Imia Muchamied stała samym papularnym u Vialikabrytanii? Tak, ale vy robicie z hetaha pamyłkovyja vysnovy
Padobnaja situacyja i ŭ mnohich rehijonach susiedniaj Rasii.
Pa infarmacyi Nacyjanalnaj statystyčnaj słužby Vialikabrytanii, u 2023 hodzie imia Muchamied (Muhammad) upieršyniu stała samym papularnym imieniem dla chłopčykaŭ u Anhlii i Uelsie. 4661 chłopčyka nazvali mienavita tak.
Tradycyjnaje dla žycharoŭ krainy imia Noj (Noah) adkaciłasia na druhoje miesca (4382 dzicia). Uśled pa papularnaści iduć Olivier, Hieorh, Leo.
Ź pieršaha pohladu taki fakt moža być uspryniaty jak śviedčańnie imklivaha rostu musulmanskaj supolnaści Vialikabrytanii. Padajecca, što pry byccam by niaznačnaj doli nasielnictva (pa infarmacyi na 2021 hod, heta 6,7%), musulmanie naradžajuć bolš za ŭsich astatnich, razam uziatych. U vyniku raspaŭsiudžvajecca mif ab «panajechaŭšych», jaki sieli na šyju miascovym.
Nasamreč statystyka imion ničoha nie havoryć ab pavyšanaj naradžalnaści ŭ musulmanskaj supolnaści Vialikabrytanii. Kali zirnuć na śpis sa sta samych papularnych imionaŭ chłopčykaŭ, to ŭ im znachodzicca tolki čatyry typovyja isłamskija imiony. Heta Jusuf (79-ja pazicyja), Ibrahim (83-ja pazicyja), Musa (85-ja), a taksama vyšejzhadany Muchamied u roznych varyjacyjach (Muhammad — 1-ja pazicyja, Mohammed — 28-ja, Mohammad — 68-ja).
Hetymi imionami ŭ sumie ŭ 2023 hodzie nazvany 8979 dziaciej mužčynskaha połu. Usiaho ž imiony ź pieršaj sotni atrymali 153 218 chłopčykaŭ.
Niaciažka padličyć, što niemaŭlataŭ z typova musulmanskimi imionami siarod ich usiaho 5,86 %. I heta trochi mienš za dolu, jakuju składaje musulmanskaja abščyna ŭ Vialikabrytanii.
Heta nie admianiaje taho faktu, što imia Muchamied nabiraje papularnaść. Jak adznačaje vydańnie Daily Mail, jaho ŭ roznym napisańni atrymaŭ kožny 40-vy narodžany chłopčyk ci 2,6% ad ahulnaj kolkaść. Hetaja ličba samaja vialikaja za ŭsiu historyju. U pieršuju čarhu heta abumoŭlena samym nizkim pakazčykam naradžalnaści ŭ Vialikabrytanii z 1977 hoda.
Vydańnie nahadvaje, što varyjant napisańnia Mohammed uvajšoŭ u sotniu najbolš papularnych imion Vialikabrytanii jašče ŭ 1924 hodzie. Jaho papularnaść značna źniziłasia pierad pačatkam i ŭ hady Druhoj suśvietnaj vajny i znoŭ stała raści tolki ŭ 1960-ja hady.
Zrešty, imia Muchamied možna ličyć samym papularnym imieniem u śviecie, kali skłaści formy Mohammed, Muhammad, Mohamed i Mohammad. Heta abumoŭlena tym, što ŭ musulmanskaj tradycyi imiem praroka isłamu pryniata nazyvać pieršaje dzicia mužčynskaha połu. U inšych relihijach takoj prychilnaści da niejkaha asobnaha imieni niama.
Nierazumieńnie hetaj śpiecyfiki aburaje i mnohich rasijan, kali jany bačać statystyku papularnaści imionaŭ u roznych rehijonach krainy.
Muchamad lidziruje ź vialikim adryvam u musulmanskich Čačni, Dahiestanie, Karačajeva-Čarkiesii, Kabardzina-Bałkaryi, Inhušecii, a apošnija hady vybiłasia na pieršaje miesca i ŭ Chanty-Mansijskaj aŭtanomnaj akruzie.
Zrešty, i ŭ Maskvie Muchamad nabiraje papularnaść i ŭžo zabraŭsia na 14-je miesca. Adnak inšych «musulmanskich» imionaŭ u haradskim topie niama, baćki spyniajucca mienavita na hetym imieni.
Kamientary