Livijskaja delehacyja abmiarkoŭvała ŭ Minsku ŭzmacnieńnie VPS i madernizacyju vajskova-marskoj bazy ŭ Tabruku
Vizit fieldmaršała Livijskaj nacyjanalnaj armii (ŁNA) Chalify Chaftara i jahonych synoŭ Sadama i Chaleda byŭ nakiravany na ŭmacavańnie suviaziaŭ ź Minskam u vajskovaj śfiery, piša Reform.news sa spasyłkaj na Agenzia Nova.
«Asnoŭnaj metaj [vizitu] źjaŭlajecca ŭzmacnieńnie vajskova-pavietranych sił ŁNA, uklučajučy techničnaje absłuhoŭvańnie i madernizacyju rasijskich źniščalnikaŭ MiH-29. U dadatak da pastavak zapčastak abmiarkoŭvałasia padrychtoŭka livijskich piłotaŭ i raźvićcio kibierbiaśpieki», — paviedamlaje vydańnie.
Krynicy taksama źviartajuć uvahu na jašče adnu temu abmierkavańniaŭ: pytańnie madernizacyi vajskova-marskich baz na ŭschodzie Livii, uklučajučy stratehična važny vajskovy abjekt u Tabruku. Hety kompleks, raźmieščany pablizu horada Kaminies, za 60 kiłamietrach ad Bienhazi, zajmaje terytoryju bolš za 5400 hiektaraŭ i ŭklučaje avijabazu, marski port, navučalnyja centry i žyłyja zony dla vajskoŭcaŭ.
Pry hetym aficyjnaj metaj vizitu, jaki pačaŭsia 17 lutaha, paznačałasia uzajemadziejańnie Livii i Biełarusi ŭ humanitarnaj i sacyjalnaj śfierach, a taksama ekanamičnaje supracoŭnictva.
Pra vajskovuju tematyku pieramoŭ śviedčyła sustreča načalnika štaba suchaputnych vojskaŭ ŁNA hienierał-lejtenanta Sadama Chaftara ź ministram abarony Biełarusi Viktaram Chreninym 18 lutaha.
«Ministr abarony Biełarusi vysoka acaniŭ rolu ŁNA ŭ padtrymańni biaśpieki i stabilnaści ŭ Livii, adznačyŭšy, što stabilnaść Livii źjaŭlajecca klučavym faktaram stabilnaści rehijonu», — paviedamiła pres-słužba ŁNA.
U Livii ciapier idzie hramadzianskaja vajna i centralny ŭrad u Trypali nie kantraluje bolšuju častku terytoryi krainy. Na niepadkantrolnaj terytoryi akurat vaładaryć Livijskaja nacyjanalnaja armija na čale z Chalifoj Chaftaram, tamu jon źjaŭlajecca nie prosta vojenačalnikam, a faktyčna pravicielem hetaj terytoryi.
Chaftar maje ciesnyja suviazi z prezidentam Rasii Uładzimiram Pucinym, i mienavita ŭ Liviju, na kantralavanuju im terytoryju ciapier pieravodziacca vojski z vajskovych baz u Siryi, jakim stała tam nie vielmi ŭtulna paśla zrynańnia režymu Bašara Asada ŭ kancy minułaha hoda. Va ŭschodniaj častcy Livii Rasija sprabuje pašyryć avijabazu Al-Chadym i stvaryć vajskova-marskuju bazu ŭ Tabruku.
Ciapier čytajuć
Deputatka, jakaja rychtuje pryhažuń dla Łukašenki, vyjšła zamuž23
Kamientary