Maksim Znak: My ź Cichanoŭskaj zajšli padavać skarhu ŭ kabiniet Jarmošynaj — ale Jarmošynaj tam nie było
Pasiarod razmovy jaho padmanam vyvieli ŭ susiedni pakoj. I nie puścili nazad.
Były palitviazień Maksim Znak u novym vypusku «Toku» raspavioŭ detali padziej 10 žniŭnia 2020 hoda ŭ Centralnaj vybarčaj kamisii — dnia, paśla jakoha Śviatłana Cichanoŭskaja pakinuła Biełaruś.
Pavodle jaho, u toj dzień jon razam sa Śviatłanaj Cichanoŭskaj, Maryjaj Kaleśnikavaj i inšymi pradstaŭnikami štaba pryjšli ŭ Centrvybarkam, kab padać skarhu na vyniki vybaraŭ. Spačatku Cichanoŭskuju zaprasili ŭ budynak adnu, adnak jana admoviłasia iści biez advakata i kamandy.
«Jaje zaprasili adnu, jana skazała: biez advakata nie pajdu. Była dyskusija, ale ŭrešcie mianie prapuścili razam ź joj», — uzhadvaje Znak.
Jany nakiravalisia ŭ kabiniet staršyni CVK Lidzii Jarmošynaj, kab asabista pieradać skarhu.
«Ja navat prapanoŭvaŭ padać praz kancylaryju, ale nam skazali: nie, treba asabista.
My zajšli ŭ kabiniet Jarmošynaj — ale jaje tam nie było. Tam byli zusim inšyja ludzi», — kaža jon.
Pieršuju častku sustrečy Znak pravioŭ razam ź Cichanoŭskaj. Pavodle jaho, razmova pačynałasia davoli spakojna i vyhladała jak sproba «abmierkavać situacyju».
«Kazali, što ciapier składanaja situacyja, treba parazmaŭlać. I, kali ščyra, u toj momant mahło zdavacca, što havorka pojdzie pra niejki dyjałoh — jak spynić hvałt, što adbyvaŭsia ŭ pieršyja dni paśla vybaraŭ, i pakarać vinavatych», — adznačyŭ jon.
Adnak nieŭzabavie jaho paprasili vyjści z kabinieta — nibyta kab pakłaści telefon.
«Heta vyhladała davoli naturalna: maŭlaŭ, kab nie było prasłuchoŭvańnia. Ja vyjšaŭ — i na hetym mnie ŭžo zakryli ŭvachod nazad», — raspavioŭ Znak.
Dalej jon zastavaŭsia ŭ susiednim pamiaškańni, dzie pravioŭ niekalki hadzin, pakul praciahvałasia razmova.
«Ja ŭvieś čas byŭ pobač. Vybar byŭ prosty: albo zastavacca i razumieć, što adbyvajecca, albo sprabavać eskałavać situacyju i nieviadoma dzie apynucca. Ja vyrašyŭ zastacca — chacia b kab być upeŭnienym, što niama fizičnaha hvałtu», — skazaŭ jon.
Pavodle Znaka, da peŭnaha momantu ŭsio vyhladała «bolš-mienš narmalna», ale situacyja źmianiłasia, kali dźviery začynilisia i kala ich źjavilisia ludzi.
«Da taho momantu, pakul nie začynilisia dźviery i nie stali dva čałavieki pierad imi, usio vyhladała davoli zvyčajna. A potym stała zrazumieła, što my trapili ŭ pastku — i nas prosta raźjadnali», — adznačyŭ jon.
Znak kaža, što ŭ kabiniecie prysutničali kiraŭnik Apieratyŭna-analityčnaha centra Andrej Paŭlučenka i namieśnik ministra ŭnutranych spraŭ Hienadź Kazakievič.
Znak padkreśliŭ, što chacia ton razmovy byŭ źniešnie karektny, sama situacyja vyhladała nienarmalna.
«Kali ty prychodziš u kabiniet da žančyny, a tam dvoje mužčyn i jany pačynajuć jaje ŭ niečym pierakonvać — heta ŭžo samo pa sabie nienarmalna», — skazaŭ jon.
Razmova praciahvałasia niekalki hadzin.
«Mnie prapanavali prysieści. Ja kazaŭ: «Nie, ja budu stajać». Jany stajali, ja stajaŭ, my čakali. U niejki momant Znak zaŭvažyŭ, što ŭ budynak idzie videaapieratar.
«Tady stała zrazumieła, što pieramovy skončylisia — ale heta byli nie tyja pieramovy», — adznačyŭ jon.
Paśla hetaha Cichanoŭskaja vyjšła z kabinieta.
«My abnialisia, raźvitalisia. Jana skazała, što musić jechać — biez padrabiaznaściej. Ja razumieŭ, što byvajuć situacyi, kali vybaru prosta niama», — uspaminaje Znak.
Nieŭzabavie paśla hetaha Cichanoŭskuju vyvieźli z krainy. Sam Znak paśla vychadu z budynka CVK pajšoŭ raskazvać pra toje, što adbyłosia.
Ciapier čytajuć
Ci patrebnaja biełaruskaja mova tym, chto razmaŭlaje pa-rusku? Azaronak zadaŭsia takim pytańniem na STB, a vypusknik Akademii MUS prapanavaŭ zamianić uroki fakultatyvami4444
Kamientary