Zasnavalnik i saŭładalnik «Trajpła» Juryj Čyž znoŭ sudzicca. Biznesmien sprabuje ŭziać pad kantrol małakazavod u kurortnym rasijskim horadzie Hielendžyk. Pakul atrymoŭvajecca nie vielmi, piša «Biełarusy i rynak».
U hetym miesiacy Juryj Čyž atrymaŭ admoŭnaje zaklučeńnie ŭ Arbitražnym sudzie Krasnadarskaha kraju.
Jak vynikaje z sudovaj spravy, na dadzieny momant viadomy ŭ Biełarusi biznesmien źjaŭlajecca ŭładalnikam 7800 akcyj AT «MORIE» (da vieraśnia hetaha hoda nazyvałasia AT «Małzavod Hielendžykski»). Hety pakiet składaje 38,3349% ad ich ahulnaj kolkaści. Častku ź ich Čyž atrymaŭ u siaredzinie 2010-ch, častku vykupiŭ u 2023 hodzie ŭ jašče adnaho biełaruskaha akcyjaniera zavoda.
U hetym hodzie biełaruski biznesmien pasprabavaŭ asprečyć u sudzie fakt dareńnia AT «MORIE» niejkaj hramadziankaj Irynaj Masołavaj svajho pakieta ŭ 2614 štuk akcyj.
Navošta? Jak možna padličyć, jaje pakiet składaje 12,8471% ad kapitału tavarystva. I jaho jakraz nie chapaje, kab Čyž moh atrymać 51% akcyjaŭ pradpryjemstva.
U Arbitražny sud Krasnadarskaha kraju Juryj Čyž źviarnuŭsia na padstavie taho, što nibyta, kali letam 2023 hoda adbyłasia hetaja ździełka, byli parušany jaho pravy jak akcyjaniera. Tavarystva stała ŭładalnikam hetaha pakieta ŭ pieryjad, kali znachodziłasia ŭ pracedury bankructva (u pieryjad z 2016 hoda i da vieraśnia 2023-ha), i inšyja akcyjaniery nie mahli pa zakonie na jaho pretendavać.
Adnak pasiadžeńnie suda, jakoje adbyłosia ŭ pačatku kastryčnika, admoviła pazoŭniku ŭ pryznańni damovy niesapraŭdnaj. Było ŭkazana, što jana nie supiarečyć zakonu i nie parušaje pravoŭ inšych akcyjanieraŭ, pakolki była aformlena jak akt biazvypłatnaha dareńnia. Taksama sud pastanaviŭ źniać z hetych akcyj raniej pryniatyja pa chadajnictvie Čyža zabieśpiačalnyja miery.
U Juryja Čyža jašče jość čas da pačatku listapada abskardžvać hetaje rašeńnie. Ale ci budzie jon dalej sudzicca, mahčyma, zaležyć ad paralelnaha razhladu pazovu Ministerstva ekanomiki Krasnadarskaha kraju da AT «MORIE». U im viedamstva prosić iznoŭ pryznać hetaje pradpryjemstva bankrutam. Zavod prastojvaŭ u 2023 hodzie i paśla vychadu ź pieršaha bankructva amal na čverć naraściŭ straty.
Spačatku ŭ žniŭni ministerstvu było admoŭlena. Ale apielacyjnaja instancyja ŭ vieraśni znoŭ zapuściła praces mahčymaha paŭtornaha bankructva najstarejšaha małakapierapracoŭčaha pradpryjemstva horada. Rašeńnie pa hetym pytańni, jak vynikaje z materyjałaŭ spravy, budzie prymacca ŭ śniežni 2024 hoda.
Ciapier čytajuć
Stali viadomyja padrabiaznaści taho, jak u Vjetnamie zatrymali Vieramiejčyka21
Kamientary