Kolki zarablajuć łukašenkaŭckija deputaty ŭ pravincyi? Ich dachodam pazajzdrościać mnohija

Miesiačny dachod achvotnikaŭ stać deputatami značna pieravyšaje siaredni zarobak u Biarezinskim rajonie, jaki ŭ toj čas źjaŭlaŭsia najbiedniejšym u Minskaj vobłaści. U 2022 hodzie tam naličvali rabotnikam u siarednim pa 1292 rubli štomiesiac.

Udakładnim, što ŭ dekłaracyjach kandydataŭ u deputaty ŭkazvajecca ahulny dachod. Heta značyć, što kali čałaviek mienavita ŭ toj pieryjad pradaŭ kvateru ci mašynu, to ličba moža być vyhladać anamalna vialikaj.

Staršynia rajsavietu

Siaredniemiesiačny dachod dziejnaha staršyni rajsavieta kamunista Viktara Łaškoŭskaha składaŭ 3 600 rubloŭ ($1375 pa tahačasnym kursie).

Łaškoŭski ŭ dekłaracyi paznačyŭ, što vałodaje domam u rajcentry, a taksama maje dva aŭtamabili: VAZ 2121 i VOLVO V-60.

Čynoŭniki rajvykankamu

Kiraŭnik spravami rajvykankama kamunist Michaił Burcaŭ zadekłaravaŭ dachod 2900 rubloŭ na miesiac ($1107). U čynoŭnika dom u Bierazinie, lecišča ŭ rajonie i aŭtamabil HYUNDAI ATOS.

Namieśnica staršyni rajvykankama kamunistka Volha Kalačka paznačyła štomiesiačny dachod 2451 rubiel ($935). Majomaściu Kalačka nie vałodaje.

Dachod kiraŭnicy ŭpraŭleńnia pa adukacyi, sportu i turyzmu rajvykankama kamunistki Alesi Citovaj składaŭ 2300 rubloŭ ($878). Na jaje zapisanyja dva lehkaviki, RENAULT MEGANE SCENIC i MAZDA 323.

Vieranika Džyhiera, jakaja načalstvuje va ŭpraŭleńni pa pracy, zaniataści i sacyjalnaj abarony rajvykankama, paznačyła, što ŭ siarednim atrymlivała 1592 rubli ($608). Dachod Džyhiery najmienšy siarod čynoŭnikaŭ, jakija bałatujucca ŭ rajsaviet.

Top-miedyki

Hałoŭnaja doktarka rajonnaj balnicy, 33-hadovaja kamunistka Kryścina Kruk mieła 5800 rubloŭ na miesiac ($2214).

Biespartyjny hałoŭny doktar rajonnaj sanepidemstancyi Vadzim Bujnicki atrymlivaŭ 2900 rubloŭ ($1107).

Kab mieć taki dachod, padnačalenym Kruk i Bujnickaha treba pracavać na dźvie staŭki i zabycca, što ŭ ich jość siamja i dom.

Prapahandystka i biblijatekarka

Dachod hałoŭnaj redaktarki rajonki «Biarezinskaja panarama» Julii Bukiel, jakuju adpraviła ŭ deputaty «Biełaja Ruś», składaŭ 2250 rubloŭ ($858).

Kiraŭnica rajonnaj biblijateki kamunistka Natalla Majeŭskaja zarablała pa 2880 rubloŭ (amal $1100).

Dachod Majeŭskaj jaje padnačalenyja mohuć tolki saśnić. Šarahovaja biblijatekarka maje chiba što tysiaču rubloŭ u miesiac.

Staršyni sielsavietaŭ

U rajsaviet sprabuje prabicca płojma sielsavietčykaŭ z prykładna adnolkavym dachodam. Jany taksama biespartyjnyja. Voś najbahajciejšyja ź ich.

Staršynia Biarezinskaha sielsavieta Alaksandr Bałsun zarablaŭ 2300 rubloŭ ($879 dalaraŭ).

Staršynia Papłaŭskaha sielsavietu Alaksiej Sarnacki napracavaŭ na 2130 rubloŭ ($813).

Ahrarniki

Najbahaciejšyja vyłučency ŭ rajsaviet — kiraŭniki sielhaspradpryjemstvaŭ (refarmavanych kałhasaŭ). U ich raźvićcio ŭkładajucca vializnyja dziaržaŭnyja inviestycyi. Ahrarniki vyłučajucca ŭ rajsaviet jak biespartyjnyja.

Dyrektar sielhaspradpryjemstva «AhraMAZ» Valeryj Cedryk pa biarezinskich maštabach miascovy Rakfieler. Jon zarablaŭ pa 4700 rubloŭ (amal $1800).

U dyrektarki akcyjaniernaha tavarystva «Pahoscki» Natalli Sokał vychodziła 4130 rubloŭ na miesiac ($1575).

Dyrektar tavarystva «Bradziec» Alaksandr Kruk zarablaŭ pa 4030 rubloŭ ($1537).

Hladzicie taksama:

Kolki zarablajuć Vasilevič, Davydźka, Ananič, Marzaluk?

Uładnyja kandydaty demanstrujuć vysokija prybytki

Sirata, «pravilna» havoryć, addany Łukašenku. Čym admietny mahiloŭski ideołah, jaki stanie samym maładym deputatam Pałaty pradstaŭnikoŭ

Arhanizatar aŭtaprabiehaŭ za Łukašenku pajšoŭ na vybary biez dazvołu źvierchu. Jaho navat nie zarehistravali

• 3
• 0
• 4
• 27
• 10
• 7
• 37
• 0