Za piać hadoŭ abarony ŭ Hruzii paprasiła bolš za 70 biełarusaŭ, trom dziasiatkam užo admovili
Z 2019 hoda da kanca treciaha kvartała 2024-ha pa abaronu ŭ Hruzii źviarnulisia 73 hramadzianiny Biełarusi, admovu ŭžo atrymaŭ 31 čałaviek, vynikaje z padrychtavanaha na padstavie danych hruzinskaha MUS daśledavańnia. Jaho vynikami z «Pozirkam» padzialiŭsia pravaabaronca Raman Kiślak.
Admovy ŭ nadańni palityčnaha prytułku ŭ 2019—2022 hadach byli adzinkavymi, u 2023-m i pieršym paŭhodździ 2024-ha ich nie było zusim. Absalutnaja bolšaść admoŭ — 25 z 31 — pryjšłasia na lipień — vierasień hetaha hoda.
«Paśla zacišša z razhladam zapytaŭ biełarusaŭ na prytułak sa žniŭnia 2024 hoda departamient mihracyi MUS pačynaje aktyŭna razhladać biełaruskija spravy i štampavać admovy ŭ prytułku, — kanstatavaŭ pravaabaronca. — Hledziačy pa apytańniach, jakija paćviardžajucca aficyjnaj statystykaj MUS, nichto ź biełarusaŭ nie zmoh atrymać statut uciekača ŭ Hruzii».
Pavodle jaho słoŭ, paśla atrymańnia admoŭ «idzie masavaja padrychtoŭka i padača skarhaŭ u Tbiliski haradski sud».
«Vidavočna, što niechta va ŭradzie Hruzii napiaredadni vybaraŭ u parłamient (adbylisia 26 kastryčnika; pieramožcam abviaściła siabie kiroŭnaja partyja «Hruzinskaja mara», jakaja idzie prarasijskim kursam na škodu jeŭrapiejskaj pierśpiektyvie krainy. — «Pozirk».) vyrašyŭ usim biełarusam admović u prytułku, niezaležna ad abstavin, na jakija jany spasyłajucca. My bačym u hetym dyskryminacyju pavodle prykmiety nacyjanalnaha pachodžańnia, jakaja ŭ mižnarodnym pravie traktujecca jak adna z form rasavaj dyskryminacyi», — padkreśliŭ Kiślak.
Zhodna z daśledavańniem, bolš za ŭsio biełarusaŭ źviartałasia pa humanitarny status u 2023 i 2024 hadach — 21 i 32 adpaviedna. Siarod tych, chto paprasiŭ abarony za apošnija piać hadoŭ, pieravažajuć mužčyny i žančyny 26—40 hadoŭ, naličvajecca 15 dziaciej.
Abapirajučysia na statystyku MUS, aŭtary daśledavańnia padličyli kolkaść biełarusaŭ u Hruzii — 12955 (biez uliku turystaŭ).
«Možna mierkavać, što «pašpartny ŭkaz» mocna ŭpłyvaje na dynamiku adtoku biełarusaŭ u 2024 hodzie, adnak na siońniašni momant bolš padrabiaznych danych niama. U listapadzie 2024 hoda ŭ Hruzii pačaŭsia pierapis nasielnictva, jon taksama moža dać bolš padrabiaznyja źviestki pra biełarusaŭ, jakija žyvuć u krainie, adnak tolki naleta», — havorycca ŭ dakumiencie.
Hruzija — adna z krain, kudy biełarusy emihravali, ratujučysia ad represij, što raspačalisia ŭ Biełarusi paśla sfalsifikavanych vybaraŭ 2020 hoda. Tudy ž rełakavałasia istotnaja častka biełaruskaha IT-biźniesu.
Šmat u čym heta było abumoŭlena miakkimi ŭmovami pierabyvańnia ŭ krainie — biełarusy mohuć znachodzicca ŭ Hruzii bieź vizy na praciahu hoda, a dla abnuleńnia biaźvizavaha terminu dastatkova vyjechać za miažu i adrazu viarnucca na hruzinskuju terytoryju (h. zv. «vizaran»). Razam z tym apošnim časam pačaścilisia vypadki, kali hruzinskija pamiežniki nie dazvalali biełarusam viartacca ŭ krainu paśla «vizaranu».
Lehalizavacca ŭ Hruzii biełarusam niaprosta, asabliva ŭ śviatle «pašpartnaha ŭkazu» № 278, jakim Łukašenka pazbaviŭ zamiežnyja ŭstanovy mahčymaści padaŭžać termin dziejańnia pašparta biełaruskaha hramadzianina i vydavać novyja dakumienty.
Bližejšym časam buduć vyzvaleny bolš za 150 palitźniavolenych39
Kamientary