Jak vyjavić ankałohiju ŭ dziciaci i čamu daktary nie rekamiendujuć adpačyvać zimoj u haračych krainach

Jak zaŭvažyć ankałohiju ŭ dziaciej

Ankołah Maryna Barysievič u intervju BT źviartaje ŭvahu na toje, što pry raźvićci raku kryvi (lejkoz ci lejkiemija) u pieršuju čarhu adbyvajucca źmieny ŭ sistemie vytvorčaści kletak kryvi. U ahulnym analizie kryvi daktary ŭbačać źnižeńnie pakazčyka ŭzroŭniu hiemahłabinu, kolkaści lejkacytaŭ i trambacytaŭ.

Pry aniemii, jakaja raźvivajecca vielmi chutka, dzicia budzie blednaje, viałaje, biez apietytu.

Kali kolkaść trambacytaŭ, jakija ŭpłyvajuć na narmalnuju zhusalnaść kryvi, źnižajecca, to moža źjavicca tak zvany «hiemarahičny syp» u vyhladzie vialikaj kolkaści drobnych kropačak (hiemarahijaŭ), łakalizavanych u peŭnym učastku cieła, asabliva tam, dzie jość pavyšaje treńnie, na zhinalnych učastkach.

Pry źnižanaj kolkaści trambacytaŭ navat pry lohkim udary ŭ dziciaci adrazu źjaŭlajecca siniak. Tryvohu pavinna vyklikać, kali na praciahu karotkaha pieryjadu času bieź vidavočnych na toje pryčyn siniakoŭ stała istotna bolš.

Kab vyjavić vostry lejkoz, dastatkova zdać kroŭ z palca na ahulny analiz kryvi.

Nakolki ŭpłyvaje hienietyka?

Ankołah spasyłajecca na vyniki vysokatechnałahičnych malekularna-hienietyčnych mietadaŭ, jakija byli niedastupnyja jašče 20-25 hadoŭ tamu.

«Kali darosłyja ankołahi havorać i pra źniešniaje ŭździejańnie asiarodździa, ład žyćcia, to dziciačyja śpiecyjalisty schilajucca mienavita da hienietyčnaj asnovy raźvićcia złajakasnych novaŭtvareńniaŭ. Jość vypadki, kali dzicia moža naradzicca ŭžo sa złajakasnaj puchlinaj».

Maryna Barysievič zaŭvažaje, što jość situacyi, kali daktary z dapamohaju UHD va ŭłońni maci vyjaŭlajuć puchlinu ŭ niemaŭlaci i adrazu paśla naradžeńnia pieradajuć jaho śpiecyjalistam RNPC «Maci i dzicia». A paźniej, kali dzicia vychadzili, ankołahi robiać jamu apieracyju.

Jaki pracent paśpiachovaści lačeńnia

Śpiecyjalist adznačaje, što na siońnia daktary havorać pra 80% vyžyvańnia ŭ cełym pa ŭsich złajakasnych zachvorvańniach u dziaciej. Pa niekatorych zachvorvańniach hety pakazčyk pieravyšaje 90%.

Takija vyniki dasiahnuty dziakujučy raźvićciu navukovych daśledavańniaŭ, spałučeńniu navuki i praktyki, mižnarodnym kantaktam.

Pry hetym kolkaść dziciačaj ankałohii ŭ Biełarusi nizkaja — kala 16-17 vypadkaŭ na 100 tysiač dziciačaha nasielnictva. U hod heta kala 300-350 vypadkaŭ. Ale va ŭsim śviecie nazirajecca tendencyja da rostu hetych zachvorvańniaŭ u miežach 1-1,5%.

Prafiłaktyka raku

Niekatorym siemjam daktary paviedamlajuć ab schilnaści da ankałahičnych zachvorvańniaŭ i dajuć rekamiendacyi. Naprykład, źmienšyć uździejańnie ŭltrafijaletavaha apramieńvańnia.

Pa słovach Barysievič, daktary nie rajać rezkuju źmienu klimatu, naprykład, pajezdki zimoju na adpačynak u haračaje leta. Dla taho, kab dzicia adaptavałasia da źmieny ŭmoŭ nadvorja, treba miesiac. Paśla viartańnia dachaty stolki ž času nieabchodna na adaptacyju da rodnaha klimatu. Mała chto z baćkoŭ moža dazvolić taki doŭhi adpačynak.

Što datyčycca znachodžańnia na soncy, to śpiecyjalist zaŭvažaje: «Znachodžańnie ŭ hadziny pikavaj soniečnaj aktyŭnaści na plažy pad adkrytym soncam nie karysna nikomu».

• 3
• 0
• 0
• 0
• 0
• 1
• 0
• 0