Zdajecca, u sieciva trapiła baza źviestak klijentaŭ «Biełdziaržstracha»

Papularny rasijski bot «Voka Boha» zvyčajna vykarystoŭvajuć dla «prabivu» (pošuku infarmacyi pra kankretnaha čałavieka). Mienavita ŭ im «Lusterka» vyjaviła danyja z bazy «Klijenty Biełdziaržstracha 2022».

Jakuju infarmacyju z bazy vydaje bot? Heta proźviščy, imiony i imiony pa baćku, daty naradžeńnia, numary telefonaŭ, chatnija adrasy i niejkija «numary karty».

Z vysokaj vierahodnaściu hetyja danyja sapraŭdnyja. Vydańnie pravieryła infarmacyju prynamsi pa dziesiaci ludziach. Žurnalisty paraŭnali infarmacyju bota z toj, što ludzi sami ŭkazvali na svaich staronkach u sacsietkach i miesiendžarach — va ŭsich supali imiony, numary telefonaŭ i daty naradžeńnia. Taksama ŭ adnym vypadku pravieryli adras čałavieka. I jon akazaŭsia viernym.

Što za «numary karty»?

Usie «numary karty», jakija žurnalisty znajšli ŭ dostupie, padobnyja adzin da adnaho. Jany 16-značnyja i pačynajucca ź ličbaŭ 9112 19… Ale što heta za numary? Pa dapamohu vydańnie źviarnułasia da pradstaŭnikoŭ OSINT-prajekta Digital Intelligence Team.

— Pieršyja čatyry ličby 9112 ukazvajuć na ŭnutranuju płaciežnuju sistemu Respubliki Biełaruś «Biełkart», — rastłumačyŭ pradstaŭnik OSINT-prajekta. — Ale voś jaki mienavita bank ich vypuściŭ — pravieryć nie ŭdałosia ni praz adzin servis. BIN-numar 9112 19 nie isnuje.

Bankaŭski identyfikacyjny numar (BIN) — heta pieršyja šeść ličbaŭ numara bankaŭskaj karty. Jany zvyčajna vykarystoŭvajucca ŭ kredytnych i debietavych kartach, kartach ź pieradapłataj, padarunkavych kartach i inšych kartach. BIN vykarystoŭvajecca dla identyfikacyi brenda karty, banka-emitenta, krainy vypusku, typu karty i katehoryi kart.

Akramia taho, jak adznačyŭ surazmoŭca, «numary karty» z uciečki nie prachodziać pravierku pa «kantrolnaj ličbie», jakoj zvyčajna adpaviadajuć numary sapraŭdnych płaciežnych kartak. U suviazi z hetym składana skazać, jakija numary trapili ŭ dostup i nakolki jany sapraŭdnyja.

— Jość niekatoryja momanty, jakija navodziać na dumku, što hetaja ŭciečka, mahčyma, źviazanaja z uciečkaj danych kanca 2022 hoda (havorka idzie pra ŭciečku danych «Biełhazprambanka» i internet-kramy nlstar.by), — patłumačyŭ adzin z udzielnikaŭ inicyjatyvy.

Da taho ž vosiem ź dziesiaci pravieranych biełarusaŭ jość nie tolki ŭ bazie «Klijenty Biełdziaržstracha», ale i jašče ŭ adnoj — «Klijenty bankaŭ 2021». Heta moža navieści na dumku, što dźvie ŭciečki źviazanyja pamiž saboj.

Jaki abjom źviestak u bazie «Klijenty Biełdziaržstracha 2022» pakul niemahčyma, bo poŭny śpis klijentaŭ u adkrytym dostupie adsutničaje. Ale, kab zrazumieć mahčymy maštab uciečki, varta adznačyć, što, pavodle danych na 2023 hod, «Biełdziaržstrach» zaklučyŭ bolš za 6,4 miljona strachavych damovaŭ.

Pradpryjemstva naležyć Ministerstvu finansaŭ Respubliki Biełaruś. Raniej pra ŭciečki dadzienych klijentaŭ hetaj kampanii ničoha nie paviedamlałasia.

Navat kali vy nie byli klijentam «Biełdziaržstracha», šaniec taho, što vašyja dadzienyja mahli źjavicca ŭ adkrytym dostupie, davoli vysoki. Za apošnija hady ŭ Biełarusi adbyłosia mnostva ŭciečak piersanalnych danych, siarod jakich byli i vielmi bujnyja.

• 0
• 0
• 0
• 0
• 0
• 0
• 1
• 0