Da liku raniej zvolnienych zorak kalektyvu Maksima Brahinca, Źmiciera Davidoviča, Arcioma Kurenia i Hanny Siemianiaka dałučyŭsia Dzianis Aŭcharenka: 14 listapada jon adyhraŭ svoj apošni śpiektakl u RTBD.
Dzianis naradziŭsia ŭ 1988 hodzie ŭ Viciebsku. Jak i častka raniej zvolnienych kaleh, skončyŭ Biełaruskuju dziaržaŭnuju akademiju mastactvaŭ pa śpiecyjalnaści «akcior teatra i kino» na kursie ŭ Mikałaja Kiryčenki. Praŭda, u RTBD Dzianis pryjšoŭ tolki ŭ 2022 hodzie. Da hetaha jon pracavaŭ u Nacyjanalnym akademičnym dramatyčnym teatry imia Jakuba Kołasa (Viciebsk), u Biełaruskim dziaržaŭnym moładzievym teatry (Minsk) i ŭ Kamiernym dramatyčnym teatry «Leviendal» (Sankt-Pieciarburh).
Pa našaj infarmacyi, u RTBD Dzianis pryjšoŭ pa zaprašeńni siabroŭ, i ciapier, kali ich zvolnili, vyrašyŭ syści z teatra.
Dzianis taksama byŭ častkaj samych kasavych śpiektaklaŭ — «Šlub ź vietram», «Zabałoćcie», «Pačupki», a taksama vykonvaŭ rolu ŭ papularnaj pastanoŭcy pa matyvach tvoraŭ Uładzimira Karatkieviča «Karniej».
Jak nam paviedamiła blizkaja da situacyi krynica, usie hetyja śpiektakli adnaŭlać nie płanujuć.
Pry tym što papularnaść tych ža «Pačupak» i «Šlubu ź vietram» była kałasalnaja: achvotnyja pabačyć ich nie ŭłazili ŭ ścieny RTBD, tamu hetyja śpiektakli časam pakazvali ŭ prastorniejšym Domie aficeraŭ.
Viadoma, što ŭ teatry pravodziŭ razmovy zamacavany za im ideołah. Z bolšaj častkaj akcioraŭ jašče raniej «u metach vychavańnia» byli zapisanyja prymusovyja videa.
«Abstanoŭka ŭ teatry napružanaja, mnohija bajacca navat pamiž saboj stelefanoŭvacca. Tym bolš mieli miesca danosy. A kali akcioraŭ zatrymali, uvohule była takaja atmaśfiera, nibyta niechta pamior», — raskazała nam abaznanaja krynica. Mnohija ličać, što ŭsio heta — dadatkovyja zapužvańni napiaredadni prezidenckich vybaraŭ.
Represii zakranuli teatr jašče ŭ krasaviku 2024 hoda: tady akciora Uładzisłava Nozdryna razam z žonkaj, taksama aktrysaj teatra, asudzili da 2 hadoŭ i 6 miesiacaŭ chatniaj chimii za «ŭdzieł u dziejańniach, jakija hruba parušajuć hramadski paradak» (č. 1 art. 342 KK). U vyniku partfolia Uładzisłava prybrali z sajta teatra.
Ale šerahi teatra pačali radzieć jašče raniej — adrazu paśla vybaraŭ 2020 hoda ŭ znak pratestu z RTBD zvolnilisia Andrej Novik i Mikałaj Stońka. Illa Jasinski byŭ vymušany źjechać z krainy paśla taho, jak jaho zatrymali na adnym z maršaŭ i złamali pazvanki. U kancy 2021 hoda z teatra byŭ zvolnieny mastacki kiraŭnik Alaksandr Harcujeŭ, jaki ŭznačalvaŭ RTBD z 2012 hoda. Akramia taho, RTBD pakinuli Alena Bajarova, Maryja Piatrovič, Maryna Zdarankova i Maksim Šyško.
Pry hetym novaja dyrektarka Śviatłana Navumienka (jana pryjšła na źmienu Śviatłanie Karukinaj letam 2024 hoda) padrychtavała ŭłasnuju premjeru — u śniežni ŭ teatry prezientujuć pastaŭlenyja joj «Zaručyny» — viečar kamiedyj pavodle pjes «Jak jany žanilisia» Alaksandra Vałodźskaha i «Piarestaja krasula» Alaksandra Čužynina.
Hałoŭnyja roli ŭ śpiektakli dastalisia pravieranamu časam składu (naprykład, zasłužanamu artystu Valancinu Sałaŭjovu, jaki pracuje ŭ teatry z 2013 hoda, ci Maksimu Panimatčanku, jaki hraje tam z 2001-ha) i maładniaku — tym, chto pryjšoŭ užo ŭ 2022-2023 hadach.
«Adchileńni ad dziaržaŭnaj palityki». Jak u Biełarusi skaračajecca kolkaść vydadzienych pa-biełarusku knih
«Humaru ja nie hublaju. Heta mahčymaść rabić lepšymi dni abo chviliny dla kahości». Hutarka z Alenaj Zuj-Vajciachoŭskaj
Pabyvali na premjery śpiektakla «Orden biełaj myšy», dzie antyŭtopija Arłova pieraplałasia z realnaściu
Ciapier čytajuć
Padazronaha aktyvista-stukača Paŭła Bialucina pryvieźli z Turcyi1
Kamientary