Biełaruscy pryjšłosia viarnuć dziciačuju dapamohu dziaržavie za paŭhoda. Što adbyłosia?
Biełaruska apublikavała ŭ tyktoku videa, dzie raskazała, što joj daviałosia viarnuć u Fond sacabarony nasielnictva (FSAN) dziciačuju dapamohu pa dohladzie dziciaci, jakuju jana atrymlivała na praciahu paŭhoda.
Dziaŭčyna śćviardžaje, što źjaŭlajecca hramadziankaj Biełarusi i tut naradziła svajho syna. Pa jaje słovach, kali dziciaci spoŭniłasia paŭhoda, jana razam z mužam vyrašyła naviedać jahonych svajakoŭ u Turcyi i, pakinuŭšy krainu, pryniała rašeńnie nie viartacca, zaŭvažyŭ historyju Telegraf.news.
«U adzin dzień mnie telefanuje maci i kaža, što na majo imia pryjšoŭ list, u jakim skazana, što ja abaviazanaja viarnuć dapamohu za 6 miesiacaŭ dziaržavie», — raspaviała dziaŭčyna.
Jana zajaviła, što ŭ hety momant jakraz źbirałasia prylacieć u Biełaruś.
«I voś my prylatajem tudy, i mnie zadajuć pytańnie: «Kudy i na što vy patracili hrošy?» Ja takaja: «U sensie, na što? U mianie na rukach maleńkaje dzicia, jamu ŭsiaho tolki 10 miesiacaŭ, i jano jašče navat nie chodzić». Na heta mnie adkazali, što «my hetaha viedać nie možam». Tamu voś vam 1 miesiac na toje, kab viarnuć hrošy dziaržavy», — śćviardžaje biełaruska.
Čiestno hovoria ja była šokirovana ,vied́ v lubom słučaje riebienok hraždanin etoj strany ♀️no my vsie viernuli i spali spokojno . A vy kak sčitajetie , normalno li eto ? Dievočki , obiazatielno bieritie na zamietku siebie kto iz Biełarusi i połučajet posobije
Pa słovach dziaŭčyny, situacyja jaje šakavała, i jana nie razumieje, čamu pavinna viartać hrošy za dzicia, jakoje ŭ lubym vypadku hramadzianin Biełarusi. Adnak jana viarnuła dapamohu, jak taho i patrabavali.
«Tamu, dziaŭčaty, kali vy źbirajeciesia vyjazdžać za miežy Respubliki Biełaruś i atrymlivajecie dziciačuju dapamohu, to vy abaviazany papiaredzić ab hetym orhany. Tamu što vy nie majecie prava atrymlivać dziciačuju dapamohu, kali dzicia budzie znachodzicca bolš za dva miesiacy za miežami Respubliki Biełaruś», — rastłumačyła dziaŭčyna.
Karystalniki sacsietki padzialilisia ŭ mierkavańniach. Adny padtrymali biełarusku, niechta paličyŭ, što ŭsio zroblena spraviadliva.
«Čamu? Niezrazumieła. Dzicia hramadzianstva nie mianiała, u inšaj dziaržavie jaho nie ŭtrymlivali. Jon što, u turmie? — napisała adna z karystalnic.
«Naohuł pravilna, u nas prostyja hramadzianie kožnuju kapiejku ličać na dzicia, a tut šmat lišnich hrošaj pa zamiežžach jeździć i jašče tak nadoŭha, i nieviadoma, jak jašče hetyja hrošy za 6 miesiacaŭ vydatkavanyja», — vykazałasia inšaja.
«Heta značyć dzicia na praciahu hetych miesiacaŭ ni jeść, ni pje, padhuźniki nie vykarystoŭvaje i adzieńnie nie nosić i, naturalna, nie chvareje», — dadaŭ jašče adzin kamientatar.
«Cikava, ja časova źjaždžała, i nichto ž nie skazaŭ: «Nie płacicie kvartpłatu», — zaŭvažyŭ jašče chtości.
Nahadajem, što zhodna z zakonam «Ab dziaržaŭnych dapamohach siemjam, jakija vychoŭvajuć dziaciej», atrymalnik dapamohi, jaki vyjechaŭ ź dziciem na termin bolš za dva miesiacy, pavinien paviedamić pra heta ŭ adździeł fondu sacabarony na praciahu 5 kalandarnych dzion z dnia vyjezdu. Kali atrymalnik nie paviedamić pra heta ci paviedamić paźniej, vypłačanuju dapamohu mohuć zapatrabavać viarnuć. Pryčym z dnia vyjezdu dziciaci i da kanca miesiaca, u jakim jano viarnułasia ŭ Biełaruś.
U vypadku, kali čałaviek admovicca dobraachvotna viartać zališnie vypłačanuju dapamohu, FSAN moža źviarnucca ŭ sud i spahnać hrošy ŭ prymusovym paradku.
Kali vy viarnulisia ŭ Biełaruś, to treba znoŭku źviarnucca ŭ FSAN, kab vypłaty adnavili, bo aŭtamatyčna dapamohu vypłačvać nie buduć.
Padarožničać ź dziciem i atrymlivać dapamohu mahčyma, kali buduć vykanany dźvie ŭmovy:
- baćka (atrymalnik) pavinien pravieści nie mienš jak 183 dni sumarna ŭ Biełarusi ŭ hod;
- termin znachodžańnia za miažoj pavinien składać mienš za dva miesiacy zapar.
U hetym vypadku dapamohu buduć vypłačvać uvieś čas.
Ciapier čytajuć
Maksim Znak: My ź Cichanoŭskaj zajšli padavać skarhu ŭ kabiniet Jarmošynaj — ale Jarmošynaj tam nie było60
Kamientary