Usio-tki kancerahien. Voś što navukoŭcy vyśvietlili pra papularny napoj jerba mate
Amatary hetaj harbaty nazyvajuć jaje zdarovaj alternatyvaj kavie. Jana daje enierhiju, dapamahaje schudnieć, pavyšaje kancentracyju i ŭmacoŭvaje imunitet. Ale ŭ jaje jość i ciomnyja baki.
Havorka idzie pra jerba mate (yerba mate). «Naša Niva» i raniej pisała pra jaje.
Polski partał Pacjent.pl, spasyłajučysia na navukovyja daśledavańni, tłumačyć, što ŭžyvańnie jerba mate moža mieć surjoznyja pabočnyja efiekty.
Navukoŭcy vyjavili, što ŭ jerbie mate prysutničaje kancerahiennaje rečyva — policykličny aramatyčny vuhlevadarod (PAV). Heta toje ž rečyva, jakoje znachodzicca taksama ŭ vendžanym miasie i cyharetnym dymie. Heta asnoŭnaja pryčyna, čamu varta abmiežavać užyvańnie hetaha napoju.
Daśledavańnie 2019 hoda taksama pakazała, što ludzi, jakija nie kuryli, ale pili mate, mieli ŭ arhaniźmie stolki ž škodnych rečyvaŭ, kolki i kurcy.
Zhadvajecca taksama inšaje daśledavańnie, metaj jakoha było supastavić vyniki ŭžyvańnia jerby mate i vykurvańnia 100 cyharet. Navukoŭcy adznačyli, što tradycyjny sposab zavarvańnia napoju ź vialikaj kolkaści liścia i nievialikaj kolkaści vady moža pryvieści da takoj kancentracyi bienzapirenu, jakaja ŭtvarajecca ŭ vyniku vykurvańnia čatyroch-piaci pačak papiarosaŭ.
I choć sposab traplańnia rečyva ŭ arhanizm u hetych vypadkach adroźnivajecca, treba pamiatać pra mieru i nie pić mate tak, jak rajać niekatoryja vytvorcy, heta značyć na praciahu ŭsiaho dnia.
Jašče adna niebiaśpieka źviazana ź pićciom haračaha mate. Pićcio vielmi haračaj harbaty moža vyklikać termičnyja traŭmy i pavyšaje ryzyku raku, a ŭ vypadku jerby na heta nakładvajucca dadatkovyja ryzyki, ab jakich była havorka vyšej.
Najčaściej jerba mate pradajecca ŭ vyhladzie źmielenych liściaŭ u pakiecikach, jak zvyčajnaja harbata. Hety sposab padrychtoŭki ličycca bolš biaśpiečnym. Akramia taho, rekamiendujecca astudžać napoj pierad užyvańniem.
Daśledavańni jerby mate praciahvajucca, i pradstaŭlenyja vyšej ryzyki hruntujucca na imaviernasnych vysnovach. Tym nie mienš nie varta ich ihnaravać. Lepš abapiracca na zdarovy sens i rekamiendacyi ekśpiertaŭ: adzin kubak astudžanaha napoju ŭ dzień nie naškodzić i nie pavysić ryzyki zachvorvańnia.
Praź dzieviać miesiacaŭ paśla vyzvaleńnia pamior palitviazień Valeryj Bohdan7
Kamientary