«Kolki pavinien zarablać chłopiec u Minsku, kab sustrakacca z vami?» Skandał vakoł vuličnaha apytańnia
Kamanda prajekta «Śliŭki.baj» u centry stalicy źviarnułasia da žančyn z pytańniem pra ich finansavyja patrabavańni da partniora. Vyniki vyklikali aktyŭnuju dyskusiju. U kamientaryi pryjšła navat viadomaja madel Ženia Katava.
Pytańnie hučała tak: «Kolki pavinien zarablać chłopiec u Minsku, kab sustrakacca z vami?». Pieršymi adkazvali dźvie siabroŭki. Adna pryznałasia, što štotydzień vydatkoŭvaje na siabie $2000. Druhaja skazała: «Ad 5 tysiač, moža, 10 tysiač dalaraŭ». Siabroŭka zaśmiajałasia: «Jana abiastłuščvaje mužčyn!»
Dalej adkazy byli samyja roznyja. Čatyry dziaŭčyny adznačyli, što dachod patencyjalnaha maładoha čałavieka pavinien startavać ad $5 tysiač. Čatyry apytanyja pryznalisia, što dla ich minimalny zarobak chłopca składaje ad $1500-3000.
«Chacia b na 5 tysiač rubloŭ» pahadziłasia b adna dziaŭčyna. Jašče niekalki ahučyli sumy ad 2 da 3 tysiač rubloŭ.
— Nie zaŭsiody patrebny hrošy dla taho, kab kachać i pakazvać kachańnie, — adkazała adna ź dziaŭčat.
A apošniaja ŭdzielnica apytańnia zaśmiajałasia i skazała: «Choć kolki! Hałoŭnaje, kab mužčyna byŭ emacyjanalna zdarovym».
Dla paraŭnańnia: pavodle źviestak Biełstata, siaredni zarobak «čystymi» ŭ žycharoŭ Minska ŭ minułym listapadzie skłaŭ $782.
Za piać dzion videa nabrała ŭ instahramie 1,7 miljona prahladaŭ i 15 tysiač łajkaŭ. A ŭ kamientaryjach pačalisia sprečki.
Svajo mierkavańnie vykazała i Ženia Katava — madel z Barysava, jakaja stała papularnaj na Zachadzie i ciapier demanstruje na podyumach vopratku ad luksavych brendaŭ. Jana taksama žonka Vitala Jacuka — syna multymiljaniera Alaksandra Jacuka, zasnavalnika zbankrutavałaj handlovaj sietki «Vitalur».
«Apošniaja dziaŭčyna — top», — napisała Ženia Katava.
Bolšaść kamientataraŭ ščyra aburyłasia sumami, jakija hučali ŭ apytańni. Adna dziaŭčyna sumna spytała, dzie ž u Biełarusi maładyja ludzi mohuć zarablać $2-3 tysiačy: «Ja adrazu ž tudy ŭładkujusia. Nie razumieju, adkul takija ŭjaŭleńni ab žyćci i ličby ŭ hałavie?»
U abaronu ŭdzielnic apytańnia vystupiła minskaja błohierka Nika Pamidorka, jakaja maje 406 tysiač padpisčykaŭ u instahramie: «Miesiac dla narmalnaha žyćcia ŭ Minsku ź dziciom — adna tysiača dalaraŭ. Z dvuma ŭžo inšyja ličby. Pra troch dziaciej navat maŭču. Prykładna $5 tysiač i sychodzić. Heta kali siaredniaje žyćcio z kvateraj, mašynaj, dziciačymi hurtkami, kafe, nievialikimi pakupkami i nie tolki ježy, plus niejkija zabaŭki pa vychodnych. Nie, nu možna i na «papiccot» žyć. Ale nie ŭ Minsku. I bieź dziaciej. I bieź ježy».
Takoje mierkavańnie padtrymała jašče adna staličnaja błohierka Vola Biencyjeŭskaja (jana nazyvaje siabie samaj papularnaj masažystkaj krainy i maje 35 tysiač padpisčykaŭ u instahramie).
Jana napisała: «Nie vielmi zrazumiełaje abureńnie. Dziaŭčaty, sustrakajučysia z chłopcam, vierahodna razhladajuć jaho jak partniora dla žyćcia, jaki praz hod aženicca, praz dva jana ŭ dekrecie. A značyć, siamju niekalki hadoŭ budzie karmić mužčyna. U Minsku žyćcio nievialikaj siamji — heta dźvie tysiačy dalaraŭ biez šyku, u niedarahoj kvatery ź nievialikim kredytam na mašynu, narmalnaj ježaj, kafe raz na tydzień i adpačynkam raz na hod. Dzie tut miesca dla isteryk?»
Ciapier čytajuć
Pamiatajecie palitviaźnia Vituchnoŭskaha, jaki pajšoŭ vajavać za Rasiju? Jon užo zahinuŭ10
Pamiatajecie palitviaźnia Vituchnoŭskaha, jaki pajšoŭ vajavać za Rasiju? Jon užo zahinuŭ
«Siomaja DNK-ekśpiertyza paćvierdziła: Alaksiej ź biełaruskaj vioski Rymucieŭcy — baćka Chansa». Jak narviežac znajšoŭ baćku-biełarusa praz 78 hadoŭ77
Kamientary