U Finlandyi kot Maŭry vyratavaŭ svajho haspadara ad śmiarotnaj niebiaśpieki
11-hadovy kot razbudziŭ svajho haspadara nočču. Kali haspadar narešcie źviarnuŭ uvahu na nastojlivyja tyčki łapkaj, jon zrazumieŭ, što ŭ jaho niebiaśpiečna nizki ŭzrovień cukru ŭ kryvi, piša Yle.fi.
— Heta byŭ užo druhi vypadak, kali Maŭry, kot parody korniš-reks, papiaredziŭ haspadara pra prablemu sa zdaroŭjem, — raspaviadaje staršynia Finskaj asacyjacyi katoŭ Ryka Turpiejnen.
U Finlandyi štohod uznaharodžvajuć dvuch-troch katoŭ-hierojaŭ, i ŭ minułym hodzie Maŭry byŭ siarod ich.
Pa słovach Turpiejnen, typovyja ŭčynki katoŭ-hierojaŭ uklučajuć papiaredžańni pra pačatak pažaru i abudžeńnie haspadara, jaki pakutuje na dyjabiet, praź niebiaśpiečna nizki ŭzrovień cukru ŭ kryvi, jak u vypadku z Maŭry. Katy paviedamlajuć pra niebiaśpiečnyja situacyi svaimi tryvožnymi ci niezvyčajnymi pavodzinami.
U minułym hodzie zvańnie kata-hieroja atrymali dva hadavancy. Akramia Maŭry, hety tytuł byŭ prysvojeny siamihadovamu katu parody rehdoł pa mianušcy Piory.
— Piory pastajanna abniuchvaŭ televizar, pakul haspadary nie źviarnuli ŭvahu na jaho pavodziny. Vyjaviłasia, što televizar pierahreŭsia i pačaŭ dymicca.
Kali kot ci sabaka papiaredžvaje haspadara pra nizki ŭzrovień cukru ŭ kryvi, chutčej za ŭsio, heta źviazana z tym, što žyvioła zaŭvažaje źmienu pachu, tłumačyć dresiroŭščyca žyvioł i aŭtar navukova-papularnych knih Tuire Kajmijo.
— Ja nie dumaju, što jany ŭśviedamlajuć śmiarotnuju niebiaśpieku dla čałavieka. Kaniečnie, pryjemna dumać, što jany razumiejuć, što ratujuć svaimi pavodzinami. Adnak ja ŭ hetym sumniavajusia, bo ŭ takim vypadku žyvioły pavinny razumieć, što zanadta nizki ŭzrovień cukru niebiaśpiečny.
Pa słovach Kajmijo, takija pavodziny mohuć być źviazana z tym, što kot ci sabaka zaŭvažaje źmieny ŭ stanie haspadara. Naprykład, kali z-za nizkaha ŭzroŭniu cukru jon stanovicca bolš marudlivym abo razdražnionym.
Žyvioły asabliva adčuvalnyja da źmienaŭ u znajomym im asiarodździ. Kajmijo ličyć, što kožny kot ci sabaka moža prajavić siabie jak hieroj u vypadku pažaru.
Kamientary