Piać byłych siłavikoŭ prasili svaich kaleh nie być zališnie žorstkimi. Ciapier im pahražajuć vielizarnyja terminy
Imiony byłych siłavikoŭ z Žodzina Dźmitryja Udovina, Andreja Daroški, Viačasłava Iljiča, Ihara Kiślaka i Vitala Paprockaha źjavilisia ŭ raskładzie sudoŭ. U žniŭni 2020 jany zapisali zvarot, u jakim prasili svaich byłych kaleh nie być karnikami. Ciapier im usim pahražaje da 12 hadoŭ kałonii.
12 žniŭnia 2020 hoda jany zapisali mocny i ščyry zvarot da siłavikoŭ. Na pačatku adznačajecca, što ŭsie mužčyny addali słužbie bolš za 20 hadoŭ. Sam zvarot vyhladaje chutčej jak adčajny kryk u pusteču, a nie jak vyklik. Aficery źviartajucca da kalehaŭ vielmi akuratna. Na samim videa bačna, što jany robiać heta ad serca, a nie z vyklikam.
Spačatku 54-hadovy Ihar Kiślak kaža, što jon vyjšaŭ na piensiju ŭ zvańni padpałkoŭnika. Pa źviestkach «Lusterka», zdabytych praz «Biełpoł», pierad vychadam Kiślak uznačalvaŭ adździeł HUBAZiK Barysaŭskaha RAUS. U 2012 hodzie jon zvolniŭsia, a ŭ 2014-m staŭ pradprymalnikam.
Ihar kaža, što jany słužyli za ideju abarony ludziej i baraćby sa złačynnaściu. Jon aburajecca tym, što siłaviki źbivajuć ludziej, adznačajučy, što «jość niaznačnaja kolkaść pravakataraŭ, ale vy možacie ich izalavać svaimi siłami, a nie vystupać karnikami i supraćpastaŭlać siabie našamu spakojnamu pracavitamu narodu».
Kiślak kaža, što jamu za pieršyja paślavybarčyja dni pazvaniła bolš za 20 znajomych, jakija nie mahli znajści svaich svajakoŭ, choć niekatoryja ź ich nie ŭdzielničali ŭ pratestach uvohule. Jon zaklikaje siłavikoŭ uzhadać, što jany davali prysiahu narodu. «Spadziajemsia na vaša razumieńnie i vaš aficerski honar», — padsumoŭvaje mužčyna.
Dalej vystupaje 61-hadovy Viačasłaŭ Iljič. Jon raspaviadaje, što byŭ namieśnikam načalnika Žodzinskaha HAUS, uznačalvaŭ kryminalnuju milicyju i vyjšaŭ u adstaŭku ŭ 2008-m u zvańni padpałkoŭnika. Pa źviestkach «Lusterka», paśla jon byŭ dyrektaram Žodzinskaha haradskoha centra kultury i zabavaŭ.
Viačasłaŭ kaža, što razumieje, što supracoŭniki niasuć słužbu ŭ vielmi ciažkich umovach.
«Ale časy, kali davodziłasia rabić vybar, byli va ŭsich pakaleńniaŭ — niechta zmahaŭsia z fašyzmam, niechta słužyŭ u Afhanistanie. I mnie davodziłasia prymać udzieł u palityčnych mierapryjemstvach, pačynajučy ad vybaraŭ 1994 hoda. Vam na siońnia nialohka vykonvać vašy abaviazki, ale ja peŭny, što ŭ patrebny čas vy prymiecie pravilnaje rašeńnie, vam padkaža vaša serca.
Vykonvajcie słužbovy doŭh tak, jak vy chacieli b, jak jaho vykonvali [u adnosinach] da vas i vašych blizkich. Tady vy zdolejecie hladzieć u vočy narodu i ciapier, padčas słužby, i paśla, kali budziecie na zasłužanym adpačynku», — kaža Iljič.
Dalej kaža Andrej Daroška. Jamu 54 hady. Jon padpałkoŭnik, pierad piensijaj byŭ namieśnikam načalnika Žodzinskaha HAUS pa ideałahičnym zabieśpiačeńni dy kadrach, vyjšaŭ na piensiju ŭ 2012 hodzie. Viadoma, što jon byŭ vałancioram i dapamahaŭ dzieciam z asablivaściami.
Daroška prosić supracoŭnikaŭ milicyi dziejničać ź ludźmi hetak ža, jak jany b rabili sa svaimi blizkimi. «Nie stvarajcie niepatrebnuju paniku ŭ horadzie, nam tut žyć i raścić dziaciej, nam musić być soramna za pavodziny ŭ horadzie», — kaža na videa Andrej.
Paśla jaho pramaŭlaje 54-hadovy Vital Paprocki. Jon pačynaŭ u 1999 hodzie jak śledčy ŭ milicyi Žodzina. Viadoma, što jon daros da padpałkoŭnika justycyi. Da viasny 2014 hoda Vital pracavaŭ načalnikam Smalavickaha rajonnaha adździeła Śledčaha kamiteta, choć na videa jon kaža, što ŭ zapasie z 2012 hoda — mahčyma, jon prosta ahavaryŭsia.
Paprocki kaža, što ŭsio žyćcio słužyŭ narodu. Vital raspaviadaje, što tyja, chto ŭstupaŭsia za ludziej, byli represavanyja, jon prapanuje «apomnicca dy zadumacca». Paprocki kaža, što padtrymlivaje tych, chto pracuje pa zakonie.
Apošnim pramaŭlaje Dźmitryj Udovin. Jon pačynaŭ u 1990-ja ŭ Barysavie. Paśla 1998 pierajšoŭ u adździeł daznańnia Žodzinskaha HAUS, a z 2004 pa 2012 uznačalvaŭ jaho. Dalej pracavaŭ u Śledčym kamitecie, adtul pajšoŭ na piensiju. Paśla vychadu na piensiju pracavaŭ na Smalavickim małakazavodzie i byŭ haradskim deputatam u Žodzinie.
U jaho jość i ciažkaja asabistaja historyja, pra jakuju pisali ŭ miedyja — u 2016 hodzie syn Dźmitryja, Hleb, ciažka zachvareŭ, ale ŭ vyniku zdoleŭ ačuniać. Paśla Hleb staŭ zorkaj u Žodzinie, bo jaho abrali siarod bolš za 500 pretendentaŭ, kab jon vynies miač na Barysaŭ-Arenu i byŭ tam simvaličnym arbitram.
«U składanaj palityčnaj situacyi, jakaja adbyvajecca ŭ krainie, dumajcie pra tuju formu, jakuju vy nosicie. Ja razumieju, što ŭ vas kredyty, u vas siemji, i składana zrabić vybar, ale vybar možna zrabić zaŭždy.
Vykonvajučy tyja zahady, jakija addajuć vašy načalniki, vy možacie akazacca saŭdzielnikami złačynstvaŭ. Nielha źbivać ludziej, jakija prosta viartajucca dadomu z načnoj źmieny ci z pracy. <…> Ja viedaju vypadki, kali ludziej zatrymlivali za ništo i prajaŭlali zališniuju žorstkaść — nie varta tak rabić», — kazaŭ Udovin u zvarocie.
Sud nad piaćciu byłymi siłavikami pačniecca 13 studzienia 2025 hoda ŭ Minskim abłasnym sudzie. Usich byłych siłavikoŭ sudziać pa dvuch artykułach — «naniasieńnie škody nacyjanalnaj biaśpiecy Biełarusi» (č. 3 art. 361 KK) i «raspalvańnie varožaści» (č. 3 art. 130 KK). Im pahražaje ad piaci da dvanaccaci hadoŭ kałonii.
«Naša Niva» — bastyjon biełaruščyny
PADTRYMAĆCiapier čytajuć
«Ludziej prymušali dumać, što ničoha nikoli nie źmienicca». Chto taki antykamunist Łasła Krasnaharkai, jaki atrymaŭ Nobieleŭskuju premiju pa litaratury?99
Kamientary
Za toje nasamreč im i pomściać chałopy, nie zdolnyja ni na što.