhu vałodaŭ kazachstanski biznesoviec Kajrat Baranbajeŭ i dyrektarka biełaruskaj sietki restaranaŭ Mcdonald's Viktoryja Dańko.
Sudovyja rašeńni pa hetaj spravie byli taksama zasakrečanyja. U Banku dadzienych sudovych pastanoŭ pa hetaj spravie zachoŭvajucca tolki fajły sa šmatkropjem. Usia rezalutyŭnaja častka schavanaja ad hramadskaści, chacia rašeńni pa ekanamičnych spravach raniej publikavalisia ŭ adkrytym dostupie.
Heta nie pieršy vypadak, kali ŭłady zasakrečvajuć infarmacyju pra ŭładalnikaŭ kampanij. Raniej Belpol raskazvaŭ pra kampaniju «Uschod Propiertyz Mieniedžmient», jakaja vałodaje adnoj z rezidencyj Alaksandra Łukašenki na Zasłaŭskim vadaschoviščy i atrymlivaje hrošy ad struktur bratoŭ Karyčaŭ. Dyk voś u hetaj kampanii taksama vydalenyja źviestki pra ŭładalnikaŭ z ADR.
Ale i heta nie ŭsio. «Biuro» znajšło infarmacyju, što adno z pradpryjemstvaŭ «kašalka» Łukašenki — Alaksieja Aleksina — pastaŭlaje ŭ novy «Mak.Baj» svaju pradukcyju. U lipieni 2023 hoda Ministerstva antymanapolnaha rehulavańnia i handlu paviedamlała, što sietka restaranaŭ «pierachodzić na ajčynnyja pradukty». Vyjaviłasia, što kampanija «Vieles-Mit», jakaja naležyć siamji Alaksieja Aleksina, — pastaŭščyk burhiernych katlet i viandliny dla sietki restaranaŭ.
Raniej «Naša Niva» sa spasyłkaj na svaje krynicy paviedamlała, što pryhladvać za «Mak.Baj» pastavili jakraz blizkaha da Alaksandra Łukašenki biznesoŭca — Alaksieja Aleksina.
Adnak heta nie adzinyja bujnyja biełaruskija pastaŭščyki ŭ novaj-staroj sietcy. Taksama biełaruskuju pradukcyju ŭ restarany «Mak.Baj» pastaŭlaje «Savuškaŭ pradukt» (małočnyja pradukty), «Siervaluks» (pradukty z kurycy) i «Salihorskaja ptuškafabryka».
Stała viadoma, što za 200 tysiač jeŭra prapanoŭvali Siarhieju Cichanoŭskamu «biełaruskija biznesmieny»12
Kamientary