Kim byŭ kijeŭski strałok? Vajskovy piensijanier z antysiemickimi pohladami, jaki naradziŭsia ŭ Maskvie, a žyŭ na Danbasie
Ukrainskija śpiecnazaŭcy likvidavali terarysta, jaki ŭ Kijevie zastreliŭ 6 čałaviek i 15 čałaviek paraniŭ. Źjaŭlajecca ŭsio bolš padrabiaznaściaŭ, kim byŭ hety čałaviek.
Strałka zavuć Dźmitryj Vasilčankaŭ. Jamu 58 hadoŭ. Naradziŭsia ŭ Maskvie, mieŭ hramadzianstva Ukrainy. Raniej žyŭ u Bachmucie Danieckaj vobłaści, paśla ŭ rasijskaj Razani, a ŭrešcie — u Kijevie.
«U Hałasiejeŭskim rajonie stalicy 58‑hadovy ŭradženiec Maskvy adkryŭ stralaninu, zabiŭ čatyroch čałaviek, paśla čaho zabarykadavaŭsia ŭ pamiaškańni supiermarkieta i ŭtrymlivaŭ zakładnikaŭ.
Pavodle papiarednich danych, jon vykarystoŭvaŭ aŭtamatyčnuju zbroju. Adnačasova ŭźnik pažar u kvatery, dzie byŭ zarehistravany napadnik», — zajaviŭ hienieralny prakuror Ukrainy Rusłan Kraŭčanka.
Dźmitryj Vasilčankaŭ da 2004 hoda słužyŭ va ŭkrainskaj armii, u bataljonie materyjalna-techničnaha zabieśpiačeńnia 254‑j motastrałkovaj dyvizii, jakaja dysłakavałasia ŭ Danieckaj vobłaści. Z vojska pajšoŭ, vysłužyŭšy piensiju.
Raniej jon pastajanna žyŭ u Bachmucie, a ŭ 2015—2017 hadach časova — u rasijskaj Razani. Paźniej viarnuŭsia va Ukrainu i žyŭ u Kijevie niepadalok ad miesca, dzie siońnia adkryŭ ahoń pa ludziach.
Na staroncy ŭ fejsbuku, jakaja była aktyŭnaj u 2016—2019 hadach i viałasia pad nikam «Bachmut V.D.V», Vasilčankaŭ publikavaŭ antyŭkrainskija i antysiemickija dopisy.
U ich jon zaklikaŭ da siłavoj «začystki» hramadstva, spasyłajučysia na mietady Adolfa Hitlera, admaŭlaŭ lehitymnaść Ukrainy i adkryta škadavaŭ, što Ihar Hirkin u 2014 hodzie spyniŭsia na paŭdarozie.
U 2024 hodzie Dźmitryj Vasilčankaŭ trapiŭ pad sud za naŭmysnaje naniasieńnie ciełavych paškodžańniaŭ, ale byŭ vyzvaleny ad kryminalnaj adkaznaści paśla prymireńnia z paciarpiełym.
Zbroja, ź jakoj Vasilčankaŭ učyniŭ stralaninu, była lehalnaja i zarehistravanaja, śćviardžaje ministr unutranych spraŭ Ukrainy Ihar Klimienka. Pa jaho słovach, jašče ŭ śniežni 2025 hodzie mužčyna źviarnuŭsia ŭ sistemu, jakaja daje adpaviednyja dazvoły, z prośbaj adstralać hetuju zbroju praz zakančeńnie terminu, a taksama prynios z saboj miedycynskuju daviedku. Ciapier śledstva budzie vyśviatlać, jaki mienavita orhan vydaŭ mužčynu hetuju daviedku i inšyja dazvoły.
Kamientary
1.Mieł ukrainskaje hramadzianstva vajskovuju piensiju.i hr.rf
2 U socsietkach vykazvał antiukrainskija pohlady
3 Pryciahvali da adminadkaznści u 24 -25
4 Mieł zbroju i paćvierdził jaje lehalna
5.Čym zaniaty sbuušniki ??
6 Zatrymać žyvym ni atrymałaś??
Pytańnieŭ jašče bolej ..
Adkaz budzie.....