Pravaabaroncy paviedamili, što palitviaźniam nie dachodziać hrašovyja pieravody. Svajaki paćviardžajuć
Paštovaja sistema Biełarusi nibyta atrymała novyja śpisy asudžanych, jakim zabaroniena pierasyłać hrošy, paviedamili pravaabaroncy z Mayday.team. Pavodle źviestak krynicy, prablemy z adpraŭkaj hrašovych srodkaŭ viaźniam pačalisia prykładna z 16 studzienia 2025 hoda. Akazałasia, što prablemy ź pieravodam hrošaj palitviaźniam sapraŭdy jość, daviedałasia «Radyjo Svaboda».
«Asudžanyja, jakim jašče naprykancy śniežnia hrošy dachodzili biez prablem, ciapier apynulisia ŭ «čornym śpisie». Supracoŭniki paštovych adździaleńniaŭ nie chavajuć, što śpisy pryjšli ź Minska i tyčacca palityčnych viaźniaŭ», — paviedamlajuć pravaabaroncy.
Źviestki ad pravaabaroncaŭ častkova paćvierdzili «Radyjo Svaboda» svajaki dvuch palitviaźniaŭ, imiony jakich nie nazyvajucca, kab im nie naškodzić.
Kaciaryna, žonka palitviaźnia M., jaki znachodzicca ŭ SIZA i pakul čakaje novy prysud, dahetul nie viedaje, ci dajšli da muža hrošy, jakija jamu adpraŭlali letaś.
«Jahonaja maci adpraŭlała 100 rubloŭ, a maja siabroŭka — 200 rubloŭ, heta było dakładna da 16 studzienia, ale ja da hetaha času nie maju paćviardžeńnia, što jon atrymaŭ hrošy», — raskazała Kaciaryna.
Pavodle jaje, letaś ź pieravodam hrošaj u kałoniju muža prablem nie było, jon moh svabodna ich tracić u atavarcy.
«Zamaŭlaŭ atavarku, heta dakładna. A što budzie ciapier — nie viedaju. Nie vyklučaju, što ŭ novaj kałonii pačnucca abmiežavańni», — kaža Kaciaryna.
Dačka palitviaźnia I. Palina taksama turbujecca za hrošy, jakija adpravili baćku.
«Dva listy jamu ŭžo adpravili z pačatku hoda, a adkazu niama, i nie viedajem, ci dajšli hrošy. Baimsia: a raptam i jaho ŭklučyli ŭ hety «čorny śpis»? Bo raniej užo praz dva dni viedali, što hrošy dajšli, a ciapier bolš za miesiac — ničoha. Praŭda, moža, jon znoŭ u «sanatoryi»? Tady budziem čakać, jak vyjdzie i napiša. Albo hrošy viernucca. Ale pakul niama ni hrošaj, ni listoŭ», — kaža Palina.
Jaje baćka ŭ turmie ŭžo bolš za dva hady. Raniej hrašovyja pieravody na jahonaje imia dachodzili rehularna, ale tracić u turemnaj kramie jon moh tolki adnu bazavuju vieličyniu ŭ miesiac.
A voś žonka inšaha palitviaźnia, byłoha žurnalista D., paviedamiła «Radyjo Svaboda», što ŭ ich prablem z hrašovymi pieravodami na pačatku hoda nie ŭźnikła.
«U nas takich prablem niama. Naprykancy studzienia dasyłali mužu hrošy, jon napisaŭ, što jany dajšli. Ale ž jon «ekstremist», tamu maje abmiežavańnie: na atavarku tolki adna bazavaja vieličynia. Ale na rachunak možna dasyłać kolki zaŭhodna. Inšyja hrošy jon moža patracić na vypisvańnie haziet, časopisaŭ, nabyćcio knih», — raskazała žonka palitviaźnia D.
Były palitviazień, pravaabaronca «Viasny» Leanid Sudalenka zhadaŭ, što ŭ kałonii «Vićba-3», dzie jon adbyvaŭ pakarańnie, tolki viaźni z čyrvonaj birkaj «terarysta» byli pazbaŭlenyja prava atrymlivać hrošy na rachunak.
«Takich u nas było prykładna adzin na sto. Im uvohule zabaraniałasia dasyłać hrošy. A «ekstremistam» možna było, tolki ŭ ich byli abmiežavańni na atavarku», — uzhadaŭ Leanid Sudalenka.
Źviestki pra toje, što ź siaredziny studzienia ŭłady dapoŭnili «čornyja śpisy» na atrymańnie hrošaj, Leanid Sudalenka ličyć praŭdapadobnymi.
«Viedaju, što ŭłady i raniej rehularna karektavali hetyja śpisy. Niekaha vyzvalajuć ci pieravodziać na inšy režym, niekaha, naadvarot, sadžajuć, zanosiać u «terarysty» i, adpaviedna, uklučajuć u śpis tych, kamu pieravody zabaronienyja. A jašče jość tyja palitviaźni, jakich trymajuć u režymie «inkamunikada», jak Siarhiej Cichanoŭski, Viktar Babaryka. Miarkuju, jany taksama ŭ hetych «čornych śpisach». Padobna, što na pačatku hoda heta karektujecca», — skazaŭ pravaabaronca.
Z 1 studzienia 2025 hoda bazavaja vieličynia ŭ Biełarusi — 42 rubli, letaś była 40 rubloŭ. Na adnu bazavuju vieličyniu ŭ biełaruskaj turmie možna nabyć niekalki ŭpakovak kavy, piečyva, cukierak i šakaładu, a ŭ letni siezon — niekalki kiłahramaŭ jabłykaŭ, cybuli ci ahurkoŭ.
Pavodle nazirańniaŭ byłych palitviaźniaŭ, da 10% źniavolenych u kałonijach, choć i nie pazbaŭlenyja prava atrymlivać hrašovyja pieravody, nie majuć nijakich hrašovych pastupleńniaŭ na svaje rachunki, bo im nichto nie dapamahaje.
Tolki žminda i lanivy nie padtrymlivaje «Nivy»! Vy možacie za chvilinu padtrymać «NN» padachodnym, nie patraciŭšy ni kapiejki svaich5
Kamientary