Rasijskija nastaŭniki na zahad biełarusa spalili džynsy, partrety nobieleŭskich łaŭreataŭ i dyski z Windows
Biełaruski akcyjanist Uładzisłaŭ Bochan daručyŭ rasijskim nastaŭnikam pravieści čarhovuju «patryjatyčnuju akcyju». Tyja padklučyli da jaje i dziaciej.
Bochan ad imia «Adzinaj Rasii» razasłaŭ u škoły Tulskaj i Varoniežskaj abłaściej rasparadžeńnie pravieści patryjatyčnuju akcyju «Naš pałymiany adkaz».
Sutnaść akcyi — u spaleńni atrybutaŭ zachodniaj kultury. Bochan daručyŭ nastaŭnikam spalić knihi aŭtaraŭ ź niedružalubnych krain, džynsy, staruju zachodniuju bytavuju techniku, dyski zachodnich vykanaŭcaŭ i inšyja rečy, jakija simvalizujuć «dehradujučuju zachodniuju kulturu».
Nastaŭniki pavinny byli takim čynam prademanstravać patryjatyzm, prychilnaść da tradycyjnych kaštoŭnaściaŭ, ačyščeńnie ad upłyvu niedružalubnych dziaržaŭ, a taksama vykazać padtrymku śpievaku Šamanu, jaki trapiŭ pad sankcyi.
Spravazdačy dasłali piedahohi ź jak minimum dźviuch ustanoŭ. Tak, nastaŭniki Archanhielskaj škoły ŭ Varoniežskaj vobłaści, nasupierak techzadańniu, pryciahnuli da akcyi dziaciej. Pradstaŭniki škoły paviedamili, što ŭdzielniki spalili cacki i knihi ź niedružalubnych krain.
Miarkujučy pa fota, nastaŭniki paličyli niebiaśpiečnymi dla ruskaj kultury knihi pra «Karala lva», paduški z pryncesaj Žaśmin z «Aładzina» i roznyja miakkija cacki, u tym liku Chahi-Vahi. A ŭ śmietnicu adpravilisia skrynki z-pad drukarak i kłavijatur. Sapraŭdy dzieci spalili ŭsie hetyja rečy ci prosta zładzili fotasiesiju dla spravazdačy, niezrazumieła.
Lepš vykanali zadańnie piedahohi z centra adukacyi ŭ Krasnym Jary Tulskaj vobłaści. Jany razdrukavali čorna-biełyja partrety nobieleŭskich łaŭreataŭ i ŭładalnikaŭ «Hremi» i spalili ich. Taksama ŭ vohnišča adpravilisia džynsy, dyski z Windows, skrynki ad fotaaparataŭ.
U Havarenkaŭskaj škole Tulskaj vobłaści ŭdzielničać u akcyi nie stali, patłumačyŭšy ŭsio drennym nadvorjem. A ŭ jašče adnoj škole ŭsio ž vyrašyli zahuhlić adras pošty i zrazumieli, što heta prank.
Bochan padobnym čynam prymušaŭ rasijskich nastaŭnikaŭ nadziavać šapački z folhi dla vyratavańnia ad NATA, składać śpisy školnikaŭ dla adpraŭki ŭ łahiery na pieravychavańnie, ładzić pracesii z vyjavami Ściapana Bandery i Śviatłany Śniažko, pravodzić patryjatyčnyja akcyi pad łozunham «Odin narod, odna nacija, odin praVitiel» u ramkach prahramy «Praca vyzvalaje» ad «Adzinaj Rasii».
Svaje akcyi Bochan nazyvaje daśledavańniem prajaŭ fašyzmu ŭ sučasnaj Rasii, jakija ŭklučajuć biezumoŭnaje padparadkavańnie načalstvu i vykanańnie dziejańniaŭ dziela dziejańniaŭ.
Rasijskija čynoŭniki pachvalili nastaŭnikaŭ, jakija na zahad biełarusa nadzieli šapački z folhi
Pa zahadzie biełarusa ŭ rasijskich škołach vyrablali šapački z folhi dla abarony ad NATA
Prankier Bochan pravioŭ novy rozyhryš, jaki biełaruskija nastaŭniki dastojna vytrymali. U adroźnieńnie ad rasijskich
U Rasii viadomy biełaruski prankier zapatrabavaŭ pravieści chrosny chod ź ikonami Bandery
Łukašenka pieraabuŭsia: Pozna ŭviečary Minsk pahruzili ŭ ciemru. Navošta? Ja ž ad vas hetaha nie patrabavaŭ20
Kamientary