Adkaz na heta pytańnie błohier pasprabavaŭ znajści ŭ prostych biełarusaŭ roznych uzrostaŭ na vulicy.
Sieryju videa z adkazam na pytańnie: «Kolki vam treba, kab kamfortna žyć?» raźmiaściŭ adzin ź biełaruskich błohieraŭ u svaim tyktoku.
Adna z žančyn adkazała, što dla takoha žyćcia jaje piensija pavinna składać 3000-4000 rubloŭ. Na jaje pohlad, najaŭnaść takich hrošaj dazvolić joj źjeździć kudy-niebudź u adpačynak.
Sumu ŭ 3000 rubloŭ nazvała i inšaja žančyna piensijnaha ŭzrostu. Kali ŭ jaje spytali, kim treba pracavać, kab stolki zarablać, žančyna adkazała:
«Statystyka havoryć, što niedzie i daktary atrymlivajuć stolki, i vykładčyki. Ale nie viedaju».
Pažyły mužčyna zaŭvažyŭ, što maładym ludziam dla kamfortnaha žyćcia patrebna 4000 rubloŭ. Inšaja žančyna dastatkova stałaha ŭzrostu zaŭvažyła, što dla maładych patrebna suma ŭ piać tysiač:
«Heta dakładna. Kožny pavinien zarablać, muž ci žonka. Piać tysiač — heta samy mizier, jaki ciapier pa tych cenach, što ŭ kramach».
Kali ž błohier pacikaviŭsia ŭ maładych ludziej, to takoha adnadušša nie było. Tak, adzin z surazmoŭcaŭ spačatku adkazaŭ, što jamu budzie dastatkova 1500 rubloŭ. Paśla ŭdakładnieńnia, ci sapraŭdy hetaha jamu chopić dla kamfortnaha žyćcia, trochi padumaŭšy, małady čałaviek pavialičyŭ sumu ŭdvaja.
«A voś babulki kažuć, što piać tysiač», — zaŭvažyŭ błohier i pačuŭ u adkaz: «Dyk leki ŭ ich darahija».
«Dakładna nie mienš za dźvie tysiačy [rubloŭ]. Heta kali čałaviek adzin žyvie, ekanomić», — vykazała svajo mierkavańnie dziaŭčyna i dadała, što suma dla kamfortnaha žyćcia vielmi indyvidualnaja:
«Va ŭsich svaje zapyty. Niekamu zusim nie patrebna toje, što ja nabyvaju, kaža, što ja tranžyrka strašnaja».
Na zaŭvahu, što piensijaniery nazyvali sumu ŭ piać tysiač, surazmoŭca adkazała: «Heta ludzi prosta tak nazyvajuć ličby». Paśla razvah jana nazvała sumu ŭ 4000 rubloŭ.
Dla taho, kab nie hladzieć na ceny ŭ kramach, maładoj dziaŭčynie — hieraini inšaha rolika — treba było b nie mienš za tysiaču dalaraŭ.
A voś jašče adna dziaŭčyna adkazała, što dla kamfortnaha žyćcia suma pavinna być na ŭzroŭni $3000. Na jaje pohlad, takija hrošy ŭ Biełarusi možna zarabić, kali maješ biznes ci pracuješ «samym topavym» prahramistam. Inšych mahčymaściej jana nie bačyć.
Žančyna siaredniaha ŭzrostu vykazała mierkavańnie, što dla kamfortnaha žyćcia nieabchodna 6000 rubloŭ. I takija hrošy mohuć zarabić ajcišniki.
Ale nielha ličyć, što ŭsie biełarusy vielmi patrabavalnyja da vialikich dachodaŭ.
Bolš za 300 tysiač prahladaŭ nabrała videa, hierainia jakoha vykazała ćviordaje mierkavańnie, što joj dla kamfortnaha žyćcia chapiła b 1000 rubloŭ.
Adzin z hledačoŭ prakamientavaŭ heta videa nastupnym čynam: «Heta Nastačka z kazki «Marozka» — «ciopła tabie, dziaŭčyna, ci ciopła tabie, miłaja?» — «Ciopła, baciuška, ciopła…».
Ciapier čytajuć
Maŭrykij, Siejšeły, Šry-Łanka i nie tolki: pahladzieli, kudy źbiehli ad biełaruskich marazoŭ praŭładnyja artysty i viadučyja13
Kamientary